உலகத் தலைநகரங்கள்- இஸ்லாமாபாத்!

by **சிவா** Wed Jun 16, 2010 3:20 pm

இந்தியாவிலிருந்து பிரிந்து `தனிக்குடித்தனம்' போன பாகிஸ்தானுக்கு புதிய தலைநகரமாக உருவாக்கப்பட்டது, இஸ்லாமாபாத்.

முறையாகத் திட்டமிட்டு உருவாக்கப்பட்ட நகரம் என்பதால், நேரான, சீரான சாலைகளும், பசுமைப் பூங்காக்களும் இம்மாநகரின் அடையாளமாகத் திகழ்கின்றன. கட்டிடக் கலைச் சிறப்புக்குப் பெயர் பெற்ற கட்டிடங்களுக்கும் குறைவில்லை. உலகிலேயே 6-வது பெரிய மசூதியான பைசல் மசூதி இங்கு அமைந்துள்ளது.

தெற்காசியாவிலேயே மிகவும் பசுமையான, முறையாகத் திட்டமிட்டு அமைக்கப்பட்ட நகரங்களுள் ஒன்றாக இஸ்லாமாபாத் விளங்குகிறது. பாகிஸ்தானிலேயே தூய்மையான நகரமும் இதுதான்.

1947-ம் ஆண்டு பாகிஸ்தான் சுதந்திரம் பெற்றபோது கராச்சிதான் அதன் தலைநகரமாக இருந்தது. 1960-ம் ஆண்டில், ஒரு முற்போக்குத் தலைநகரமாக இஸ்லாமாபாத் உருவாக்கப்பட்டது.

பொதுவாகவே பாகிஸ்தானில் ஆங்கிலேயே ஆட்சி மையமான கராச்சியைச் சுற்றியே மேம்பாடு இருந்தது வந்தது. வளர்ச்சியானது நாடெங்கும் சரிசமமாக இருக்க வேண்டும் என்று நினைத்த அதிபர் அïப்கான், புதிய தலைநகரை உருவாக்க நினைத்தார்.

தவிர, கராச்சியானது பாகிஸ்தானின் ஒரு முனையில், அரபிக் கடல் வாயிலாக எதிரி நாடுகளின் தாக்குதலுக்கு உள்ளாகக்கூடிய அபாயத்தில் இருந்தது. நாட்டு மக்கள் அனைவரும் எளிதில் சென்றடையக்கூடிய வகையில் தலைநகரம் இருக்க வேண்டும் என்றும் கருதப்பட்டது.

அதன்படி, புதிய தேசியத் தலைநகருக்கான இடத்தைத் தேர்வு செய்வதற்கு 1958-ம் ஆண்டில் ஓர் ஆணையம் அமைக்கப்பட்டது. அமைவிடம், காலநிலை, போக்குவரத்து வாய்ப்புகள், பாதுகாப்புத் தேவைகள் ஆகிய அனைத்தையும் கருத்தில் கொண்டு தீவிரமான ஆய்வுக்குப் பிறகு புதிய தலைநகரத்துக்கான இடம் தேர்வு செய்யப்பட்டது. அது, பாகிஸ்தான் ராணுவத் தலைமையகமான ராவல்பிண்டிக்கும், வடக்கே உள்ள காஷ்மீருக்கும் அருகில் இருந்தது.

ஒரு கிரேக்க வடிவமைப்பாளர் குழு, இஸ்லாமாபாத்துக்கான `மாஸ்டர் பிளானை' உருவாக்கிக் கொடுத்தது. அது முக்கோண வடிவில் இருந்தது. கராச்சியில் இருந்து நேரடியாக இஸ்லாமாபாத்துக்கு தலைநகரம் மாற்றப்படவில்லை. அது முதலில் ராவல்பிண்டிக்கு தற்காலிகமாக மாற்றப்பட்டது. பணிகள் முடிவடைந்ததும் இஸ்லாமாபாத்துக்கு மாற்றப்பட்டது.

இஸ்லாமாபாத் அமைந்திருக்குமë போத்தோகார் பீடபூமி, ஆசியாவில் மிகப் பழமையான மனித குடியேற்றப் பகுதியாகும். இங்கு கிடைத்த சில பொருட்கள் 5 லட்சம் முதல் 10 லட்சம் ஆண்டுகளுக்கு முந்தையவை என்பதில் இருந்து இதன் பழமை புரியும்.

பிற உலகத் தலைநகரங்களுக்கு உரிய பரபரப்பும், நெரிசலும் இல்லாமல் அமைதியாகக் காணப்படுவது, இஸ்லாமாபாத்தின் தனித்தன்மையும், தனிச்சிறப்பும் ஆகும்!