லீக் சுற்றில் கேமரூன் அணி வெளியேற்றம்

உலக கிண்ண காற்பந்து போட்டிகளில் நேற்றைய சனிக்கிழமை (ஜூன் 19) ஆட்டத்தில், ஒட்டுமொத்த ஆபிரிக்க கண்டத்தின் ஆதரவு கரகோசத்திலும், போராடி தோற்றுப்போனது கெமரூண் அணி! டென்மார்குடனான இப்போட்டியில் 2-1 என்ற நிலையில் வீழ்ந்தது கெமரூன்!
இம்முறை போட்டிகளை நடத்தும் தென்னாபிரிக்காவும், அடுத்த சுற்றுக்கு தெரிவாகாது என முடிவாகிப்போக, கானா மட்டுமே குழு B யில் முன்னிலை வகித்து அடுத்த சுற்றுக்கு தெரிவாகும் ஆபிரிக்க நாடாக இருக்கிறது.கானாவுடன் சேர்ந்து இருண்ட கண்டத்துக்கு ஒளிகொடுக்கும் என ரசிகர்களினால் பெரிதும் எதிர்பார்க்கப்பட்டது கெமரூன் தான்! நேற்றைய போட்டியில் வெற்றிபெற்றே ஆக வேண்டும் என்ற கட்டாய நிலையில், முதல் போட்டியில் ஜப்பானுடன் தோற்றுப்போன அணியில்லாது, உற்சாகமாக புதிய களமுனை அமைத்துக்கொண்டு களமிறங்கியது கெமரூன்.

போட்டி தொடங்கி 10 வது நிமிடத்தில், டென்மார்க் கோல் போஸ்ட் அருகில் அவர்களிடமே இலாவகமாக பந்தை குறிக்கிட்டு பறித்த கெமரூன் வீரர்களில் ஒருவர் பந்தை மெல்ல எடோவிடம் தட்டிக்கொடுக்க, வாங்கிய கணத்தில் அதிரடி கோல் அடித்தார் அவர்.

சளைக்காத டென்மார்க் அணி, 33 வது நிமிடத்தில் பெண்ட்னெரின், வேகமான அடியினால் கோல் அடித்து 1:1 என சமநிலை ஆக்கினர்.!

இரண்டாவது பாதி ஆட்டத்தில் கெமரூன் தன் பக்கமே அதிக நேரம் பந்தினை தக்கவைத்துக்கொண்டனர். ஆஃப் சைட் தவிர்க்கும் யுக்தியையும் கையாண்டனர். எனினும் 60 வது நிமிடத்தில் எதேர்ச்சையாக கிடைத்த பந்தினை , தமது கோல் போஸ்ட்டினை நோக்கி வேகமாக எடுத்துச்சென்ற ரொம்மெடஹ்ல் தானே கோல் போட்டும் அசத்தினர்.

டென்மார்க்கின் விளையாட்டில் அனுபவம் தெரிந்தது. கெமரூன் அணியினரின் உற்சாகமான வேகமான விளையாட்டில் கதி களங்கிப்போகாமல், தமக்கு கிடைக்கும் சிறிய வாய்ப்பிலும், பதற்றமில்லாமல் பந்தினை கடத்திச்சென்றிருந்தமைதான் டென்மார்க்கிற்கு வெற்றியை தந்துள்ளது.
ஆட்டம் முடிவடையும் வரை, கோல் அடிக்க கெமரூன் அணி, தொடர்ந்து எத்தனையோ முயற்சி செய்தும், அவ்வளவு வாய்ப்பும் கைநழுவிப்போனது. இதில் கெமரூனின் மொஹமடு இட்ரிஸியோவிற்கே மூன்று வாய்ப்புக்கள் கிடைத்திருந்தது.

எவ்வாறெனினும், இன்றைய போட்டியில் தோல்வி அடைந்ததால், ரசிகர்களுக்கும் பெரும் ஏமாற்றம் அளித்து உலக கிண்ண போட்டிகளில் இருந்து நீங்கியுள்ளது கெமரூன்.