பீதியை கிளப்பாதீங்க...புதுமுக நடிகை கெஞ்சல்!

மகள்களை கங்காரு போலவே மடியில் சுமப்பார்கள் அம்மா நடிகைகள்! வாரிசுகளின் வரவுகளை வைத்து படமெடுக்கிற இயக்குனர்கள் இது மாதிரி அம்மாக்களின் மடியிலிருந்து மகளை இறக்குவதற்குள் குடைசாய்ந்து போவார்கள். காதல் சொல்ல வந்தேன் பட நாயகி மேக்னா சுந்தரும் ஒரு நடிகையின் மகள்தான். அந்த காலத்தில் வைதேகி காத்திருந்தாள் படத்தில் விஜயகாந்துடன் நடித்த பிரமிளாவின் மகள். ஆனால் இப்படத்தின் ஆடியோ வெளியீட்டு விழாவுக்கு அப்பா சுந்தருடன் வந்திருந்தார்.



விழாவில் பேசிய அத்தனை பேரும் இவரை இன்னொரு நயன்தாரா என்று பாராட்டியது அவருக்கு தனி அனுபவத்தை தந்திருக்கலாம். கா.சொ.வ படத்தின் இயக்குனர் பல வெற்றிப்படங்களை தந்த பூபதி பாண்டியன். முந்தைய படங்களில் எல்லாம் பெரிய ஹீரோக்களை வைத்து படமெடுத்தவர் இந்த படத்தில் மட்டும் ஏன் பெயர் தெரியாத கூட்டணியோடு போட்டியில் குதித்தார்? கேட்டால், நான் தேவதையை கண்டேன் படத்தை இயக்கும்போது தனுஷ் கூட கிட்டதட்ட புதுமுகம்தான் என்றார். இந்த படத்தின் ஹீரோ பாலாஜியை பார்த்தாலும் தனுஷின் சாயல் இருக்கும். பல வருஷங்களாக என் மனதில் இருந்த கதைதான் இது. நானும் என் சந்தியாவும் என்று முதலில் டைட்டில் வச்சுருந்தேன். அப்புறம் எல்லாரும் அது மாதிரியே டைட்டில் வச்சதும் நான் கொஞ்சம் மாத்திகிட்டேன். வழக்கமாக எல்லாரும் டச் பண்ணுகிற காதல் கதைதான் இது என்றாலும், திரைக்கதை வேறு மாதிரியா இருக்கும். அதுமட்டுமில்ல, என்னோட காமெடி ஸ்டைல் படம் முழுக்க ரசிகர்களை சிரிக்க வச்சுகிட்டேயிருக்கும் என்றார் பூபதி பாண்டியன்.

கடைசியாக மேக்னாவிடம் கேட்டேவிட்டோம்... நீங்க நயன்தாராவுக்கு போட்டியாதான் வந்திருக்கீங்களா என்று! ஐயய்யோ, அவங்க எங்க. நான் எங்க. அவங்கள மாதிரி நான் இருக்கேன்னு சொன்னது பெருமைதான். அதுக்காக போட்டின்னு சொல்லி பீதிய கிளப்பாதீங்க என்றார் மேக்னா. பொழச்சிப்பாரு...