கிளிநொச்சியைக் கைப்பற்ற இலங்கை ராணுவம் தீவிரம் : குண்டுவீசித் தாக்குதல்: மக்கள் தவிப்பு

by **சிவா** Mon Oct 06, 2008 5:49 am

கொழும்பு : இலங்கையில் ராணுவத்துக்கும், புலிகளுக்கும் இடையேயான சண்டை தீவிரமடைந்துள்ளது. கடந்த இரு நாட்களில் மட்டும் 29 புலிகள் கொல்லப்பட்டுள்ளதாக ராணுவம் தெரிவித்துள்ளது. "கிளிநொச்சியை எந்த நேரத்திலும் புலிகளிடம் இருந்து கைப்பற்றி விடுவோம்' என, இலங்கை ராணுவ தளபதி பொன்சேகா கூறியுள்ளார். கடந்த சில மாதங்களாக, இலங்கையில் புலிகளின் கட்டுப்பாட்டில் உள்ள கிளிநொச்சி, முல்லைத் தீவு பகுதிகளில் ராணுவம் தீவிர தாக்குதல் நடத்தி வருகிறது. தாக்குதலுக்கு வசதியாக புலிகளின் கட்டுப்பாட்டு பகுதிகளில் வசிக்கும் மக்களை, ராணுவத்தின் கட்டுப்பாட்டு பகுதிகளுக்கு வெளியேறும்படி ராணுவம் எச்சரித்துள்ளது.

இந்நிலையில், புலிகள் கட்டுப்பாட்டு பகுதியில் போர் நேற்று உச்சக் கட்டத்தை எட்டியது. முல்லைத் தீவு, கிளிநொச்சி உள்ளிட்ட பகுதிகளில் ராணுவத்துக்கும், புலிகளுக்கும் இடையே, 13 இடங்களில் நேரடி சண்டை நடந்தது. ராணுவத்துக்கு வசதியாக இலங்கை போர் விமானங்களும் புலிகளின் நிலைகள் மீது குண்டு வீசி தாக்குதல் நடத்தின. இதில் புலிகளுக்கு கடும் சேதம் ஏற்பட்டதாக தகவல் வெளியாகியுள்ளது. கடந்த இரு நாட்களில் மட்டும் 29 புலிகள் கொல்லப்பட்டதாகவும், மூன்று ராணுவ வீரர்கள் உயிரிழந்ததாகவும் ராணுவம் அறிவித்துள்ளது. சண்டை தீவிரமடைந்துள்ளதால், ஏராளமான தமிழர்கள் அங்கிருந்து வெளியேறி, நிவாரண முகாம்களில் தஞ்சம் அடைந்துள்ளனர். இரண்டு லட்சத்துக்கும் மேற்பட்டோர், வெளியேறியுள்ளதாக தகவல்கள் வெளியாகியுள்ளன. முறையான சாலை மற்றும் போக்குவரத்து வசதிகள் இல்லாததால் பலர் அங்கிருந்து வெளியேற முடியாத நிலை ஏற்பட்டுள்ளதாகவும் கூறப்படுகிறது. சண்டையின் தீவிரம் குறித்து இலங்கை ராணுவ தளபதி பொன்சேகா, பத்திரிகை ஒன்றுக்கு பேட்டி அளித்தார்.

அப்போது அவர் கூறியதாவது: விரைவில் கிளிநொச்சியை பிடித்து விடுவோம். கிளிநொச்சியை ராணுவம் நெருங்கி விட்டது. புலிகள் தலைவர் பிரபாகரன் நீண்ட நாட்கள் மறைவிடத்தில் பதுங்கியிருக்க முடியாது. அவர் போர்க்களத்திற்கு வரமாட்டார். மாறாக முல்லைத் தீவுக்கு தப்பிவிட வாய்ப்பு உள்ளது என்றே கருதுகிறோம். எங்களுடன் மோதியது தவறு என்பதை விரைவில் அவர் உணர்ந்து கொள்வார். புலிகளுக்கு வேறு சில பயங்கரவாத அமைப்புகளுடன் தொடர்பு உள்ளது. அந்த அமைப்புகள், பிரபாகரனுக்கு உதவக் கூடும். கடந்த இரண்டு ஆண்டுகளில் மட்டும் 11 ஆயிரம் புலிகள் கொல்லப்பட்டுள்ளனர். கடந்த 2007 மார்ச்சில் இருந்து, புலிகளின் கட்டுப்பாட்டு பகுதிகளுக்குள் 60 கி.மீ., தூரம் முன்னேறியுள்ளோம். புலிகளின் நிலைகளை விமானப் படை தரைமட்டமாக்கி வருகிறது. இவ்வாறு பொன்சேகா கூறினார்.