மலேசியாவில் இந்தியர் சுடப்பட்டுக் கொலை

**சிவா** · **சிவா** Sun Jun 13, 2010 10:05 pm

கோலாலம்பூர் : மலேசியாவில், இந்தியாவைச் சேர்ந்த ஓர் ஓட்டல் பணியாளர், அடையாளம் தெரியாத நபரால் சுட்டுக் கொல்லப்பட்டார். மலேசியத் தலைநகர் கோலாலம்பூர் புறநகர்ப் பகுதியான கோட்டா டமன்சாராவில் உள்ள ஒரு தனியார் உணவு விடுதியில், இந்தியரான டாஷ் என்பவர் ஊழியராகப் பணியாற்றி வந்தார்.

கடந்த வெள்ளிக்கிழமை இரவு அன்று, தன் பணியை முடித்த டாஷ், உணவு விடுதிக்கருகில் உள்ள பணியாளர்கள் தங்கும் விடுதிக்குச் செல்வதற்காக, உணவு விடுதியிலிருந்து வெளியில் வந்தார்.அப்போது, அடையாளம் தெரியாத நபர் ஒருவர் அவரின் வயிற்றுப் பகுதியில் சுட்டார். அச்சமயம், உணவு விடுதியில் இருந்த அத்தனை பேரும், தென்னாப்ரிக்காவில் நடந்து வரும் கால்பந்து போட்டியை "டிவி'யில் பார்த்துக் கொண்டிருந்தனர். துப்பாக்கிச் சத்தம் கேட்டதும், அனைவரும் திடுக்கிட்டனர். இதற்குள், துப்பாக்கியால் சுட்ட நபர், வேகமாக ஓடி சாலையைக் கடந்து அங்கு நின்று கொண்டிருந்த காரில் ஏறித் தப்பிச் சென்று விட்டார்.

இத்தகவலை வெளியிட்ட அப்பகுதி போலீசார், உணவு விடுதியில் பொருத்தப்பட்டிருந்த சி.சி.டி.வி., கேமரா மூலம், கொலைச் சம்பவம் எப்படி நடந்தது என்பதைக் கண்டறிந்துள்ளனர். கேமரா காட்சியில், கறுப்புக் கால்சட்டையும், நீல மேல்சட்டையும், ஹெல்மெட்டும் அணிந்திருந்த ஒரு நபர், டாஷை நெருங்கி வந்து ஓரடி தொலைவில் நின்று, துப்பாக்கியால் சுட்டது பதிவாகியுள்ளது. பழிக்குப்பழி வாங்கும் நடவடிக்கையாகஇச்செயல் இருக்கக் கூடும் என்று போலீசார் தெரிவித்துள்ளனர். இக் கொலைச் சம்பவம் குறித்து விசாரணை நடந்து வருகிறது.