விரைவில் அதிமுக கூடாரமே காலியாக போகிறது: மு.க.ஸ்டாலின்

ரபீக் · ரபீக் Thu Jun 03, 2010 3:10 pm

மிக விரைவில் அதிமுக கூடாரமே காலியாக போகிறது’ என்று திருமண விழாவில் துணை முதல்வர் மு.க.ஸ்டாலின் பேசினார்.
முன்னாள் நாடாளுமன்ற உறுப்பினர் எம்.ஜி.சேகர் இல்லத் திருமண விழாவில், துணை முதல்வர் மு.க.ஸ்டாலின் கலந்து கொண்டு பேசியதாவது:

எம்.ஜி.சேகர் மகள் எஸ்.வெற்றிக்கொடி, மணமகன் நவீன்குமார் திருமணத்தை நடத்தி வைக்கும் வாய்ப்பு கிடைத்தமைக்கு நன்றி.
இந்த சுயமரியாதை திருமணங்கள், 1967 வரை சட்டப்படியான அங்கீகாரத்தை பெறவில்லை. அண்ணா முதல்வரான பிறகு, முதலில் கொண்டு வந்த தீர்மானமே இந்த திருமணங்களை சட்டப்பூர்வமானதாக்கும் தீர்மானமாகும்.

தலைவர் கருணாநிதி, ‘தமிழை அமுதே, தேனே, மானே என்று அழைப்பதை விட தமிழே என்று அழைப்பதில்தான் பெரு¬’ம என்று கூறுவார். அதேபோல், சட்டப்படி செல்லுபடியாகும் இத்தகைய திருமணங்களை சுயமரியாதை திருமணங்கள் என்றோ, சீர்திருத்த திருமணங்கள் என்றோ அழைப்பதை விட, தமிழ் திருமணங்கள் என்று அழைப்பதில்தான் சிறப்பு உள்ளது.

இந்த மேடையில் உள்ள நிறைய பேர், தாய் கழகத்தில் இருந்து பிரிந்துச் சென்று, மீண்டும் நம்மிடம் வந்துள்ளார்கள் என்று இங்கு பேசிய பலர் தெரிவித்தனர். மிக விரைவில் அதிமுக கூடாரமே காலியாகப் போகிறது. இன்னும் சில நாட்களில் அதிமுகவில் இருந்து நிறைய பேர் விலகி, திமுகவில் இணைத்துக் கொள்ள உள்ளனர். அந்த விபரங்களை இப்போது சொல்லக் கூடாது. அது சஸ்பென்ஸ்சாகவே இருக்கட்டும்.

1975ம் ஆண்டு, எனக்கு திருமணம் ஆனநேரத்தில், மத்திய மாநில அரசுகள் பல கோடி ரூபாய் செலவிட்டு குடும்பக் கட்டுப்பாடு பிரசாரங்களை மேற்கொண்டன. அதில் ‘நாம் இருவர்; நமக்கு இருவர்’ என்று இருக்கும். அந்த வாசகங்கள் படிப்படியாக மாறி இப்போது, ‘நாமே குழந்தை; நமக்கேன் குழந்தை’ என்று கூறுகிறார்கள். அந்த அளவுக்கு குடும்பக் கட்டுப்பாடு தீவிரமடைந்துள்ளது.

திருமணமானவர்களை வாழ்த்தும்போது, 16ம் பெற்று பெருவாழ்வு வாழ வேண்டும் என்பார்கள். அது குழந்தைகள் அல்ல; செல்வங்கள் என்று கி.ஆ.பெ.விசுவநாதன் விளக்கியுள்ளார். அந்த வழியில் மணமக்கள் 16 செல்வங்களையும் பெற்று வாழ வேண்டும் என்று வாழ்த்துகிறேன்.
இவ்வாறு மு.க.ஸ்டாலின் பேசினார்