வழக்கறிஞர்கள் தமிழில் வாதாடுவதை எதிர்க்கவில்லை: உயர் நீதிமன்றம்

வழக்கறிஞர்கள் தமிழில் வாதாடுவதை எதிர்க்கவில்லை என்று தலைமை நீதிபதி எம்.ஒய். இக்பால், நீதிபதி டி. முருகேசன் ஆகியோர் அடங்கிய முதன்மை டிவிஷன் பெஞ்ச் தெரிவித்துள்ளது.

÷அதேநேரத்தில், இதுதொடர்பாக சுற்றறிக்கை அனுப்ப வேண்டும் என்ற கோரிக்கையை ஏற்க டிவிஷன் பெஞ்ச் மறுத்துவிட்டது. தமிழை வழக்கு மொழியாக்கக் கோரி மதுரை உயர் நீதிமன்ற கிளை, சென்னை உயர் நீதிமன்றம் ஆகியவற்றில் வழக்கறிஞர்கள் உண்ணாவிரதம் இருந்து வந்தனர். உரிய அனுமதியின்றி நீதிமன்ற வளாகங்களில் தங்கியிருப்பதாகக் கூறி அவர்களை அகற்ற போலீஸôருக்கு உத்தரவிடப்பட்டது.

÷இதையடுத்து, உண்ணாவிரதம் இருந்த வழக்கறிஞர்களை போலீஸôர் வெள்ளிக்கிழமை இரவு கைது செய்தனர். சில வழக்கறிஞர்கள் சிறையிலும் உண்ணாவிரதத்தைத் தொடர்ந்து வருகின்றனர்.

÷இந்த நிலையில், வழக்கறிஞர்களை சிறையிலிருந்து விடுதலை செய்யக் கோரி தலைமை நீதிபதி எம்.ஒய். இக்பால், நீதிபதி டி. முருகேசன் ஆகியோர் கொண்ட முதன்மை டிவிஷன் பெஞ்ச் முன்னிலையில் சில வழக்கறிஞர்கள் திங்கள்கிழமை முறையிட்டனர். அப்போது நடைபெற்ற விவாதம்:

வழக்கறிஞர் என்.ஜி.ஆர். பிரசாத்: கைது செய்யப்பட்டுள்ள வழக்கறிஞர்களில் 3 பேரின் உடல்நிலை மிகவும் மோசமாக உள்ளது. அவர்கள் விடுவிக்கப்படுவதால் பதற்றம் தணிவதோடு, வழக்கறிஞர்கள் தரப்பில் இருந்து நல்ல விதமான எதிர் நடவடிக்கையையும் எதிர்பார்க்கலாம்.

தலைமை நீதிபதி எம்.ஒய்.இக்பால்: நீதிமன்ற வளாகத்தில் ஒழுங்கு நிலவவேண்டும் என்பதில் மட்டுமே நாங்கள் அக்கறை கொண்டுள்ளோம். நீதிமன்றம் உங்களின் சொத்து. இதை நீங்கள்தான் காப்பாற்ற வேண்டும்.

நீதிபதி டி.முருகேசன்: வழக்கறிஞர்கள் தமிழில் வாதாடுவதைத் தடுக்க வேண்டாம் என்று அனைத்து நீதிபதிகளுக்கும் அறிவுறுத்தப்பட்டுள்ளது. வழக்கறிஞர்கள் தமிழில் வாதாடுவதை நாங்கள் எதிர்க்கவில்லை. இதற்கும் மேல் எங்களால் எதுவும் செய்ய முடியாது.

வழக்கறிஞர் சங்கரசுப்பு: தமிழில் வாதாடுவதை எதிர்க்கவில்லை என்பதை சுற்றறிக்கையாக அனுப்ப வேண்டும்.

தலைமை நீதிபதி எம்.ஒய்.இக்பால்: நீதிமன்ற வழக்கு மொழி தொடர்பாக நாங்கள் சுற்றறிக்கை எதுவும் தர முடியாது. இதுதொடர்பாக, அரசியல் சட்டம் எங்களுக்கு கட்டுப்பாடு விதித்துள்ளது. எனவே, வழக்கு மொழி தொடர்பாக எழுத்துப்பூர்வமாகவோ, சுற்றறிக்கையோ தர முடியாது.

நீதிபதி டி.முருகேசன்: தமிழில் வாதாடுவதை எதிர்க்கவில்லை என உயர் நீதிமன்ற முதன்மை டிவிஷன் பெஞ்ச் தெரிவிக்கிறது. உங்களுக்கு இதைவிட வேறு என்ன வேண்டும்?

வழக்கறிஞர் என்.ஜி.ஆர். பிரசாத்: இதே பிரச்னையில்தான் வழக்கறிஞர்கள் கைது செய்யப்பட்டுள்ளனர். அவர்களை விடுதலை செய்ய வேண்டும்.

நீதிபதி டி.முருகேசன்: நீதிமன்ற வளாகங்கள் நீதி வழங்கும் இடமாக மட்டுமே இருக்க வேண்டும் என்பது மட்டுமே எங்களது கவலை. வழக்கறிஞர்களை ஜாமீனில் விடுதலை செய்வது தொடர்பாக மனு தாக்கல் செய்தால், அவர்களை விடுதலை செய்து உத்தரவிடப்படும். அந்த மனுவில், நீதிமன்ற வளாகத்தில் இதுபோன்று உண்ணாவிரதப் போராட்டங்களில் ஈடுபடுவதில்லை என்ற உத்தரவாதமும் அளிக்க வேண்டும்.

வழக்கறிஞர் சங்கரசுப்பு: சிறையில் உள்ள வழக்கறிஞர்கள் சுயநினைவை இழந்துள்ளனர். ஜாமீன் மனு எதையும் தாக்கல் செய்ய வேண்டாம் என்றும் அவர்கள் முடிவு செய்துள்ளனர்.

நீதிபதி டி.முருகேசன்: இதுதொடர்பாக மனு தாக்கல் செய்யாமல் அவர்களை ஜாமீனில் விடுவிக்க முடியாது.

÷இதையடுத்து விவாதம் முடிவுக்கு வந்தது.