கம்பியை நெம்பாதிருக்க சில யோனைகள்!

by **சிவா** Sun Jul 05, 2009 5:30 pm

சிறைச் சாலைகளிலிருந்து கைதிகள் அடிக்கடி தப்பித்துப் போவது, காவல் துறைக்கும் அரசு நிர்வாகத்துக்கும் தலைகுனிவு ஏற்படுத்துகிறது என்று பேசிக் கொண்டதை அடுத்து, ஓய்வு பெற்ற நீதிபதி ஓம்கார்நாத் கமிஷன் அமைக்கப்ட்டது. (ஹிஹி! கற்பனையில்தான்). கமிஷன் சிபாரிசுகள்:

கண்டபடி கைது செய்யாதீர்கள்

சிபாரிசு : 1

ஒரு கைதியை தடா சட்டத்திலோ அல்லது வேறு எந்தச் சட்டத்திலோ கைது செய்வதானாலும் மூன்று விதிகளை முக்கியமாகக் கவனிக்க வேண்டும்.

1. அவருக்கு இரண்டு கால்களோ, ஒரு காலோ இருக்கிறதா என்பதைக் கவனிக்கவும். அப்படி ஏதாவது கால் இருக்குமானால் அவர் கைது செய்யப்பட வேண்டிய தகுதியை இழக்கிறார்.

2. கண் பார்வை உள்ளவரைக் கைது செய்யக் கூடாது. அதற்காகக் கண்ணைத் தோண்டும் முயற்சியும் தவறாகும்.

3. கைது செய்யப்பட வேண்டிய நபருக்கு வயது 99க்கு மேல் இருப்பது முக்கியம்.

சிபாரிசு : 2

சுவரில் கயிறோ துப்பட்டியோ பிடித்து ஏறத் தெரிந்த எவரையும் கைது செய்யக்கூடாது.

சிபாரிசு : 3

ஜெயில் வார்டர்களிடம் சாவி இருப்பதால்தான் அவர்கள் திறந்து விட்டு விடுகிறார்கள் என்று கூறப்படுகிறது. ஆகவே ஜெயிலைப் பூட்டிச் சாவியைக் கைதியிடமே கொடுத்துவிடுவது நல்லது. வெளியேயிருந்து திறப்பதை விட உள்ளேயிருந்து திறப்பது சற்றுக் கொடுமை.

சிபாரிசு : 4

தப்பிப் போகும் கைதிகள் எடுத்துச் செல்ல வசதியாக தபால் கார்டுகளும் பேனாக்களும் ஒவ்வொரு அறை வாசலிலும் வைக்கப்பட வேண்டும். தப்பிச் செல்லும் கைதி, தான் இன்ன இடத்தில் இருக்கிறேன் என்பதைக் கார்டு மூலம் அதிகாரிகளுக்குத் தெரியப்படுத்த இது உதவிகரமாக இருக்கும். அப்படி வரும் கடிதங்களைக் குலுக்கல் முறையில் குலுக்கி மூன்று பரிசுகளை (மாருதி கார் உட்பட) அரசு வழங்கும்.

சிபாரிசு : 5

கைதிகளுக்குச்சிறைக் காவலர்கள் தகுந்த உதவி செய்யாததால்தான் கைதிகள் தப்பிக்க முயலுகின்றனர்.
ஆகவே, கைது செய்யப்படும் ஒவ்வொரு கைதிக்கும் ஒரு வார்டர் உதவியாளராகப் பணி செய்ய அமர்த்தப்பட வேண்டியது அவசியம். வார்டர்கள் பற்றாக்குறை ஏற்படுமானால் இரண்டு அல்லது மூன்று கைதிகளுக்கு ஒரு வார்டர் பணியாளராக - அந்தரங்கக் காரியதரிசியாக - வேலை செய்யலாம்.
கைதிகளுக்கு வேண்டியவர்களிடருந்து ஆயுதங்களோ, பணமோ, பலகாரமோ, இதர விஷயங்களோ பணியாளர்கள் கொண்டு வந்து சேர்ப்பிக்க வேண்டும்.
இதற்குக் கூலியோ கமிஷனோ சம்பளமோ எதுவாக இருந்தாலும் அரசாங்கத்திடமிருந்து அவர்கள் பெற்றுக் கொள்ள வேண்டுமே தவிர, கைதிகளிடமிருந்து பெறலாகாது.

சிபாரிசு : 6

சிறைச்சாலையை ஒட்டி ரயில்வே நிலையம் இருப்பதை விட சிறைச்சாலைக்குள்ளேயே ஒரு ரயில்வே ஸ்டேஷன் அமைப்பது முக்கியம். தப்பிக்கும் அவசரத்தில் கைதி டிக்கெட் வாங்காமல் தான் பயணம் செய்வார். அது சமயம் டி.டி.ஆர். அவரைச் சுலபமாகப் பிடித்து விடலாம். அல்லது தப்பிக்கவிரும்பும் கைதிகள் நீண்ட கியூவில் நின்று டிக்கெட் வாங்கிக் கொண்டிருக்கும் போது போலீஸ் அவர்களை மடக்கிவிடலாம்.

சிபாரிசு : 7

சிறைச்சாலையில் கைதி தனது அறையை வெளியிலிருக்கிற பொது மக்களுக்கு வாடகைக்கு விட்டு, அதன்மூலம் வரும் வருமானத்தை அடைய வழி செய்ய வேண்டும். இதனால் கைதிக்கு அந்த அறையின் மீது சொந்த வீடு மாதிரி ஒரு பற்று ஏற்படும். குடித்தனக்காரர் அறையை நன்றாக வைத்துக் கொண்டிருக்கிறாரா என்பதைச் சோதிக்க அடிக்கடி வந்து போவார். அவசியமானால் அவரைக் கைது செய்து கொள்ளலாம்.

சிபாரிசு : 8

சிறைச்சாலை வாசலில் ஒரு நீளமான "ஸ்டாப் லைன்" போட வேண்டும். அந்தக் கோட்டைத் தாண்டினால் "ஸ்பாட் பைன்" ஐம்பது ரூபாய் வசூலிக்கப்படும். பெரும்பாலான கைதிகளிடம் ஐம்பதுரூபாயாக இல்லாமல் நூறு ரூபாய் நோட்டாகத்தானிருக்கும்.சில்லறை இல்லாத காரணத்தால் கைதி கோட்டைத் தாண்டாமலே உள்ளேயே இருப்பார்.

சிபாரிசு : 9

அதிகத் தடவை தப்பிக்கும் கைதிக்கு ஐந்துரூபாய்கூடப் பெறாத ஒரு கோப்பையைப் பரிசாக அளிக்க வேண்டும். "சே! இந்த அல்ப கோப்பையைப் பெறவா நாம் இத்தனை தடவை தப்பிக்க வேண்டும்-" என்று தப்பாமலேயே இருந்துவிடுவார்!

கம்பியை நெம்பாதிருக்க சில யோனைகள்! Lines_multi_ani