கரண் படத்தில் கலைஞர் பேரன் காக்கி யூனிபார்மில் கலக்குகிறார்!

கலைக்குடும்பம் என்ற வார்த்தைக்கும் கலைஞர் குடும்பம் என்ற வார்த்தைக்கும் அதிக வித்தியாசம் இருக்க முடியாது. கலையுலகத்தில் அவரது வாரிசுகளாக திகழும் பலரும் இன்று டாப் லெவலை நோக்கி முன்னேறிக் கொண்டிருக்க, மேலும் ஒரு பிரஸ் ரிலீசில் கம்பீர முகம் காட்டியிருக்கிறார் டாக்டர் அறிவுநிதி. மு.க.முத்துவின் மகன். முதல்வரின் பேரன்!



ஏற்கனவே பெருமாள், திட்டக்குடி ஆகிய படங்களில் பாடல்கள் பாடியிருக்கிற அறிவுநிதி, தம்பி வெட்டோத்தி சுந்தரம் என்ற படத்தின் மூலம் நடிகராகவும் பிரமோஷன் ஆகியிருக்கிறார். நல்ல சப்ஜெக்ட் கிடைத்தால் நடிப்பேன் என்று முன்பு ஒரு முறை கூறியிருந்தார் அவர். அதன்பின் எராளமான இயக்குனர்கள் இவர் வீட்டு கதவை தட்ட, கதை கேட்கவும் நேரம் ஒதுக்கினார் டாக்டர். இந்த நேரத்தில்தான் தம்பி வெட்டோத்தி சுந்தரம் படத்தின் இயக்குனர் வி.சி.வடிவுடையான் படத்தில் வரும் போலீஸ் அதிகாரி வேடத்தில் நடிக்க அழைத்தாராம் அறிவுநிதியை.

முதலில் மறுத்தவரிடம், படத்தை பார்த்துவிட்டு சொல்லுங்கள் என்று சில குறிப்பிட்ட பகுதிகளை மட்டும் திரையிட்டு காண்பித்தாராம். இரவெல்லாம் உறங்காத டாக்டர், மறுநான் வடிவுடையான அழைத்து சில காட்சிகளை சொல்லி பாராட்டினாராம். அப்படியே தனது சம்மதத்தையும் தெரிவிக்க, அசத்தலான கேரக்டரில் நடித்துக் கொண்டிருக்கிறார் இப்போது.

கரண், அஞ்சலி, சரவணன், கஞ்சா கருப்பு ஆகியோர் நடித்திருக்கும் இப்படத்தில் அறிவுநிதி கேரக்டருக்கு சூசையப்பன் என்று பெயர் வைத்திருக்கிறார்கள். சூசையப்பனை பார்க்க ரொம்ப ஆசையப்பனா காத்திருக்கோம்....