அன்வார்: போதிய எண்ணிக்கை என் வசமுள்ளது

by **சிவா** Tue Oct 07, 2008 11:07 pm

மலேசியாஇன்று

* இன்றிரவு பக்காத்தான் கூடுகிறது
* நீதிமன்றத்தில் ஒரு சிறிய வெற்றி

அரசாங்கத்தை கவிழ்ப்பதற்கு தமக்குப் போதிய ஆதரவு உள்ளதாகவும் சுணங்கியுள்ள இந்த திட்டத்தை எவ்வாறு மேற்கொள்வது என்பது குறித்து தாம் பேச்சுக்கள் நடத்தி வருவதாகவும் மாற்றரசுக் கட்சித் தலைவர் அன்வார் இப்ராகிம் இன்று கூறியுள்ளார்.

ஆளும் கூட்டணியில் நிகழவிருக்கும் அதிகார மாற்றத்தை அன்வார் நிராகரித்துள்ளார். அது மக்களின் ஆதரவை பெறத் தவறுவதுடன், ஊழல் மலிந்துள்ள நிருவாகத்தில் எந்த சீர்திருத்தங்களையும் கொண்டு வராது.

கடந்த மாதம் ஆளும் கூட்டணியைச் சேர்ந்த 31க்கும் மேற்பட்ட நாடாளுமன்ற உறுப்பினர்கள், கட்சி மாறுவதற்கு தயாராக இருப்பதாக அன்வார் கூறினார். அதிகார ஒப்படைப்பு குறித்து பேச்சுக்கள் நடத்துவதற்கு இணங்கும்படி பிரதமர் அப்துல்லா அகமட் படாவியையும் அவர் கேட்டுக் கொண்டார். ஆனால் அப்துல்லா மறுத்துவிட்டார்.

நாட்டின் அரைநூற்றாண்டு கால வரலாற்றில், முதலாவது அரசாங்க மாற்றத்தை கொண்டு வருவது, ஒரு கடினமான செயல். இதற்கு சில காலமாகலாம் என்றும் அன்வார் கூறினார்.

“இனவாதத்தையும் ஊழலையும் துடைத்தொழிப்பதில் மாற்றம் காணவிரும்பும் மலேசியர்கள் காட்டியுள்ள ஆர்வம் மகிழ்ச்சி அளிக்கிறது,” என்றாரவர்.

தமது திட்டங்கள் சுணங்கியுள்ள போதிலும், “அந்த 31 நாடாளுமன்ற உறுப்பினர்களும் தங்களது ஆதரவை எனக்குத் தொடர்ந்து வழங்கி வருவதுடன் அதிலிருந்து பின்வாங்கவில்லை” என்றும் அவர் கூறினார்.