காங்கிரஸ் தலைவர் சுதர்சனம் மறைவு

கோவை மருத்துவமனையில் உடல் நலக்குறைவால் அனுமதிக்கப்பட்டிருந்த தமிழக சட்டப்பேரவை காங்கிரஸ் தலைவர் டி.சுதர்சனம் (67) நேற்று சனிக்கிழமை இரவு மரணமடைந்தார்.
உலகத் தமிழ்ச் செம்மொழி மாநாட்டில் பங்கேற்பதற்காக கோவை வந்த சுதர்சனத்துக்கு வெள்ளிக்கிழமை அதிகாலை 2.30 மணியளவில் உடல் நலக்குறைவு ஏற்பட்டது. அவருக்கு ஏற்கெனவே அறுவைச் சிகிச்சை செய்த இடத்திலிருந்து வலி ஏற்பட்டு, சிறுநீருடன் ரத்தம் கலந்து வெளியேறியது. அதையடுத்து கோவை மெடிக்கல் சென்டர் மருத்துவமனையில் (கேஎம்சிஎச்) சேர்க்கப்பட்டார்.

மூச்சுத் திணறல் இருந்ததால் அவருக்கு செயற்கை சுவாசம் அளிக்கப்பட்டது. மருத்துவமனையில் சேர்க்கப்பட்டதில் இருந்தே இதயத் துடிப்பு குறைவாக இருந்தது. முதல்கட்ட சிகிச்சையில் ரத்தப்போக்கு கட்டுப்படுத்தப்பட்டது. இருப்பினும் மூச்சுத் திணறல், இதயத் துடிப்பு குறைவாக இருந்த காரணத்தால், தொடர்ந்து அவர் தீவிர சிகிச்சைப் பிரிவில் சிகிச்சை பெற்று வந்தார்.

அவருக்கு செயற்கை சுவாசம் அளிக்கப்பட்டது. இந்நிலையில் சனிக்கிழமை இரவு 8.50 மணியளவில் அவருக்கு மாரடைப்பு ஏற்பட்டது. மருத்துவர்கள் தீவிர சிகிச்சை அளித்தும் பலனின்றி அவர் இறந்தார்.

இதுகுறித்து தகவல் கிடைத்ததும் துணை முதல்வர் மு.க.ஸ்டாலின், மத்திய அமைச்சர் அழகிரி, அமைச்சர்கள் தங்கம் தென்னரசு, எ.வ.வேலு, பொங்கலூர் நா.பழனிசாமி, பெரியகருப்பன், பூங்கோதை, தமிழரசி, கீதா ஜீவன், எம்பி டி.ஆர்.பாலு, எம்எல்ஏ கோவை தங்கம் ஆகியோர் மருத்துவமனைக்கு சென்று அவரது உடலுக்கு அஞ்சலி செலுத்தினர். அதைத் தொடர்ந்து, மருத்துவமனைக்கு வந்த முதல்வர் கருணாநிதி, சுதர்சனம் உடலுக்கு மரியாதை செலுத்தினார்.

பிறகு, நிருபர்களிடம் முதல்வர் கூறியது:

சில நாள்களுக்கு முன், சுதர்சனத்துக்கு அறுவை சிகிச்சை மேற்கொள்ளப்பட்டது. தனது உடல்நிலையைக்கூட பொருட்படுத்தாமல், உலகத் தமிழ்ச் செம்மொழி மாநாட்டில் பங்கேற்க அவர் வந்துள்ளார்.

அவருடன் பல்லாண்டு காலம் நான் நட்புடன் பழகியுள்ளேன். நாகரிகம், பண்பாடுடன் பழகக்கூடிய நல்ல மனிதர். எதிர்பாராத இந்த முடிவு அவரது குடும்பத்துக்கு மட்டுமல்ல, எங்களது குடும்பத்தினருக்கும் வருத்தத்தை அளிக்கிறது. அவரது குடும்பத்தினர் ஆறுதல் பெற வேண்டும் என்றார்.
மறைந்த காங்கிரஸ் தலைவர் டி. சுதர்சனம் தொகுதியில் இடைத்தேர்தல் நடைபெறாது என்று கூறப்படுகிறது.

சட்டப் பேரவை காங்கிரஸ் தலைவர் டி. சுதர்சனம், சென்னையை அடுத்த பூந்தமல்லி தொகுதியில் இருந்து எம்.எல்.ஏ.வாக தேர்ந்தெடுக்கப்பட்டவர். ஓர் உறுப்பினர் மரணமடைந்தால் அத் தொகுதியில் இடைத்தேர்தல் நடத்தப்படுவது வழக்கம்.

ஆனால், சட்டப் பேரவைத் தேர்தலுக்கு ஓராண்டுக்கும் குறைவான காலமே இருப்பதால் விதிகளின்படி பூந்தமல்லி தொகுதியில் இடைத்தேர்தல் நடைபெறாது என்று கூறப்படுகிறது.