மகள் திருமணம் நின்றது காயத்துடன் தப்பிய தாய் கண்ணீர்

by ரபீக் Thu Jun 17, 2010 12:49 pm

பாலக்கோடு அருகே நடந்த திருமண கோஷ்டியினர் சென்ற மினி லாரி விபத்தாகி 18 பேர் பலியானார்கள். 43 பேர் படுகாயம் அடைந்துள்ளனர். இவர்களில் மணப்பெண் நித்தியாவின் தாய் சுகந்தி மற்றும் கவிதா, சுதா, மணிவண்ணன், ராதா, மற்றொருவர் ஆகிய 6 பேர் சேலத்தில் உள்ள ஒரு தனியார் ஆஸ்பத்திரியில் சேர்க்கப்பட்டு உள்ளனர்.

மணமகளின் தாய் சுகந்தி, மாலைமலர் நிருபரிடம் கூறியதாவது:-

எனது மகள் நித்யா, ஆசிரியர் பயிற்சி முடித்துள்ளாள். அவளுக்கு இன்று திருமணம் நடப்பதாக இருந்தது. நாங்கள் 60 பேர் லாரியில் மாப்பிள்ளை வீட்டிற்கு புறப்பட்டோம். 7 பேர் டிரைவர் சீட் அருகில் உட் கார்ந்திருந்தோம்.

இரவு 9-30 மணியளவில் கர்த்தாரப்பட்டியில் உள்ள ஒரு தனியார் பள்ளி அருகே சென்று கொண்டிருந்தோம். அப்போது டமார் என்று சத்தம் கேட்டது. என்ன நடந்தது என்று உணருவதற்குள் லாரி கவிழ்ந்து நாங்கள் விபத்தில் சிக்கி மயங்கி விழுந்தோம்.

பின்னர் என்ன நடந்தது என்று தெரியவில்லை. இன்று காலையில் தான் விபத்து நடந்தது பற்றி தெரியவந்தது.
இவ்வாறு அவர் கண்ணீருடன் கூறினார்.