திருக்குறள் வகுப்பு

தமிழ்நாடன் · தமிழ்நாடன் Sat Jul 10, 2010 7:21 am

திருக்குறள் வகுப்பு தொடக்கவிழாத் தொகுப்புரை

பொங்குதமிழ் மன்றத்தின் சார்பில் நடைபெறும் திருக்குறள் வகுப்பிற்கான தொடக்கவிழா, திருவள்ளுவர் ஆண்டு 2041, ஆடவைத்திங்கள் 24ஆம் நாள் (08.07.2010), குவைத் அபுகலிபாவில் பொறியாளர் இராமன் இல்லத்தில் நடைபெற்றது.

பொறியாளர் செந்தமிழரசு அவர்கள், அனைவரையும் வரவேற்று பொங்குதமிழ் மன்றத்தின் செயல்களை விளக்கி, திருக்குறள் வகுப்பு குறித்தான அறிமுகத்தினையும் வழங்கினார்கள்.

தொடர்ந்து பொறியாளர் சேதுமாதவன் அவர்கள், திருக்குறள் வகுப்பினை நடத்தினார்கள். இவ்வகுப்பானது, வழமையான பள்ளி அறை வகுப்பு போலல்லாமல் அனைவரும் பங்குகொள்ளும் ஒரு கலந்துரையாடல் போலவும், குறளினை மனனம் செய்வதுபோலல்லாமல், குறள் நெறியினை நமது அன்றாட வாழ்வில் எங்கு எவ்வாறு பயன்படுத்துவது, அதன் நன்மைகள் எவை என்ற வகையில் நடத்தப்பட்டது அனைவரையும் ஈர்த்ததோடல்லாமல் மிகப் பயனுறும் வகையில் அமைந்தது.

விழாவில் திருக்குறள் நூல்கள், குறுந்தகடுகள் கண்காட்சிக்கு வைக்கப்பட்டிருந்தன. குறள் நூல் இல்லாதவர்களுக்கு கையடக்க திருக்குறள் நூல் பரிசாக வழங்கப்பட்டது.

திருக்குறள் குறித்தான அறிமுகம் செய்திகள் அடங்கிய கையேடும், தோழர் தமிழமுதன் தொகுத்து வழங்கிய “குழந்தைகளும் தொலைக்காட்சியும்” என்ற கையேடும் அனைவருக்கும் வழங்கப்பட்டது.

இறுதியாக சென்னை இராணி மேரிக் கல்லூரியின் தமிழ்ப்பேராசிரியர் திருமதி.இராசேசுவரி அவர்கள் பொங்குதமிழ் மன்றத்தின் சார்பில் நடைபெறும் திருக்குறள் வகுப்பினை தொடங்கிவைத்து சென்னையிலிருந்தபடி இணையம் வழி உரையாற்றினார்கள். அவர் தமது உரையில் திருக்குறளின் சிறப்புக்களையும் தமிழின் சிறப்புக்களையும் விரிவாக எடுத்துரைத்தார்கள். தனது உரையின் நிறைவாக அயல்நாட்டில் வாழ்வோர் நமது தமிழ்மொழியில் சிறப்புக்களை அந்தந்த நாட்டின் மொழியில் கொண்டு சேர்க்க வேண்டுமென்றும், அந்நாட்டு குழந்தைகளுக்கு திருக்குறள் போன்ற தமிழ்ச்செல்வங்களை பயிற்றுவிக்கவேண்டுமென்றும், அதே வகையில் அந்தந்த நாட்டு கலை இலக்கியச் வளங்களை தமிழிற்கும் கொண்டுவருதல் வேண்டும் அத்தகைய முயற்சிகளை வெளிநாடு வாழ்தமிழர்கள் அனைவரும் செய்தல் வேண்டும் என்ற அறிவுரையும் வழங்கினார்கள்.

அனைவ்ரும் பேராசிரியரின் உரையினை மிக ஆர்வமுடன் கேட்டு மகிழ்ந்தனர். திருமதி பொன்னி இராமன் வழங்கிய சிற்றுண்டியோடு விழா இனிதே நிறைவுற்றது.

இத்திருக்குறள் வகுப்பு மிகப்பயனுள்ளதாய் அமைந்ததாகவும், ஒவ்வோர் வாரமும் வியாழன் மாலை 06 மணிமுதல் குறைந்தது ஒரு மணி நேரத்திற்கு நடத்தப்படல் வேண்டும் என்ற கோரிக்கையோடு அனைவரும் விடைபெற்றனர்.