இந்தியா முழுவதும் கோர்ட்டுகளில் விவாகரத்து பெறுவதற்காக 55 ஆயிரம் தம்பதிகள் காத்திருப்பு: விரைந்து முடிக்க மத்திய அரசு திட்டம்

ரபீக் · ரபீக் Thu Jun 24, 2010 12:53 pm

இந்தியாவில் விவாகரத்து செய்யும் தம்பதிகள் எண்ணிக்கை நாளுக்கு நாள் அதிகரித்தபடி உள்ளது. மும்பை, டெல்லி, பெங்களூர் நகரங்களில்தான் விவாகரத்து பெறுபவர்கள் எண்ணிக்கை அதிகமாக உள்ளது. ஒவ்வொரு ஆண்டும் மும்பையில் சராசரியாக 7500 பேரும், டெல்லியில் 9 ஆயிரம் பேரும், பெங்களூரில் 3 ஆயிரம் பேரும் விவாகரத்து பெறுகிறார்கள். விவாகரத்து பெற ஒவ்வொரு தம்பதியும் 2 முதல் 4 ஆண்டுகள் வரை காத்திருக்க நேரிடுகிறது.

சில விவாகரத்து வழக்குகளில் பல ஆண்டுகளாக கிடப்பில் கிடப்பது உண்டு. அந்த வகையில் இந்தியா முழுவதும் உள்ள கோர்ட்டுகளில் தற்போது சுமார் 55 ஆயிரம் தம்பதிகள் விவாகரத்து பெற மனு கொடுத்து விட்டு காத்திருப்பது தெரியவந்துள்ளது.

விவாகரத்து வழக்குகளை விரைந்து முடிப்பதற்காக இந்து திருமண சட்டம் 1955-ல் திருத்தம் கொண்டு வர மத்திய அரசு முடிவு செய்துள்ளது. இந்த புதிய சட்டத்திருத்தம் காரணமாக இனி தம்பதிகள் 2 வாரத்தில் விவாகரத்து பெற முடியும்.

விவாகரத்து வழக்குகள் நாடெங்கும் அதிகமாக குவிந்து கிடப்பதால் குடும்ப நலக்கோர்ட்டுகளின் எண்ணிக்கை அதிகரிக்கப்படும் என்று சட்ட மந்திரி வீரப்ப மொய்லி கூறினார். சட்டத்திருத்தம் கொண்டு வரப்பட்டதும் நிலுவையில் உள்ள விவாகரத்து வழக்குகள் அனைத்தும் விரைவாக விசாரித்து முடிக்கப்படும் என்று அவர் கூறினார்.

3 ஆண்டுகளுக்கு மேலாக உள்ள விவாகரத்து வழக்கு களுக்கு முன்னுரிமை கொடுக்கப்பட்டு முதலில் நடத்தி முடிக்கப்படும் என்று தெரியவந்துள்ளது.