தமிழ் இணைய மாநாட்டில் பரபரப்பு - பேச அனுமதி மறுக்கப்பட்டதால் அமைச்சரிடம் வலைப்பதிவர்கள் முறையீடு.

தமிழ் இணைய மாநாட்டில் பரபரப்பு - பேச அனுமதி மறுக்கப்பட்டதால் அமைச்சரிடம் வலைப்பதிவர்கள் முறையீடு.


கோவை:உலகத் தமிழ்ச் செம்மொழி
மாநாட்டின் ஒரு பகுதியாக தமிழ் இணைய மாநாடும் நடைபெறுகிறது.இதற்கான
ஏற்பாடுகளை உத்தமம் அமைப்பும் தமிழக அரசும் செய்திருந்தன. இந்த மாநாட்டில்
பங்கேற்க உலகம் முழுவதுமிருந்து 400 க்கும் மேற்பட்ட கணினி வல்லுநர்கள்
மற்றும் வலைப்பதிவர்கள் வந்திருந்தனர். இவர்களுக்கு தமிழக அரசின் சார்பில்
தங்குவதற்கு இடம் மற்றும் உணவு ஏற்பாடுகள் சிறப்பாக செய்யப்பட்டிருந்தன.
கொடிசியா வளாகத்தில் இந்த மாநாட்டிற்காக 5 சிறு அரங்குகள் குளிர்சாதன
வசதியுடன் அமைக்கப்பட்டிருந்தன.


இந்த மாநாட்டில் 20 ஆய்வு கட்டுரைகளும், பல்வேறு தலைப்புகளில் 91
தொழில்நுட்ப கட்டுரைகளும் சமர்ப்பிக்கப்பட இருந்தன.நேற்று முன் தினம்
தொடங்கிய இணைய மாநாட்டில் பங்கேற்க வந்த பலருக்கும் அடையாள அட்டையோ,
தங்கும் இடமோ ஏற்பாடு செய்யப்படாமல் இருந்தது. இதனால் வெளிநாட்டில்
இருந்து வந்திருந்த பலரும் அலைக்கழிக்கப்பட்டனர். பலர் யாரிடம் தகவல்
பெறுவது என்பது குறித்தும் குழப்பமடைந்திருந்தனர்.மேலும் மாநாட்டில்
கட்டுரைகள் வாசிக்க வந்திருந்த பலருக்கும் நேரம், தலைப்பு
ஒதுக்கப்படாததால் அதிர்ச்சியடைந்தனர்.குறிப்பாக தமிழ் வலைப்பதிவர்கள் தான்
அதிகம் பாதிப்படைந்திருந்தனர்.இதனால் தமிழ் இணைய மாநாடு நடைபெற்ற
வளாகத்தில் பரபரப்பு நிலவியதுடன். கூச்சல் குழப்பம் ஏற்பட்டது.


அப்பொழுது அரங்கிற்கு வந்த தமிழக தகவல்
தொழில்நுட்பத் துறை அமைச்சர் பூங்கோதை அருணாவிடம் பாதிப்படைந்தவர்கள்
புகார் தெரிவித்தனர். வலைப்பதிர்வர்களின் புகாரை அமைதியாக கேட்ட அமைச்சர்
உடனடியாக இது குறித்து விசாரிக்க உத்தரவிட்டதுடன்.அவர்களுக்கும்
கட்டுரைகளை சமர்ப்பிக்கவும், பேசவும் அனுமதிக்குமாறு
உத்தரவிட்டார்.இதன்பிறகு கட்டுரை சமர்ப்பிக்கவும், பேசவும் அனுமதி
மறுக்கப்பட்டவர்களின் பெயர்கள் மீண்டும் சேர்க்கப்பட்டு தலைப்புகளுக்கு
ஏற்ப நேரம் ஒதுக்கப்பட்டது.தமிழ் இணைய மாநாட்டில் வலைப்பதிவர்கள் பேச
அனுமதி மறுக்கப்பட்டதால் மாநாடு நடைபெற்ற அரங்குகளில் ஒரு சிலர்தான்
அமர்ந்திருந்தனர். இதனால் கட்டுரையாளர்கள் காலியான இருக்கைகளை
பார்த்துதான் பேசினார்கள்.

தமிழ் இணைய மாநாட்டிற்கு உத்தமம் அமைப்பின் செயலாளர் மணியம் மற்றும்
குழுவினர்தான் கட்டுரையாளர்களையும், பேச்சாளர்களையும் ஏற்பாடுகளை
செய்திருந்ததுடன் அவர்களுக்கு இமெயில் மூலம் தொலைபேசி வழியாக அழைப்பு
விடுத்திருந்தனர். மாநாட்டு நிகழ்ச்சிகள் மற்றும் பயணம், தங்கும் இடம்
குறித்த தகவல்களையும் அனுப்பியிருந்தினர்.மணியம் குழுவினரின் மூலம்
அழைக்கப்பட்டவர்களுக்குத்தான் இணைய மாநாட்டில் பேச அனுமதி மறுக்கப்பட்டது.


இது குறித்து உத்தமம் அமைப்பின் துணைத்
தலைவர் வெங்கட்ராமன் தெரிவித்ததாவது:- மணியம் குழுவினர் முறைப்படி தகவல்
தெரிவிக்கவில்லை. இதனால் பேச்சாளர்களுக்கு நேரம் ஒதுக்க
இயலவில்லை.இருந்தாலும் தற்பொழுது அவர்களுக்கும் நேரம்
ஒதுக்கப்பட்டுள்ளது.இணையத்தில் வலைப்பூக்கள் அதிகரித்துவருவது
வரவேற்கத்தக்கது.வலைப்பதிவர்களை புறக்கணிக்கவும் தேவையில்லை.
இந்தபிரச்சனையில் வேறு எந்த சர்ச்சையும் இல்லை எனத் தெரிவித்தார்.