உலகத் தலைநகரங்கள் - வாஷிங்டன்

உலக வல்லரசாகத் திகழும் அமெரிக்க நாட்டின் அழகிய தலைநகரம் வாஷிங்டன். இது பொதுவாக `வாஷிங்டன் டி.சி.' என்று அழைக்கப்படுகிறது. `டிஸ்ட்ரிக்ட் ஆப் கொலம்பியா' என்பதன் சுருக்கமே `டி.சி'.

1790-ம் ஆண்டு ஜுலை 16-ம் தேதியன்று இந்நகர் நிறுவப்பட்டது.

தொடக்கத்தில் கொலம்பியா பகுதியில் தனி நகரசபையாக இருந்த வாஷிங்டன், 1871-ம் ஆண்டு ஒரு சட்டத்தின் மூலம் `டிஸ்ட்ரிக்ட் ஆப் கொலம் பியா' என்று ஒரே பகுதியாக மாற்றப்பட்டது. இதன் மொத்தப் பரப்பளவு 68.5 சதுர மைல்கள் ஆகும். நகரத்தின் மக்கள்தொகை 6 லட்சம்தான். தினமும் 4 லட்சத்துக்கு மேற்பட்ட மக்கள் வெளியிலிருந்து இங்கு வந்து பணிபுரிகின்றனர்.

`போடோமாக்' நதிக் கரையில் வாஷிங்டன் நகரம் அமைந்துள்ளது. தென்மேற்கில் `விர்ஜினியா' மாநில மும், மற்ற பகுதிகளில் `மேரி லாண்ட்' மாநிலமும் வாஷிங்டனின் எல்லைகளாக அமைந்துள்ளன.

விண்ணை விசாரிக்கும் உயர்ந்த கட்டிடங்களோடு பரபரப்பும் நெரிசலுமாக இருக்கும் பிற அமெரிக்க நகரங்களோடு ஒப்பிடுகையில் வாஷிங்டன் ஓர் அமைதியான நகரமாகும். இது அமெரிக்காவின் 9-வது பெரிய நகரமாகத்தான்
விளங்குகிறது.

அமெரிக்க ஐக்கிய நாடுகளின் கூட்டு அரசுத் தலைமையகம் அமைந்துள்ள இடமான வாஷிங்டனில், பல புகழ்பெற்ற தேசிய நினைவுச் சின்னங்களும், அருங்காட்சியகங்களும் அமைந்துள்ளன.

மேலும், 174 வெளிநாட்டுத் தூதரகங்களுடன், உலக வங்கி, சர்வதேச நாணய நிதியம் போன்ற உலகளவில் முக்கியமான அமைப்புகளும் இங்கு அமைந்துள்ளன.

13 உறுப்பினர்கள் கொண்ட நகர அவைக்குத் தலைமை தாங்கும் மேயரால் வாஷிங்டன் நகரம் நிர்வகிக்கப்படுகிறது. ஆனால் இங்கு எந்தச் சட்டத்தையும் மாற்றும் அதிகாரம் அமெரிக்க `காங்கிரஸுக்கு' உண்டு.

பதினேழாம் நூற்றாண்டில் ஐரோப்பியர்கள் இங்கு வந்து குடியேறியபோது `நகோட்சாங்' என்ற பூர்வகுடி மக்கள் இங்கு வசித்து வந்தனர். 18-ம் நூற்றாண்டில் அவர்கள் பெருமளவில் ஐரோப்பியர்களால் இடம்பெயரச் செய்யப்பட்டனர். அமெரிக்க முதல் ஜனாதிபதி ஜார்ஜ் வாஷிங்டனை கவுரவப்படுத்தும் விதமாக இந்நகருக்கு `வாஷிங்டன்' என்று பெயர் சூட்டப்பட்டது.

வாஷிங்டனின் முக்கிய அடையாளம், அமெரிக்க ஜனாபதியின் அதிகாரப்பூர்வ இருப்பிடமான `வெள்ளை மாளிகை' ஆகும். 1814-ம் ஆண்டு படையெடுத்து வந்த பிரிட்டீஷ் படைகளால் எரித்துச் சேதப்படுத்தப்பட்ட இம்மாளிகை, மீண்டும் புதுப்பொலிவு பெறச் செய்யப்பட்டது. இன்றும் அமெரிக்கா வரும் வெளிநாட்டுப் பயணிகளால் ஆர்வத்துடன் கண்டு களிக்கப்படுகிறது `வெள்ளை மாளிகை'.

நானும் சென்று பார்த்திருக்கிறேன் தல ரொம்ப அழகான இடம் அது