பல்வலி வந்தபின்

பல் நலத்தை பேணுவது மிகவும் முக்கியமான ஒன்று . உடலின் பல உறுப்புகளும் ஒன்றுடன் ஒன்று தொடர்பு உடையவை. ஆதலால் நாம் கவனமாய் இருப்பது மிகவும் நன்று. குறிப்பாக பல் மற்றும் வாய் நலம் பேணுதல் மிகவும் அவசியமான ஒன்று. பல நேரங்களில் இருதயநோய்,சர்க்கரை நோய்,சில தோல் வியாதிகள் பல் நலனுடன் சமந்தப்படும்.

பல் மருத்துவரை காணப்போகும் முன் அவசியம் பல் துலக்கி செல்லவேண்டும். நீங்கள் வந்ததின் காரணம் ,வலியின் தன்மை , மேலும் உங்களுக்கு இருக்கும் மற்ற உடல் உபாதைகள் தாங்கள் உட்கொள்ளும் மற்ற மருந்துகள் பற்றி அவசியம் சொல்லவேண்டும்.

இந்த தகவல் வேண்டும் வேண்டாம் என்று நீங்கள் முடிவெடுப்பது கூடாது. உங்களுக்கு வரக்கூடிய எந்த சந்தேகம் ஆயினும் தயங்காமல் கேளுங்கள் உங்களுக்கு திருப்தியாக இருக்கும் பட்சத்தில் மட்டுமே மருத்துவம் செய்ய ஒப்புதல் அளியுங்கள்.உங்கள் ஒப்புதல் இல்லாமல் எந்த சிகிச்சையும் செய்யப்படப் போவதில்லை.

தங்களுக்கு வலியிருக்கும் பல்லை எந்த வகையில் காப்பாற்ற முடியும் என்று மருத்துவர் சொல்லும் வழிகளை ஆலோசித்து முடிவு செய்யுங்கள்.

பல்சிதைவின் ஆரம்ப நிலையில் பல் கூச்சம் இருக்கும், அந்த நேரத்திலயே ஒரு பல் மருத்துவரை காண்பது அவசியம். சிலர் மிகவும் பல் சிதைந்தபின் பல்லை காப்பாற்ற வேண்டும் என்று வரலாம்,ஆனால் அது தவறான நடைமுறை,ஒரு பல் மிகவும் சிதைந்து இருந்தால்,அது நீக்கப்பட வேண்டும்.

தங்களின் பல் பற்றிய சிறந்த ஆலோசனை கூற எக்ஸ் ரே படம் எடுக்க வேண்டும் என மருத்துவர் கூறினால் ஒப்புதல் அளியுங்கள்.அது சிகிச்சை முறை முடிவு செய்ய உதவி புரியும்.

சில நேரங்களில் தங்களின் இரத்ததில் பரிசோதனைகள்,மற்ற மருத்துவரின் ஆலோசனை வேண்டுமென சொன்னால் அதை தவறாக எண்ணாதீர்கள். அது எல்லாமே தங்களுக்கு சிறந்த சிகிட்சை தர வேண்டுமென்ற நோக்கத்தில் சொல்லப்படுவது.

மருத்துவரின் கேள்விகளுக்கு உண்மையான ,அல்லது தங்களுக்கு தெரிந்த உண்மையான பதிலை கூறுங்கள்.குறிப்பாக எந்த உடல் நிலை கோளாறுக்காக எடுக்கப்படும் மருந்துகள்,போதை பொருட்கள்,குடிபழக்கம்,வேறு எந்த தீயபழக்கம் இருப்பினும் தெரிவிக்கவும்.தங்களுக்கு ஒவ்வாமை அளிக்கும் மருந்துகள் தெரிந்து இருப்பின் கூறவும் அது மிகவும் அவசியமான ஒன்று.

சமிபத்தில் ஏதும் காரணமாய் மருத்துவமனையில் தங்கி சிகிச்சை எடுத்திருப்பினும்,இல்லை எந்த அறுவை சிகிச்சை செய்து இருப்பினும் அதையும் தெரிவிக்கவும்.

பெண்கள் தாங்கள் கருவுற்றுருப்பின் அந்த தகவலையும் தெரிவிக்க வேண்டும். கரு உண்டாக முடிவு செய்திருப்பினும் அதற்கு முன் தங்கள் பல் நலத்தை பேணுவது மிகவும் நன்று.

நன்றி :- தோழி Dr.ரோகிணி சிவா