மனைவியைக் கொன்று மத்திய காவல்படை போலீஸ்காரரும் தற்கொலை

ரபீக் · ரபீக் Thu Jun 03, 2010 10:31 am

சேலம் அருகே மத்திய காவல்படை போலீஸ்காரர் தனது மனைவியை அடித்துக்கொன்று தானும் தற்கொலை செய்துள்ளார்.
சேலம் அருகே உடையாப்பட்டி எம்ஜிஆர் நகரை சேர்ந்தவர் முருகன் (39). மத்திய காவல்படை போலீஸ்காரரான இவர், காஷ்மீர் எல்லையில் பணியாற்றி வந்தார். அமுதா (30) என்ற மனைவியும், 2 குழந்தைகளும் உள்ளனர். முருகன் விடுமுறையில் சொந்த ஊருக்கு வந்து செல்வார்.
தற்போது உடையாப்பட்டியில் மாரியம்மன் கோயில் திருவிழா நடக்கிறது. இதற்காக ஒரு மாத லீவில் கடந்த சனிக்கிழமை முருகன் ஊருக்கு வந்தார். இன்று காலை 6 மணியளவில் முருகனின் தந்தை பெரியான், மகனை கிடா வெட்டுக்கு அழைத்துள்ளார். வருவதாக கூறி அவரை அனுப்பி வைத்தார்.

சிறிது நேரத்தில் குழந்தைகள் இருவரும் கத்திக்கொண்டு வெளியே ஓடி வந்தனர். அவர்களின் வீட்டுக்கு பின்பிறம் அமுதாவின் பெற்றோர் வசித்து வருகின்றனர். அங்கு சென்ற குழந்தைகள், அம்மாவை அப்பா அடித்து உதைப்பதாக கூறியுள்ளனர்.

அமுதாவின் பெற்றோர் ஓடி வந்து பார்த்தபோது, கதவு உள்பக்கமாக தாழிடப்பட்டிருந்தது. அக்கம்பக்கம் இருந்தவர்கள் வீட்டின் மேல் ஏறி ஓட்டை பிரித்துப் பார்த்தனர். சமையல் அறையில் அமுதா ரத்த வெள்ளத்தில் பிணமாக கிடந்தார். அருகே முருகன் தூக்கில் தொங்கினார்.
இதுகுறித்து அம்மாபேட்டை போலீசாருக்கு தகவல் தெரிவிக்கப்பட்டது. போலீசார் சென்று இருவரின் சடலங்களை மீட்டு பிரேத பரிசோதனைக்கு அனுப்பி வைத்தனர். முருகன் எதற்காக மனைவியை கொன்று தற்கொலை செய்து கொண்டார் என தெரியவில்லை. இதுகுறித்து போலீசார் தீவிர விசாரணை நடத்தி வருகின்றனர்.