சிங்கப்பூர் வங்கியில் தமிழகத்தில் மோசடி செய்த 100 கோடி பணம்

by ரபீக் Sun Jun 27, 2010 10:10 am

திருப்பூர் பாசி நிதி நிறுவனம் ரூ.100 கோடி மோசடி செய்ததாக போலீசார் வழக்குப் பதிவு செய்தனர். இந்த வழக்கில் நிதி நிறுவன நிர்வாகிகள் மோகன்ராஜ், கதிரவன், கமலவள்ளி ஆகியோருக்கு உயர் நீதிமன்றம் நிபந்தனை முன்ஜாமீன் வழங்கியது. அதை ரத்து செய்ய கோரி, போலீசார் மனு தாக்கல் செய்தனர். முன்ஜாமீனை ரத்து செய்ய கூடாது என்று மதுரையை சேர்ந்த முதலீட்டாளர் ராமன் என்பவர் மனு தாக்கல் செய்தார்.
அதில், “நிதிநிறுவனத்தில் டெபாசிட் செய்தால், 3 மாதத்தில் பணம் 3 மடங்கு அதிகமாக தரப்படும் என்று அறிவிக்கப்பட்டது. இதை நம்பி ரூ.50 லட்சம் முதலீடு செய்தேன். ஏராளமானோர் இதேபோல் முதலீடு செய்துள்ளனர். நிதிநிறுவன நிர்வாகிகளின் முன்ஜாமீனை ரத்து செய்தால் அவர்கள் சிறைக்கு சென்று விடுவார்கள். எனவே, முன்ஜாமீனை ரத்து செய்ய கூடாது. அப்போதுதான் எங்களுக்கு பணம் கிடைக்கும்” என்று கூறியிருந்தார்.

இந்த வழக்கை நீதிபதி சத்தியநாராயணன் நேற்று விசாரித்தார். நிதிநிறுவன நிர்வாகிகள் சார்பில், ஆஜரான வக்கீல்கள், “நிதிநிறுவனம் ரூ.98 கோடியை சிங்கப்பூரில் உள்ள வங்கியில் டெபாசிட் செய்துள்ளது. இந்த பணத்தை அந்த நாட்டு வங்கி முடக்கி வைத்துள்ளது. அந்த தடையை நீக்கி பணத்தை இந்தியா கொண்டு வர போலீசார் நடவடிக்கை எடுக்க உத்தரவிட வேண்டும்” என்றார்.

வழக்கை விசாரித்த நீதிபதி அளித்த உத்தரவு: முதலீட்டாளர்களின் நலனை கருத்தில் கொண்டு சிங்கப்பூர் வங்கியில் நிதிநிறுவனம் முதலீடு செய்த ரூ.98 கோடியை இந்தியா கொண்டு வர போலீசார் நடவடிக்கை எடுக்க வேண்டும். இதற்கு நிதிநிறுவன நிர்வாகிகள் போலீசாருக்கு முழு ஒத்துழைப்பு தரவேண்டும். முதலீட்டாளர்களுக்கு பணத்தை பிரித்துதர நிதிநிறுவன அதிபர்கள் முதல் தவணையாக ரூ.6 கோடியை, உயர் நீதிமன்ற வங்கி கிளையில் ஜூலை 6ம் தேதிக்குள்ளும், 2வது தவணையாக ரூ.4 கோடியை ஜூலை 20ம் தேதிக்குளும் டெபாசிட் செய்ய வேண்டும்.

இந்த பணத்தை திருப்பி கொடுக்க இதற்காக அமைக்கப்பட்ட கமிட்டி நடவடிக்கை எடுக்க வேண்டும். வழக்கின் அடுத்தகட்ட விசாரணையை ஜூலை 22ம் தேதிக்கு தள்ளி வைக்கிறேன். போலீசார் எடுத்த நடவடிக்கை குறித்த அறிக்கையை நீதிமன்றத்தில் தாக்கல் செய்ய வேண்டும்.