இன்று டெல்லி மேல்-சபை தேர்தல்: ஒரிசாவில் காங்-பா.ஜனதா எம்.எல்.ஏ.க்கள் கடத்தல்

ஒரிசா மாநிலத்தில் டெல்லி மேல்-சபை தேர்தல் இன்று நடக்கிறது. இந்த நிலையில் அங்கு எதிர்க்கட்சிகளான காங்கிரஸ், பாரதீய ஜனதா எம்.எல்.ஏ.க்கள் 2 பேர் கடத்தப்பட்டுள்ளனர். காங்கிரஸ் கட்சியைச் சேர்ந்த லஞ்ஜிகார் தொகுதி எம்.எல்.ஏ. ஷிபாஜி மஜி காணாமல் போய் விட்டார். அவரை கடத்திச் சென்று விட்டதாக புகார் கூறப்பட்டுள்ளது.

இதே போல் பாரதீய ஜனதா எம்.எல்.ஏ. பீம்சென் சவுத்திரியும் கடத்தப்பட்டார். இவரை ஆளும் பிஜு ஜனதா தளம் கட்சி கடத்திச் சென்று விட்டதாக பாரதீய ஜனதா குற்றம் சாட்டி உள்ளது.

எம்.எல்.ஏ.க்கள் மாயமானது குறித்து அவர்களது குடும்பத்தினர் யாரும் இதுவரை போலீசில் புகார் செய்யவில்லை.

காங்கிரஸ் எம்.எல்.ஏ. மஜியின் கார் டிரைவர் கூறுகையில், கடந்த 14-ந் தேதி புவனேஸ்வரில் இருந்து காரில் வந்து கொண்டு இருந்தபோது குர்தா என்ற இடத்தில் பெட்ரோல் பங்க் அருகில் 2 பேர் தடுத்து நிறுத்தினார்கள். அவர்கள் எம்.எல்.ஏ.வை அங்குள்ள ஓய்வு அறைக்கு அழைத்துச் சென்றனர். பின்னர் தாங்கள் வந்த காரில் எம்.எல்.ஏ.வை அழைத்துச் சென்று விட்டனர். அதன் பிறகு அவரை கண்டு பிடிக்க முடியவில்லை என்றார்.

மாநில காங்கிரஸ் தலைவர் பக்தசரண் எம்.பி. கூறுகையில், காங்கிரஸ் எம்.எல்.ஏ. மஜியை மாநில முதல்-மந்திரி நவீன்பட் நாயக் உத்தரவின் பேரில் பிஜு ஜனதாதளம் கட்சியினர் கடத்தி வைத்துள்ளனர். அவர்கள் கட்சி வேட்பாளர் வெற்றிக்காக கடத்தல் நாடகத்தை அரங்கேற்றியுள்ளனர் என்றார்.