சிறுவர் துஷ்பிரயோகம்; மருத்துவர் தெரிவித்த அதிர்ச்சித் தகவல்

by ரபீக் Thu Jun 17, 2010 5:39 pm

10 வயதிற்கு உட்பட்ட 6 சிறுமிகள் தமது வைத்தியசாலைக்கு அண்மையில் கொண்டு வரப்பட்டதாகவும் அவர்கள் யாவரும் தகப்பன் மாரால் வல்லுறவுக்குட்படுத்தப்பட்டவர்கள் என்றும் இலங்கையைச் சேர்ந்த டாக்டர் ஒருவர் இந்த அதிர்ச்சியான தகவலைத் தெரிவித்திருக்கிறார்.

சிறுவர் துஷ்பிரயோகம் தொடர்பாக பாதுகாப்பான இடம் என்று குடும்பத்தின் வீட்டைக்கூட கருதமுடியாத நிலைமை உள்ளதாக அவர் கூறியுள்ளார்.சிறுவர் துஷ்பிரயோகம், பாலியல் இம்சை, போதைப்பொருள் பாவனை தொடர்பாக மாரவிலவில் நேற்று முன்தினம் செவ்வாய்க்கிழமை (ஜூன் 15) இடம்பெற்ற மாநாட்டின் போதே டாக்டர் எச்.எம்.பி.ஹேரத் இதனைத் தெரிவித்ததாக யூ.சி.ஏ.நியூஸ்.கொம் இணையத்தளத்தை மேற்கோள்காட்டி காத் நியூஸ் செய்திச் சேவை தெரிவித்திருக்கிறது.

"போதைப் பொருட்கள், மதுபானம், மக்கள் தமது பொறுப்புகளையும் மதங்களையும் கைவிடுதல் என்பன பாவங்களை குவிக்கின்றன” என்று இந்த மாநாட்டில் பங்குக்குருவான அருட்தந்தை பீலிக்ஸ் கொலம்பகே கூறியுள்ளார்.

இலங்கையில் போர்ச் சூழ்நிலை பங்களிப்பைச் செலுத்தியதாகவும் குரூரத்தனம், ஊழல் என்பன மனங்களை ஆக்கிரமித்ததாகவும் அவர் மேலும் கூறியுள்ளார். வீடுகளில் பிள்ளைகளை விட்டு விட்டு பெற்றோர் வேலைக்குச் செல்கின்ற நிலைமையும் பல தாய்மார்கள் மத்திய கிழக்கு பகுதிக்கு வீட்டு வேலைக்காகச் செல்வது இந்த நிலைமைக்குப் பங்களிப்பு செய்வதாக தெரிவிக்கப்பட்டுள்ளது.

இந்தப் பின்னணியில் மாரவில போன்ற கரையோரப் பகுதிகளில் போதைப் பொருள், மதுபாவனை அதிகரித்துள்ளது.இந்த விடயங்கள் தொடர்பாக பெற்றோர் போதிய அறிவு இல்லாதவர்களாக காணப்படுவதாக நன்னடத்தை அதிகாரி காந்தி அசோகா கூறியுள்ளார். கரையோர நகரங்களில் போதைப் பொருள் பாவனை அதிக மட்டத்திலிருப்பதை அவர் உறுதிப்படுத்தியுள்ளார். "பெற்றோர் தமது வாழ்க்கை முறைமையை மாற்றிக்கொள்வது முன்னுதாரணமாக அமையும். மது அருந்துவது, சிகரெட் புகைப்பது, ஒழுக்கக் கேடான நடத்தை என்பன நல்ல பழக்கங்கள் அல்ல என்பது குறித்து பிள்ளைகளுக்குக் கற்பிக்கவேண்டும் என்று அவர் கூறியுள்ளார்.

புனித மேரி முதியோர் இல்லம் இந்த மாநாட்டை ஏற்பாடு செய்திருந்தது. “சிறுவர் துஷ்பிரயோகம், பாலியல் இம்சை, போதைப்பொருள் துஷ்பிரயோகம் என்பன இலங்கை சமூகத்தை அழுத்தத்திற்குள்ளாக்கும் பிரச்சினைகளாகும். இவற்றுக்குத் தீர்வு காணப்படவேண்டியது அவசியம்%27 என்று புனித மேரி முதியோர் சங்கத் தலைவர் தயானந்த வெதமுல்ல கூறியுள்ளார்.