நான் பேங்காக்கில்(தாய்லாந்தில்) வசிக்கிறேன்

கேள்வி : நான் பேங்காக்கில்(தாய்லாந்தில்) வசிக்கிறேன். இங்கு நிறைய விபச்சாரிகள் இருக்கிறார்கள். அவர்களோடு என் கணவருக்கு நிறைய தொடர்பு உள்ளது. இந்த தொடர்பை நிறுத்த சொல்லி நான் எவ்வளவோ போராடுகிறேன். என் கணவர் கேட்க மறுக்கிறார். எனக்கு நான்கு குழந்தைகள் உண்டு. இந்நிலையில் நான் அவருடன் தொடர்ந்து வாழ வேண்டுமா..? அல்லது விவாகரத்து செய்யலாமா..? தகுந்த ஆலோசனையை எதிர்பார்க்கிறேன். .
அன்பின் சகோதரி! வாழ்வில் ஒவ்வாருவருக்கும் பல முனைகளிலிருந்து வௌ;வேறான சோதனைகள் தாக்குவது நாம் அறிந்ததே.. சோதனைகள் மாறுபடலாம். சோதனைகளே சந்திக்காத மனிதர்கள் யாரும் இல்லை. நாம் வாழ்வில் சோதனைகள் குறுக்கிடும் போது அதை நிதானமாகவும் உறுதியோடும் எதிர்கொள்ள வேண்டும். முற்றிலும் இறைவனை சார்ந்து நின்று அவனை மட்டுமே வணங்கி வழிபட்டு அவனிடம் மட்டுமே சரணாகதியாகி நம் மனக்குறைகளை முறையிடும் போது அவன் புறத்திலிருந்து மன ஆருதலும் எதிர்பாராத உதவிகளும் கிடைத்து விடும். இந்த நம்பிக்கையை ஆழமாக மனதில் பதிய வையுங்கள்.
உங்கள் பிரச்சனைக்குறிய தீர்வு இதுதான் என்று நாம் சொல்லவில்லை. நான்கு குழந்தைகளுக்கு தாயாகியுள்ள உங்கள் வாழ்விலிருந்து உங்கள் பிள்ளைகள் நிறைய பாடங்கள் படிக்க வேண்டியுள்ளது. நம்முடைய சில அவசரங்கள் அவர்களின் வாழ்வில் பாதிப்புகளை ஏற்படுத்தி விடக்கூடாது என்பதால் இந்த அறிவுரை.
பிரச்சனையை சந்திப்பவர்களுக்குதான் அதன் வலி தெரியும். உபதேசம் செய்பவர்களுக்கு எந்த வலியும் தெரிய வாய்ப்பில்லை. எனவே உங்களைப் போன்ற பெண்கள் சந்திக்கும் பிரச்சனைக்கு இஸ்லாம் என்ன தீர்வு சொல்லியுள்ளது என்பதையும் நீங்கள் தெரிந்துக் கொள்ள வேண்டும்.
கல்லாணாலும் கணவன், புல்லானாலும் புருஷன் என்ற ஆணாதிக்கத் தத்துவத்தை கூறி கணவன் படு மோசமானவனாக இருந்தாலும் மனiவி கடைசிவரை அவனுக்கு அடிபணிந்து - அடிமையாகி - தான் கிடக்க வேண்டும் என்று இஸ்லாம் எந்த இடத்திலும் சொல்லவில்லை.
திருமண வாழ்க்கையை ஒரு ஒப்பந்தமாக்கி கணவனும் மனைவியும் உடன் பட்டு வாழும்வரை ஒப்பந்தம் நீடிக்கலாம். உடன் பாடுகள் மாறுபட்டு முரண்பாடுகள் நிலைப்பெற துவங்கினால் - இனி சேர்ந்து வாழ்வதால் பிரயோஜனம் இல்லை என்ற நிலை வந்தால் - இருவரும் பிரிந்துக் கொள்ளலாம் என்று எளிமையான வழியை இஸ்லாம் காட்டியுள்ளது.
மனைவி கணவனுக்கு மாறுபட்டு நடந்தால் கணவன் அவளுக்கு விவாகரத்து - தலாக் - கொடுக்கலாம் என்ற உரிமையுண்டு.
அதே போன்று மனைவிக்கு கணவனை பிடிக்கவில்லை என்றால் (எந்த காரணத்திற்காகவும் மனைவிக்கு கணவனை பிடிக்காமல் போகலாம் அதையெல்லாம் இஸ்லாம் கருத்தில் எடுத்துக் கொள்ள வில்லை) ஊர் ஜமாஅத் பொறுப்புதாரிகளிடம் அதை அறிவித்து விட்டு கணவனிடமிருந்து பிரிந்து விடலாம் என்ற உரிமையை பெண்களுக்கு இஸ்லாம் வழங்கியுள்ளது.
ஆண்களின் உரிமையை தலாக் என்றும், பெண்களின் உரிமையை குலஃ என்றும் அரபு மொழி வழக்கில் சொல்வர்.
முஹம்மத் ஸல் அவர்களின் காலத்தில் திருமண வாழ்வில் இணைந்த பல முஸ்லிம் பெண்கள் தங்கள் கணவர்களிடமிருந்து குலஃ என்ற விவாகரத்தைப் பெற்றுள்ளதற்கு நிறைய சான்றுகள் உள்ளன.
கணவரிடமிருந்து கிடைக்கும் இல்லற சுகத்தில் போதிய திருப்தி பெறாத பெண்மணி ஒருவர் நபி ஸல் அவர்களிடம் இதை முறையிட்டு கணவரிடமிருந்து பிரிந்த சம்பவத்தை புகாரி, தாரகுத்னி, நஸயி ஆகிய நபிவழி தொகுப்புகளில் காணலாம்.
அடிமையாக இருந்த காலத்தில் மணம் முடித்துக் கொண்ட கணவன் மனைவி இருவரில் மனைவிக்கு மட்டும் விடுதலை, அதாவது சுதந்திரம் கிடைத்து விடுகிறது. சுதந்திரம் கிடைத்தப் பெண்கள் தங்கள் கணவர்கள் அடிமைகளாக இருந்தால் விரும்பினால் அவர்களோடு வாழலாம் விரும்பினால் அவர்களை விட்டு பிரிந்து விடலாம் என்ற உரிமையை இஸ்லாம் வழங்கியுள்ளது. இந்த ஒரு உரிமைக்காகவே அடிமையான தன் கணவரிடமிருந்து விவாக விடுதலைப் பெற்ற நபித்தோழியரும் இருக்கத்தான் செய்கிறார்கள். முஸ்லிம் என்ற நபிவழி தொகுப்பில் இந்த சம்பவத்தை காணலாம்.
எந்த ஒரு ஆத்மாவையும் அதன் சக்தியை தாண்டி இறைவன் நிர்பந்திக்க மாட்டான். (அல் குர்ஆன் 2:286)
உங்கள் கணவரின் விபச்சார போக்கு உங்களால் தாங்க முடியாத அளவுக்கு தொல்லைப் படுத்தக் கூடியதாக இருந்தால் இந்த வசன அடிப்படையில் அவரை விட்டு நீங்கள் பிரியலாம். கணவனில்லாத வாழ்க்கையை ஒரு சேலஞ்சாக எடுத்துக் கொண்டு இறை நெறி பிசகாமல் வாழ முடியும் என்ற உறுதி இருந்தால் நீங்கள் குலஃ செய்வது பற்றி எந்த ஆட்சேபனையும் இல்லை.

அறியத்தக்க தகவல் நண்பா நன்றி பகிர்வுக்கு