இன்று பெண்ணியம் தொடர்பான ஆய்வரங்கம்

இன்றைய அரங்க நிகழ்ச்சிகளில் பெண்ணியம், இலக்கணம், இலக்கியம், நுண்கலைகள் உள்ளிட்ட தலைப்புகளில் அமர்வரங்கம் நடைபெறுகிறது.
கோவையில் உலகத்தமிழ்ச் செம்மொழி மாநாடு நடைபெற்று வருகிறது. மாநாட்டின் ஐந்தாம் நாளான இன்று அமர்வரங்கம் நடைபெறுகிறது.
மாநாட்டின் இரண்டாம் நாள் நடந்த அமர்வரங்கில் மயில்சாமி அண்ணாதுரை மற்றும் ஆ.சிவதாணுபிள்ளை உள்ளிட்ட பலர் பங்கேற்றனர். மூன்றாம் நாள் நடந்த அமர்வரங்கில் ஐராவதம் மகாதேவன் பங்கேற்று சொற்பொழிவாற்றினார். நான்காம் நாளான நேற்று நீதியரசர் வள்ளிநாயகம், ஆளுடையபிள்ளை உள்ளிட்டோர் அமர்வரங்கில் பங்கேற்றுப் பேசினர். இன்றும் பல ஆய்வாளர்கள் பல்வேறு தலைப்புகளில் பங்கேற்கும் அமர்வரங்கம் நடைபெறுகிறது.
* பழந்தமிழக மகளிர்
இன்று பிசிராந்தையார் அரங்கில் ச.பரிமளா தலைமையில் நடைபெறும் பெண்ணியம் அமர்வரங்கில், "பழந்தமிழக மகளிர் தொழில்முனைவோர்' எனும் தலைப்பில் அ.மணவழகன் கட்டுரை வாசிக்கிறார்.
* தமிழரின் இசைக்கருவிகள்
இன்று கல்லாடனார் அரங்கில் சா.கிருட்டிணமூர்த்தி தலைமையில் நடைபெறும் நுண்கலைகள் அமர்வரங்கில், "தமிழர் கண்ட இசைக் கருவிகள் பாதுகாப்பு முறைகள்' எனும் தலைப்பில் ராம.கவுசல்யா உரையாற்றுகிறார்.
* பாவேந்தரிடம் வினா
இன்று இளங்கோ அரங்கில் நெல்லை சொக்கலிங்கள் தலைமையில் நடைபெறும் இலக்கியம் அமர்வரங்கில், "பாவேந்தரிடம் ஒரு வினா' எனும் தலைப்பில் கு.சிவமணி கட்டுரை வாசிக்கிறார்.
* தமிழின் ஒட்டுநிலை
இன்று வெள்ளிவீதியார் அரங்கில் பொன்னவைகோ தலைமையில் நடைபெறும் அரசியல்,சமூக,பொருளாதார வரலாறு அமர்வரங்கில் ஆய்வாளர்கள் தமிழ் மொழியின் ஒட்டுநிலை, கொங்குநாட்டு கல்வெட்டுகள், தமிழில் ஆரியத் தாக்கம் குறித்து கட்டுரைகள் வாசிக்கின்றனர்.
* தமிழர் திருமணம்
இன்று கோவூர்கிழார் அரங்கில் ஜோதிமுருகன் தலைமையில் நடைபெறும் கலை-இலக்கிய-பண்பாட்டு வரலாறு அமர்வரங்கில், "தமிழர் திருமணம்' எனும் தலைப்பில் ஆர்.லம்போதரன் உரையாற்றுகிறார்.
* எழுத்துச் சீர்திருத்தம்
இன்று சாத்தனார் அரங்கில் முத்துக்குமரன் தலைமையில் நடைபெறும் அரசியல்,சமூக,பொருளாதார வரலாறு அமர்வரங்கில், "எழுத்துச் சீர்திருத்தமா! தமிழுக்கது பொருத்தமா?' எனும் தலைப்பில் பெஞ்சமின்.லெ.பொ பேசுகிறார்.