ஆஸ்பத்திரியில் அனுமதிக்க மறுத்ததால் ரோட்டில் குழந்தை பெற்ற “எய்ட்ஸ்” நோயாளி

ரபீக் · ரபீக் Tue 1 Jun 2010 - 18:47

ஆந்திர மாநிலம் நல கொண்டா மாவட்டம் சேசராம் என்ற கிராமத்தைச் சேர்ந்த கூலித்தொழிலாளி மனைவி அலிவெலு. இவர் நிறைமாத கர்ப்பிணியாக இருந்தார். பிரசவ வலி ஏற்பட்டதை அடுத்து அருகில் உள்ள சூரியா பேட்டை அரசு ஆஸ்பத்திரிக்கு உறவுக்கார பெண்கள் அவரை அழைத்து வந்தனர்.

ஆஸ்பத்திரியில் அவருக்கு ரத்த பரிசோதனை நடந்தது. இதில் அலிவெலுக்கு “எய்ட்ஸ்” நோய் பாதிப்பு இருந்தது தெரிய வந்தது.

எனவே அவரை ஆஸ்பத்திரியில் சேர்க்காமல் வெளியே அனுப்பினார்கள். வேறு ஏதாவது தனியார் ஆஸ்பத்திரியில் சேர்க்கலாம் என கருதி அவருடன் வந்த உறவு பெண்கள் பணம் வாங்கி வர சென்றனர்.

அலிவெலு ரோட்டோரம் அமர்ந்து இருந்தார். அப் போது பிரசவ வலி மேலும் அதிகமாகி துடித்தார். இதை பார்த்த அக்கம் பக்கத்து பெண்கள் ஓடி வந்து ரோட்டில் வைத்தே பிரசவம் பார்த்தனர்.

இந்த சம்பவம் தாமதமாகத் தான் அரசு கவனத்துக்கு வந்தது. இதுபற்றி விசாரணை நடத்த சுகாதார மந்திரி நாகேந்தர் உத்தரவிட்டு உள்ளார்.

பிரசவம் ஆனதும் தாயும், குழந்தையும் சொந்த ஊருக்கு வந்து விட்டனர். அவர்களை சுகாதார ஊழியர்கள் ஊரில் இருந்து அழைத்து சென்று அரசு ஆஸ்பத்திரியில் சேர்த்துள்ளனர்