ஜப்பான் அணி அசத்தல் வெற்றி

ரஸ்டன்பர்க்: டென்மார்க் அணிக்கு எதிரான உலக கோப்பை கால்பந்து லீக் போட்டியில், ஜப்பான் அணி 3-1 என்ற கோல் கணக்கில் வெற்றி பெற்று, "ரவுண்ட் ஆப் 16' சுற்றுக்கு தகுதிபெற்றது. இதே பிரிவில் நடந்த மற்றொரு போட்டியில் காமரூன் அணியை வீழ்த்தி, "ஹாட்ரிக்' வெற்றி கண்ட நெதர்லாந்து அணி, "ரவுண்ட் ஆப் 16' சுற்றுக்கு முன்னேறியது.

தென் ஆப்ரிக்காவில், 19வது "பிபா' உலக கோப்பை கால்பந்து தொடர் நடக்கிறது. இதில் நேற்று ரஸ்டன்பர்க் நகரில் நடந்த "இ' பிரிவு லீக் போட்டியில், உலக தரவரிசையில் 36வது இடத்தில் உள்ள டென்மார்க், ஜப்பான் (45வது இடம்) அணிகள் மோதின. தலா 3 புள்ளிகளுடன் களமிறங்கிய இந்த அணிகள், "ரவுண்ட் ஆப் 16' சுற்றுக்கு முன்னேற, இப்போட்டியில் வெற்றி பெற வேண்டிய கட்டாயத்தில் விளையாடின.

ஜப்பான் ஆதிக்கம்:

துவக்கத்தில் இருந்தே ஜப்பான் அணியினர் ஆதிக்கம் செலுத்தினர். ஆட்டத்தின் 17வது நிமிடத்தில் கிடைத்த "பிரி கிக்' வாய்ப்பில், ஜப்பான் வீரர் ஹோன்டா ஒரு சூப்பர் கோல் அடித்து நம்பிக்கை அளித்தார். பின்னர் 30வது நிமிடத்தில் கிடைத்த "பிரி கிக்' வாய்ப்பில் என்டோ ஒரு கோல் அடிக்க, ஜப்பான் அணி வலுவான முன்னிலை கண்டது. தொடர்ந்து போராடிய டென்மார்க் வீரர்களால், பதிலடி கொடுக்க முடியவில்லை. இதனால் முதல் பாதி முடிவில் ஜப்பான் அணி 2-0 என்ற கோல் கணக்கில் முன்னிலை வகித்திருந்தது.

இரண்டாவது பாதியில், ஆட்டத்தின் 81வது நிமிடத்தில் டென்மார்க் அணிக்கு "பெனால்டி கிக்' வாய்ப்பு கிடைத்தது. இதனை ஜப்பான் கோல்கீப்பர் கவாஷிமா அருமையாக தடுத்தபோதும், பந்தை கைப்பற்ற தவறியதால், டென்மார்க் வீரர் டொமாசன் கோலாக மாற்றினார். இதற்கு பதிலடி கொடுக்கும் விதமாக ஜப்பான் வீரர் ஒகாசாகி, 87வது நிமிடத்தில் ஒரு கோல் அடித்து அசத்தினார். ஆட்டநேர முடிவில் ஜப்பான் அணி 3-1 என்ற கோல் கணக்கில் வெற்றி பெற்றது. இதன்மூலம் 3 லீக் போட்டியில் 2 வெற்றி, ஒரு தோல்வி உட்பட 6 புள்ளிகள் பெற்ற ஜப்பான் அணி, "ரவுண்ட் ஆப் 16' சுற்றுக்கு "இ' பிரிவில் இருந்து 2வது அணியாக தகுதிபெற்றது. லீக் சுற்றில் ஒரு வெற்றி மட்டும் கண்ட டென்மார்க் அணி, தொடரில் இருந்து வெளியேறியது.

இரண்டாவது ஆசிய அணி

நேற்றைய போட்டியில் டென்மார்க் அணியை வீழ்த்திய ஜப்பான் அணி, "ரவுண்ட் ஆப் 16' சுற்றுக்கு முன்னேறியது. இதன்மூலம் இத்தொடரில் "ரவுண்ட் ஆப் 16' சுற்றுக்கு முன்னேறிய 2வது ஆசிய அணி என்ற பெருமை பெற்றது. முன்னதாக "பி' பிரிவில் விளையாடிய ஆசிய அணியான தென் கொரிய அணி, "ரவுண்ட் ஆப் 16' சுற்றுக்கு தகுதிபெற்றது.

