பிரபாகரன் தாயார் தமிழகத்தில் சிகிச்சை பெற நிபந்தனைகள் தளர்வு

ரபீக் · ரபீக் Sat Jun 12, 2010 10:55 am

விடுதலைப் புலிகள் இயக்கத்தின் தலைவர் பிரபாகரனின் தாயார் பார்வதி அம்மாள் தமிழகத்தில் தங்கி சிகிச்சை பெறுவதற்கான நிபந்தனைகளை தமிழக அரசின் ஒப்புதலுடன் மத்திய அரசு தளர்த்தி உள்ளது.

இதுதொடர்பாக தமிழக அரசு வெள்ளிக்கிழமை வெளியிட்ட செய்தி:

தமிழகத்தில் சிகிச்சை பெற பார்வதி அம்மாளுக்கு சில நிபந்தனைகளின் பேரில் மத்திய அரசு அனுமதி கொடுத்து மே 7-ம் தேதி கடிதம் அனுப்பியது.

மருத்துவ சிகிச்சைக்காக மட்டுமே தமிழகம் வர வேண்டும், மருத்துவமனையில்தான் தங்கவேண்டும், அரசு மருத்துவமனையில் சிகிச்சை பெற விரும்பினால் தேவையான உதவிகளை தமிழக அரசே செய்ய வேண்டும், எந்த அரசியல் கட்சியினருடனோ குறிப்பாக தடை செய்யப்பட்ட இயக்கங்களுடன் பங்கு வைத்திருப்பவர்களுடனோ தொடர்பு வைத்துக் கொள்ளக் கூடாது, பெயர் குறிப்பிடப்பட்ட உறவினர்களோடு மட்டுமே தொடர்பு வைத்துக் கொள்ளலாம் என்பவை நிபந்தனைகளாகத் தெரிவிக்கப்பட்டிருந்தன.

இதன்பிறகு பார்வதி அம்மாள் சென்னை வராமல் இலங்கை சென்றுவிட்டார். அவரின் உடல்நிலை கருதியும், தனது மகளின் இல்லத்தில் தங்கி சிகிச்சை பெற பார்வதி அம்மாள் விரும்புகிறார் என்பதை மனதில் கொண்டும், ஏற்கெனவே விதித்த நிபந்தனையை தளர்த்தி தனது மகளின் இல்லத்தில் தங்கி சிகிச்சை பெற அனுமதிக்கலாமா என்றும், அவரின் உறவினர்களும் நண்பர்களும் அவரைச் சந்திக்க அனுமதிக்கலாமா என்றும் கேட்டு மத்திய அரசு மே 18-ல் தமிழக அரசுக்குக் கடிதம் எழுதியது.

பார்வதி அம்மாள் தனது மகள் இல்லத்தில் சிகிச்சை பெறுவதில் தமிழக அரசுக்கு ஆட்சேபம் இல்லை என்றும், அவரை, அவரது நண்பர்கள் சந்திப்பது பற்றி மத்திய அரசே முடிவு எடுக்கலாம் என்றும் மே 20-ல் தமிழக அரசு பதில் அனுப்பியது.

இதைத் தொடர்ந்து மத்திய அரசு இலங்கையில் உள்ள இந்திய தூதருக்கும் தமிழக அரசுக்கும் கடிதம் அனுப்பியுள்ளது.

பார்வதி அம்மாள் தனது மகள் இல்லத்தில் தங்கலாம் என்றும், அவரின் நண்பர்களும், உறவினர்களும் சந்திக்கலாம் என்றும் அதில் தெரிவிக்கப்பட்டுள்ளது. ஆனால் அரசியல் கட்சிகளின் பிரதிநிதிகள் அவரைச் சந்திக்க அனுமதி இல்லை என்றும் அதில் தெரிவிக்கப்பட்டுள்ளது.

இதுகுறித்து பார்வதி அம்மாளின் கருத்து அறிந்து மேல் நடவடிக்கை எடுக்கப்படும் என்று தமிழக அரசு அறிவித்துள்ளது.