சாமுத்திரிகா லட்சணம்: தலைமுடி

by **சிவா** Tue Jun 01, 2010 9:07 pm

தலைமுடியினுடைய மயிர்க்கால்கள், ஒன்றுக்கு ஒன்றென முளைத்து, வளப்பைமாகவும், கருமையான நிறம் கொண்டதாயும், முடியின் நுனிப்பகுதி பிளவு படாமலும், மிருதுவாகவும் இருந்தால், அவனுக்கு அரசபோக வாழ்க்கை அமைவதோடு, எப்போதும் அனைத்து சுகபோகங்களையும் அனுபவிப்பவனாகவும் வாழ்வான்.

மயிர்க்கால் ஒன்றுக்கு இருமுடிகள் என முளைத்திருக்குமானால், செல்வச் செழிப்புடன் கூடிய வாழ்க்கையை மேற்கொள்வான். இதுவே துளை ஒன்றுக்கு மூன்று வீதம் முளைத்து இருந்தால், தரித்திரனாவான். நான்கு முடிகள் வீதம் முளைத்து இருக்குமானால், எந்நேரமும் துக்கம் கொண்டவனாய் இருப்பான்.

சம அளவில் இல்லாமல், ஒரே துளையில், பாலா முடிகள் முளைத்து, தடித்து, நுனிப்பகுதிகள் பிளவுபட்டு பளபளப்பு இல்லாமல், சுருண்டு இருந்தால், அவன் வாழ்க்கை தரித்திரத்துடன் கூடிய வாழ்க்கையாக அமைந்திடும்.

முடிகள் வெகு நெருக்கமாகவும், இலேசாகவும் இருக்குமானால் பலசாலியாகத் திகழ்வான்.

அடர்த்தியான, கருப்பு நிறத்தையும், சுருட்டை முடியையும் கொண்டவனின் உடல், எப்போதும் சூடாக இருக்கும். இத்தகைய சரீர அமைப்பின் காரணமாக, அவனுக்கு காம இச்சை மிகுந்து இருக்கும். இருந்த போதிலும், வெகு சாமர்த்தியமாக, எப்பிரச்சனையையும் தீர்க்க வல்லவனாக திகழ்வான். நுண்கலையில் தேர்ச்சி பெற்றிருப்பதோடு, நேர்மையான குணமுடையவனாகவும் திகழ்வான்.

விறைப்புடன் கூடிய, படியாத தலைமுடியைக் கொண்டவனுக்கு, மென்மையான இதயம் இருக்கும். எதைக் கண்டாலும் பயந்து நடுங்கிடும் சுபாவம் கொண்டவனாய் இருப்பான்.

கெட்டியாகவும் இல்லாமல், லேசாகவும் இல்லாமல், மத்திய தரமான தலைமுடியை உடையவன், தன்னடக்கத்துடன், ஒழுக்க சீலனாக இருப்பான்.

சரீரம் முழுமையும், முடிகள் அடர்ந்து காணப்படுமானால், அவன் வீரமிக்கவனகவும், புணர்ச்சியில் அதிக ஈடுபாடு கொண்டவனாயும் இருப்பான். எதனையும் சந்திக்க இயலும் என்ற தன்னம்பிக்கை கொண்டவனாய், எச் செயலிலும் துணிச்சலுடன் ஈடுபட்டு வெற்றி பெறுவான். அதிகமான தலைமுடி இருந்தால் சின்ன விஷயத்திற்குக் கூட கோபங்கொள்ளும் இயல்பினை உடையவனாக இருப்பான். இதனால் வாழ்க்கையில் எதனையும் அவனால் சாதிக்க இயலாது.