பெண் வேடமிட்டு மருத்துவர்களை கையும் களவுமாக பிடித்த அதிகாரி

by ரபீக் Sat Jun 12, 2010 10:37 am

கோவை மாவட்டம் பொள்ளாச்சி அரசு மருத்துவமனையில் நோயாளிகள் அவதிக்கு ஆளாவதாகவும், ஊழியர்கள் லஞ்சம் கேட்டு டார்ச்சர் செய்வதாகவும் புகார்கள் வந்தன. இந்நிலையில், மருத்துவம் மற்றும் ஊரக நலப்பணி துறை கூடுதல் இயக்குனர் புருஷோத்தம் விஜயகுமார் மற்றும் 2 கண்காணிப்பாளர்கள், 8 உதவியாளர்கள் கொண்ட குழுவினர் இன்று காலை மருத்துவமனையில் அதிரடி ரெய்டு நடத்தினர்.
கூடுதல் இயக்குனர் புருசோத்தம் விஜயகுமார், பெண் வேடத்தில் முக்காடு போட்டபடி தலைமை மருத்துவர் அறைக்கு சென்று அங்கு நடப்பதை ரகசியமாக கண்காணித்தார். சில டாக்டர்கள் வெகுநேரமாக அங்கேயே அரட்டை அடித்துக் கொண்டிருந்ததை பார்த்தார்.

கண்காணிப்பாளர்கள் இருவர் தலைமையில் வந்திருந்த 8 உதவியாளர்களும் லுங்கி அணிந்து நோயாளிகள்போல வந்து டோக்கன் பெற கியூவில் நின்றனர். ஆஸ்பத்திரி ஊழியர்கள் டோக்கன் வழங்க ரூ.10, ரூ.20 என பணம் வசூலிப்பது தெரியவந்தது. அனைவரும் கையும் களவுமாய் சிக்கினர்.

ரெய்டுக்கு பிறகு நிருபர்களிடம் கூடுதல் இயக்குனர் புருஷோத்தம் விஜயகுமார் கூறியதாவது:

சுகாதார துறை அமைச்சர் பன்னீர்செல்வம் உத்தரவின்பேரில் கடந்த 7&ம் தேதி முதல் தமிழகம் முழுவதும் அரசு மருத்துவமனைகளில் திடீர் ரெய்டு நடத்தி வருகிறோம். ஸ்ரீபெரும்புதூர், திருச்செங்கோடு, சங்ககிரி, குமா£ரபாளையம், பவானி உள்ளிட்ட அரசு மருத்துவ மனைகளில் மாறுவேடத்தில் சோதனை நடத்தப்பட்டது. பொள்ளாச்சி அரசு மருத்துவமனையில் இன்று சோதனை நடத்தினோம்.

மருந்து, டோக்கன் வழங்கும் இடம், கட்டுகட்டும் பிரிவு போன்றவற்றில் நோயாளிகளிடம் ஊழியர்கள் பணம் பெற்றது தெரியவந்தது. ரூ.300 பறிமுதல் செய்யப்பட்டது. சிறிய தொகைதான் என்றாலும் நோயாளிகளிடம் லஞ்சம் பெறுவது குற்றமாகும். இது தொடர்பாக 4 ஊழியர்கள், நர்ஸ் உள்பட 6 பேர் சஸ்பெண்ட் செய்யப்பட்டுள்ளனர். சரியான நேரத்துக்கு வேலைக்கு வராத டாக்டர்கள் மீதும் துறை ரீதியான நடவடிக்கை எடுக்கப்படும். இந்த ரெய்டு தொடர்ந்து நடக்கும்.

பெண் வேடத்தில் அதிகாரி ரெய்டு நடத்தியது, மருத்துவமனையில் பரபரப்பை ஏற்படுத்தியது.