கடன் தொல்லையால் இளம் தம்பதி இரு குழந்தைகளுடன் தூக்கில் தொங்கி தற்கொலை !!

கடன் தொல்லை தாங்காமல் 2 பெண் குழந்தைகளை தூக்கில் தொங்கவிட்ட பிறகு இளம் தம்பதி தூக்கு போட்டு தற்கொலை செய்துகொண்டது சென்னையில் பெரும் சோகத்தை ஏற்படுத்தியுள்ளது.
சென்னை மேற்கு சைதாப்பேட்டை குமரன் நகர் பகுதியில் வசித்து வந்தவர் அன்வர் (32). ஆட்டோ டிரைவர். இவரது மனைவி பரிதா (29). இவர்களுக்கு பிஸ்வானா (4), ரியானா (2) என்ற இரண்டு பெண் குழந்தைகள். ஆட்டோவை வாடகைக்கு எடுத்து ஓட்டி வந்தார் அன்வர். இதில் அவருக்கு போதிய வருமானம் கிடைக்கவில்லை. இதையடுத்து தெரிந்தவர்களிடம் கடன் வாங்கினார். கடன் தொல்லை அதிகரித்ததால் குடும்பம் நடத்த முடியாமல் வறுமையில் வாடினார். இதுபற்றி மனைவியிடம் அடிக்கடி கூறி வருத்தப்பட்டார். ‘குழந்தைகளை எப்படி வளர்க்கப்போகிறேன் என்பதே தெரியவில்லை. எதிர்காலம் என்ன ஆகுமோ’ என்று கலங்கியுள்ளார்.

அன்வரின் தந்தை இக்பால் அதே பகுதியில் 4 தெரு தள்ளி வசிக்கிறார். நேற்று இரவு 9 மணி அளவில் அவரை பார்க்க வந்தார் அன்வர். கடன் தொல்லை பற்றி தந்தையிடம் கூறி அழுதுள்ளார். “எல்லாம் சரியாகிவிடும். உடன் பிறந்தவர்கள் இருக்கிறார்கள். யாரும் உன்னை கைவிட்டுவிட மாட்டோம். தைரியாக வீட்டுக்கு போ” என்று ஆறுதல் சொல்லி அனுப்பினார். ஆனாலும் கலக்கத்துடனேயே வீடு திரும்பினார் அன்வர்.

சிறிது நேரம் கழித்து, சாப்பாடு எடுத்துக் கொண்டு மகன் வீட்டுக்கு மனைவியுடன் இக்பால் சென்றார். கதவு, ஜன்னல்கள் சாத்தப்பட்டிருந்தன. கதவு உள்பக்கம் பூட்டியிருந்தது. வெகு நேரம் தட்டியும் கதவு திறக்கவில்லை. சந்தேகம் அடைந்த இக்பால் ஜன்னலை திறந்து பார்த்தார். உள்ளே மகன், மருமகள், 2 பேரக் குழந்தைகள் தூக்கில் தொங்குவதை பார்த்து கதறினார். சத்தம் கேட்டு அக்கம்பக்கத்தினர் ஓடி வந்து கதவை உடைத்து உள்ளே சென்றனர்.

இதுகுறித்து குமரன் நகர் போலீசுக்கு தகவல் கொடுக்கப்பட்டது. இன்ஸ்பெக்டர் சார்லஸ் உடனடியாக விரைந்து வந்து சடலங்களை கைப்பற்றி பிரேத பரிசோதனைக்காக ராயப்பேட்டை அரசு ஆஸ்பத்திரிக்கு அனுப்பினார்.

தந்தை ஆறுதல் கூறிய பிறகும் கலங்கிய மன நிலையிலேயே அன்வர் இருந்துள்ளார். குடும்பத்துடன் தற்கொலை செய்துகொள்ள முடிவு செய்தார். மனதை கல்லாக்கிக் கொண்டு, குழந்தைகள் இருவரையும் மனைவியின் சேலையில் துடிதுடிக்க தூக்கில் தொங்கிவிட்டு கொன்ற பிறகு தம்பதிகள் இருவரும் தூக்கு போட்டு தற்கொலை செய்தது தெரியவந்தது. கடன் தொல்லை தாங்காமல் குடும்பமே தூக்கு போட்டு தற்கொலை செய்துகொண்டது மேற்கு சைதாப்பேட்டை பகுதியில் பெரும் சோகத்தை ஏற்படுத்தியுள்ளது.