ராஜபக்சேவுக்கு ராஜ வரவேற்பு!:தமிழக எம்.பிக்கள் இன்று சந்திப்பு

by ரபீக் Wed Jun 09, 2010 12:56 pm

தமிழகத்தைச் சேர்ந்த திமுக கூட்டணியைச் சேர்ந்த திமுக, காங்கிரஸ் மற்றும் விடுதலைச் சிறுத்தைகள் கட்சியின் எம்.பிக்கள் குழு இன்று டெல்லியில் ராஜபக்சேவை சந்திக்கவுள்ளது.

முகாம்களில் இன்னமும் அடைக்கப்பட்டிருக்கும் 80,000க்கும் மேற்பட்ட தமிழர்களை விடுவிக்க விரைவான நடவடிக்கைகளை எடுக்குமாறு ராஜபக்சேவை இவர்கள் வலியுறுத்தவுள்ளனர்.

இந்தியாவுக்கு வரும் இலங்கை அதிபரை தமிழகத்தைச் சேர்ந்த அரசியல் குழு ஒன்று சந்திப்பது இதுவே முதல் முறையாகும். இதற்கு முன்பு திமுக கூட்டணி எம்.பிக்கள் இலங்கை சென்று பாதிக்கப்பட்ட தமிழர்களை சந்தித்து, பின்னர் ராஜபக்சேவையும் சந்தித்து விட்டு வந்தனர் என்பது குறிப்பிடத்தக்கது.

டி.ஆர்.பாலு தலைமையிலான இக்குழுவில் தமிழகத்தைச் சேர்ந்த திமுக, காங்கிரஸ், விடுதலைச் சிறுத்தைகள் கட்சிகளின் எம்.பிக்கள் இடம் பெற்றுள்ளனர். தொல். திருமாவளவனும் இந்தக் குழுவில் இடம் பெறுகிறார்.

சந்திப்பு குறித்து பாலு கூறுகையில், புதன்கிழமை ராஜபக்சேவை சந்தித்து 80,000 தமிழர்களின் விரைவான மறுகுடியேற்றம் மற்றும் மறுவாழ்வு நடவடிககைகளை விரைவுபடுத்துமாறு கேட்டுக்கொள்ளவுள்ளோம் என்றார்.

முதல்வர் கருணாநிதியின் உத்தரவுப்படி தமிழக எம்.பிக்கள் குழு ராஜபக்சேவை சந்திக்கவுள்ளது குறிப்பிடத்தக்கது.

டெல்லி வந்தார் ராஜபக்சே

முன்னதாக நேற்று மாலை ராஜபக்சே தனி விமானம் மூலம் டெல்லி வந்து சேர்ந்தார். அவருடன் மனைவி ஷிராந்தியும் உடன் வந்தார். ராஜபக்சேவை மத்திய அரசின்சார்பில் வெளியுறவுத்துறை இணை அமைச்சர் பிரனீத் கெளர் விமான நிலையத்தில் வரவேற்றார்.

ராஜபக்சேவுக்கு ராஜ வரவேற்பு!:

ராஜபக்சேவுக்கு இன்று டெல்லியில், அதிகாரப்பூர்வ வரவேற்பு அளிக்கப்பட்டது. குடியரசுத் தலைவர் மாளிகையில் நடந்த நிகழ்ச்சியில் அவருக்கு சிவப்பு கம்பள வரவேற்பு அளிக்கப்பட்டது.

பின்னர் முப்படையினரின் அணிவகுப்பு மரியாதையையும் ராஜபக்சே ஏற்றுக் கொண்டார்.

நிகழ்ச்சியில் குடியரசுத் தலைவர் பிரதீபா பாட்டீல், பிரதமர் மன்மோகன் சிங், மத்திய அமைச்சர்கள், உயர் அதிகாரிகள் கலந்து கொண்டனர்.

சிவப்புக் கம்பள வரவேற்புக்குப் பின்னர் ராஜபக்சேவும், பிரதம் மன்மோகன் சிங்கும் சந்தித்துப் பேசினர். இந்த சந்திப்பின் இறுதியில், கூட்டுப் பொருளாதார ஒப்பந்தம் கையெழுத்தாகிறது.

3 நாள் பயணமாக வந்திருக்கும் ராஜபக்சே குடியரசுத் தலைவர் மற்றும் சோனியா காந்தி ஆகியோரை சந்தித்துப் பேசவுள்ளார். இந்திய அமைச்சர்கள் மற்றும் அதிகாரிகளையும் அவர் சந்திக்கிறார்.