ஒரு இந்திய முஸ்லீமின் பிரார்த்தனை

**சிவா** · **சிவா** Fri 25 Jun 2010 - 10:37

யா அல்லாஹ்!
நிராயுதபாணியாய் கையேந்துகிறோம்
இவர்களின் கேள்விகளுக்கு
பதிலளிக்கும் திராணியற்றவர்களாய் !

கடற்கரைவெளிகளில்
புற்கள் தேங்கிய பிரதேசங்களில்
வீதிகளின் கட்டாந்தரைகளில்
பெருநாள் தொழுகைக்காககூடுகிறோம்.

எங்கள் தாய் தேசத்தின் செழிப்புக்காக
உன்னிடம் இறைஞ்சுகின்றவேளை,
இவர்கள் தங்களுக்குள் இரகசியமாய் பேசிக்கொள்வது
காதில் விழுகிறது.

இதோ, வெளிநாட்டுக்காரர்கள் கூடி
சதி செய்கிறார்கள் என்று
தங்கள் வீடுகளையும்,
பயணிக்கின்ற பாலங்களையும்
பாதுகாக்க ஓடுகிறார்கள்.

தேசம் எரிகிறதுதான்
உற்று நோக்குங்கள்
எங்கள் கைகளில் பிடில் இல்லை.

எங்கள் தாய்நாட்டின்
விளையாட்டு வீரர்களுக்காக
கரவொலி எழுப்புகிறபோது
ஏன் செயற்கைத்தனமாய்
நடந்து கொள்கிறாய்' என்று
தொலைக்காட்சியிலிருந்து
ஒரு அசரீரி கேட்கிறது

எங்களுக்கும்
அந்த உளவு நிறுவனத்துக்கும்
தொடர்பிருப்பதாக
உரக்கத்துகிற ஓசை
அந்த மலைகளில் மோதி எதிரொலிக்கிறது
மறுபடி ! மறுபடி !

சிக்கிமுக்கிக்கல்லாய்
உரசிய கேள்விகளில்,
நீ ! நீ, பதில் சொல். இறைவா !

எது எங்கள் தேசம்?
எது எங்கள் கலாச்சாரம்?
எது எங்கள் தாய்மொழி?

இ. சும்தீன்

asksulthan · asksulthan Fri 25 Jun 2010 - 12:53

உண்மை வரிகள்...

kalaimoon70 · kalaimoon70 Fri 25 Jun 2010 - 15:26

வலிகள் சொன்ன வரிகள்,
வழியறியா நிலைகள்.
மொழிகள் இருந்தும் ,தேசமிருந்தும் அன்னியர்கள்,

இ. சும்தீன்....உங்கள் வரிகள் உண்மையை சொல்கிறது .

ரசித்து பகிர்ந்த தலைக்கு நன்றி .

அப்புகுட்டி · அப்புகுட்டி Fri 25 Jun 2010 - 17:16

kalaimoon70 wrote:வலிகள் சொன்ன வரிகள்,
வழியறியா நிலைகள்.
மொழிகள் இருந்தும் ,தேசமிருந்தும் அன்னியர்கள்,

இ. சும்தீன்....உங்கள் வரிகள் உண்மையை சொல்கிறது .

ரசித்து பகிர்ந்த தலைக்கு நன்றி .