சென்னையில் கொள்ளையர்கள் இருவர் கைது

ரபீக் · ரபீக் Thu Jun 24, 2010 3:51 pm

சென்னையில் 30 சவரன் நகை மற்றும் ஒரு லட்சம் பணம் கொள்ளையடித்த இருவர் கைது செய்யப்பட்டுள்ளனர்.
சென்னை, சூளைமேட்டை சேர்ந்தவர் பாலு (எ) பட்டாசு பாலு. அயனாவரம் பகுதியை சேர்ந்தவர் சிங்கார வேலு (எ) குமார் (28). பாலு பல்வேறு இடங்களில் தனியாக கொள்ளை, செயின் பறிப்புகளில் ஈடுபட்டு வந்தார். அப்போது குமாருடன் அவருக்கு நட்பு ஏற்பட்டது.

கொள்ளையடிப்பது பற்றி குமாருக்கு பாலு பயிற்சி அளித்துள்ளார். இருவரும் சேர்ந்து சேத்துப்பட்டு, அயனாவரம் உள்ளிட்ட பல இடங்களில் கொள்ளை மற்றும் செயின் பறிப்பு சம்பவங்களில் ஈடுபட்டுள்ளனர். இவர்கள் மீது ஏராளமாக வழக்குகள் நிலுவையில் உள்ளன.

இந்தநிலையில், பாலுவுக்கும் குமாருக்கும் இடையே கொள்ளை பணத்தில் பங்கு போடுவதில் பிரச்னை ஏற்பட்டது. எனவே, குமார் கீழ்ப்பாக்கத்தில் உள்ள ஒரு வீட்டில் தனியாக சென்று ரூ.1 லட்சம் கொள்ளை அடித்தார். கொள்ளை அடிப்பதில் குருவை மிஞ்சிய சிஷ்யன் என்று பெயர் பெற்றுள்ளார்.

பாலுவையும் குமாரையும் பிடிக்க சென்னை மாநகர போலீஸ் கமிஷனர் ராஜேந்திரன் உத்தரவுப்படி, துணை ஆணையர் சாரங்கன் ஆலோசனைப்படி கீழ்ப்பாக்கம் இன்ஸ்பெக்டர் அன்பழகன் தலைமையில் தனிப்படை அமைக்கப்பட்டது. கடந்த 22ம் தேதி சேத்துப்பட்டு பகுதியில் சோதனை செய்தபோது, பாலுவும், குமாரும் பிடிபட்டனர்.

அவர்களிடம் இருந்து 30 சவரன் நகை மற்றும் ரூ.1 லட்சம் ரொக்கம் மீட்கப்பட்டது. கொள்ளையரை பிடித்த போலீசாரை கமிஷனர் ராஜேந்திரன் பாராட்டினார்.