செம்மொழி மாநாட்டில் அறிவியல் தமிழ் அரங்கம்

ஜூன் 24 முதல் 27 வரை நான்கு நாட்களில், அறிவியல் தமிழ் அரங்கில், ஏழு அமர்வுகளில் ஆராய்ச்சிக் கட்டுரைகள் வெளியிடப்படுகின்றன. இதில் சர்வதேச விஞ்ஞானிகள் ஆராய்ச்சி முடிவுகளை வெளியிடுகிறார்கள்.


நாளை பகல் 12 மணிக்கு கம்பர் அரங்கில்,சந்திரயானின் நிலவுப் பயணமும் நிலவில் நீர் கண்டுபிடிப்பும் எனும் தலைப்பில் அரங்கின் தலைவரான மயில்சாமி அண்ணாதுரை பேசுகிறார். இதே அரங்கில் புதுடில்லி, பிரம்மோஸ் ஏவுகணை விஞ்ஞானி, சிவதாணுப்பிள்ளை, பிரம்மோஸ் - உள்நாட்டு ஏவுகணை உருவாக்கலும் பயன்பாடு செய்வித்தலும் எனும் தலைப்பிலும், அணுசக்தித் துறை, இயக்குனர் அருள்தாஸ் கந்தையா அணுசக்தி கனரக நீர்த் தொழிற்சாலைகளின் பாதுகாப்பு மற்றும் உற்பத்தியை மேம்படுத்த உதவும் சிறந்த செயல்பாடுகள் எனும் தலைப்பிலும் பேசுகிறார்கள். மாரி மவுர்யா, கண்ணன், செவ்வாய் கிரகத்துக்கு மனிதப் பயணம் எனும் தலைப்பில் பேசுகிறார்கள்.
இது குறித்து, மயில்சாமி அண்ணாதுரை தெரிவித்தபோது,"தமிழில் படித்தவர்கள் விவசாயம் முதல் விண்வெளி வரை அனைத்துத் துறைகளிலும் சாதித்திருக்கிறார்கள். அவர்கள் அமெரிக்கா முதல் ஆஸ்திரேலியாவரை பல்வேறு நாடுகளில் பணிபுரிந்து சர்வதேச அளவில் சாதனை புரிந்திருக்கிறார்கள். தமிழில் படிப்பது, எந்த விதத்திலும் குறைந்தது அல்ல... மாறாக, தமிழில் அறிவியல் படிப்பது, சிந்தனை வளத்தை ஊட்டுவதாக அமையும் என்பதை குறிக்கோளாகக் கொண்டு அறிவியல் தமிழ் அரங்கத்துக்கு ஏற்பாடு செய்துள்ளோம்' என்றார்.
வெவ்வேறு நாட்களில் நடைபெறும் இந்த அரங்கில், எலும்பு கட்டிகள் அறுவை சிகிச்சை தொடர்பாக, எம்.ஜி.ஆர்., மருத்துவப் பல்கலைக்கழக, துணைவேந்தர், மயில்வாகனன் நடராஜனும், தெற்காசிய கடலோரங்களில் பருவநிலை மாற்றம் ஏற்படுத்தியுள்ள சவால்கள் தொடர்பாக தெற்காசிய கடல் திட்ட, மண்டல ஒருங்கிணைப்பாளர் வெங்கடேசனும்,திராவிடவியல் ஆராய்ச்சியில் ஒருங்குறி மற்றும் இணையதள பங்களிப்பு குறித்து என்.கணேசனும் பேசுகிறார்கள்.
பெங்களூரு, இந்திய அறிவியல் கழகத்தின் பேராசிரியர் அருணன், ஐதராபாத், தேசிய புவி அமைப்பியல் ஆராய்ச்சி நிறுவன துணை இயக்குனர் பார்த்தசாரதி,ஸ்டான்போர்டு பல்கலைக்கழகத்தைச் சேர்ந்த ஆரோக்கியசாமி பால்ராஜ், மெல்போர்ன் பல்கலைக்கழகத்தைச் சேர்ந்த முத்துப்பாண்டியன் அசோக் குமார், கனடாவிலுள்ள மான்ட்ரியல் பல்கலைக்கழகத்தை சேர்ந்த ஆர்.கணேசன் உள்ளிட்டவர்களும் அரங்கில் பேசுகிறார்கள். இது அறிவியல் மற்றும் தமிழ் ஆராய்ச்சியாளர்களிடம் எதிர்பார்ப்பை உருவாக்கியுள்ளது.

ராம்