நெதர்லாந்து "ஹாட்ரிக்' வெற்றி

கேப்டவுன்: நேற்று கேப்டவுன் நகரில் நடந்த மற்றொரு "இ' பிரிவு லீக் போட்டியில், உலக தரவரிசையில் 4வது இடத்தில் உள்ள நெதர்லாந்து, காமரூன் (19வது இடம்) அணிகள் மோதின. முதலிரண்டு லீக் போட்டியில் வெற்றி கண்ட நெதர்லாந்து அணி, ஏற்கனவே "ரவுண்ட் ஆப் 16' சுற்றுக்கு முன்னேறியது. முதலிரண்டு போட்டியில் தோல்வி கண்ட காமரூன் அணி, ஏற்கனவே அடுத்த சுற்றுக்கான வாய்ப்பை இழந்தது. இந்நிலையில் முக்கியத்துவம் இல்லாத இப்போட்டியில், ஆட்டத்தின் 36வது நிமிடத்தில் நெதர்லாந்தின் பெர்சி ஒரு சூப்பர் கோல் அடித்து நம்பிக்கை தந்தார். இதற்கு காமரூன் வீரர்களால் பதிலடி கொடுக்க முடியாததால், முதல் பாதி முடிவில் நெதர்லாந்து அணி 1-0 என முன்னிலை வகித்திருந்தது.

இரண்டாவது பாதியில், ஆட்டத்தின் 65வது நிமிடத்தில் காமரூன் அணிக்கு "பெனால்டி கிக்' வாய்ப்பு கிடைத்தது. இதனை சரியாக பயன்படுத்திய இடோ, ஒரு சூப்பர் கோல் அடித்து 1-1 என சமநிலை பெறச் செய்தார். இதற்கு பதிலடி கொடுக்கும் விதமாக ஆட்டத்தின் 83வது நிமிடத்தில் நெதர்லாந்தின் ஹன்டிலார், ஒரு கோல் அடித்து முன்னிலை பெற்றுத்தந்தார். ஆட்டநேர முடிவில் நெதர்லாந்து அணி 2-1 என்ற கோல் கணக்கில் வெற்றி பெற்றது. இதன்மூலம் லீக் சுற்றில் ஜப்பான், டென்மார்க், காமரூன் அணிகளை வீழ்த்தி, "ஹாட்ரிக்' வெற்றி கண்ட நெதர்லாந்து அணி, "ரவுண்ட் ஆப் 16' சுற்றுக்கு "இ' பிரிவில் இருந்து முதல் அணியாக முன்னேறியது. "ஹாட்ரிக்' தோல்வி கண்ட காமரூன் அணி, தொடரில் இருந்து வெளியேறியது. ஆட்டநாயகனாக பெர்சி தேர்வு செய்யப்பட்டார்.

இரண்டாவது "ஹாட்ரிக்'

இத்தொடரின் லீக் போட்டியில் "பி' பிரிவில் விளையாடிய அர்ஜென்டினா அணி, தென் கொரியா, கிரீஸ், நைஜீரியா அணிகளை வீழ்த்தி "ஹாட்ரிக்' வெற்றி பெற்றது. இதனை தொடர்ந்து "இ' பிரிவு லீக் போட்டியில் விளையாடிய நெதர்லாந்து அணி, ஜப்பான், டென்மார்க், காமரூன் அணிகளை வீழ்த்தி, இத்தொடரில் "ஹாட்ரிக்' வெற்றி கண்ட 2வது அணி என்ற பெருமை பெற்றது.

நெதர்லாந்து-சுலோவேகியா மோதல்

இதன்மூலம் "ரவுண்ட் ஆப் 16' சுற்றில், வரும் 28ம் தேதி டர்பன் நகரில் நடக்கும் போட்டியில், "இ' பிரிவில் முதலிடம் பிடித்த நெதர்லாந்து அணி, "எப்' பிரிவில் 2வது இடம் படித்த சுலோவேகியா அணியுடன் மோதுகிறது. இதேபோல, வரும் 29ம் தேதி பிரிடோரியா நகரில் நடக்கும் "ரவுண்ட் ஆப் 16' சுற்றுக்கான போட்டியில், "இ' பிரிவில் 2வது இடம் பிடித்த ஜப்பான் அணி, "எப்' பிரிவில் முதலிடம் பிடித்த பராகுவே அணியுடன் பலப்பரீட்சை மேற்கொள்கிறது.