ஆவடி அருகே தண்டவாளத்தில் விரிசல்

சென்னை பட்டாபிராம் ரயில் நிலைய பிளாட்பாரத்தையொட்டி, அரை அடி அளவுக்கு தண்டவாளத்தில் விரிசல் இருந்ததை ஊழியர் ஒருவர் நேற்று காலை கண்டுபிடித்தார். இதனால் மின்சார ரயில்கள் பெரும் விபத்தில் இருந்து தப்பின. 4 மணி நேரத்துக்குப் பிறகு போக்குவரத்து சீரானது.
ஆவடி அருகே பட்டாபிராம் ரயில் நிலையத்தில் எக்ஸ்பிரஸ் ரயில்கள் செல்லும் தண்டவாளத்தின் மீது, கடந்த 20ம் தேதி சிமென்ட் சிலாப் வைக்கப்பட்டிருந்தது. அரக்கோணத்தில் இருந்து சென்னை நோக்கி வந்த இன்ஜின் மோதியதால், அந்த சிமென்ட் சிலாப் நொறுங்கியது. இதனால், எக்ஸ்பிரஸ் ரயில்கள் விபத்தில் இருந்து தப்பியது. சிமென்ட் சிலாப் வைத்து ரயிலை கவிழ்க்க சதி செய்தவர்கள் யார் என்று, ஆவடி ரயில்வே போலீசார் விசாரித்து வருகின்றனர்.

இந்நிலையில், பட்டாபிராம் ரயில் நிலையத்தில் மின்சார ரயில்கள் செல்லும் தண்டவாளம் உடைந்திருந்தது நேற்று கண்டுபிடிக்கப்பட்டது. பட்டாபிராம் ரயில்வே ஊழியர் பார்த்தசாரதி, காலை 7.40 மணிக்கு தண்டவாளத்தை ஆய்வு செய்தபோது, ரயில் நிலையத்தையொட்டி பிளாட்பாரம் அருகில் இரு தண்டவாளம் இணையும் பகுதியில் அரை அடி அளவுக்கு உடைந்திருந்ததைக் கண்டு திடுக்கிட்டார்.

இதுகுறித்து ரயில்வே அதிகாரிகளுக்கு தகவல் கொடுத்தார். இன்ஜினியர்கள் மகேஷ்வரன், ராஜகோபால் ஆகியோர் ஊழியர்களுடன் சம்பவ இடத்துக்கு வந்தனர். தற்காலிகமாக தண்டவாளத்தை சரிசெய்து ரயில் போக்குவரத்துக்கு ஏற்பாடு செய்தனர். தகுந்த சமயத்தில் தண்டவாளம் உடைந்ததை ஊழியர் பார்த்தசாரதி கண்டுபிடித்ததால் பெரும் ரயில் விபத்து தவிர்க்கப்பட்டது. எனினும், சென்னை & அரக்கோணம் மார்க்கமாக செல்லும் மின்சார ரயில்கள் தாமதமாகச் சென்றன.

இதைத்தொடர்ந்து, உடைந்த தண்டவாளத்துக்குப் பதிலாக மாற்று தண்டவாளம் கொண்டு வரப்பட்டது. அந்த பகுதியில் குறிப்பிட்ட அளவு தண்டவாளத்தை அறுத்தெடுத்துவிட்டு, புதிய தண்டவாளத்தை பொருத்தும் பணி நடந்தது. இந்த பணி 11.40க்கு முடிந்தது. 4 மணி நேரத்துக்குப் பிறகு ரயில் போக்குவரத்து சீரானது.

இதுபற்றி அதிகாரிகள் கூறுகையில், “பட்டாபிராம் பகுதியில் தண்டவாளம் அமைக்கப்பட்டு 10 ஆண்டுக்கு மேல் ஆகிறது. தட்ப வெப்பநிலை மாற்றத்தினால் தண்டவாளத்தில் விரிசல் மற்றும் உடைப்பு ஏற்படும். சரியான நேரத்தில் ஊழியர் கண்டுபிடித்ததால் உடனடியாக சரிசெய்யப்பட்டது” என்றனர். இந்த சம்பவம் பயணிகளிடையே பீதியை ஏற்படுத்தியது.

நல்லவேளை சீராச்சு...