ஸ்ரீகாளஹஸ்தி கோவில் ராஜகோபுரம் இரண்டாக பிளந்தது எந்த நேரத்திலும் இடிந்து விழும் ஆபத்து

ஸ்ரீகாளஹஸ்தி சிவன் கோவில் ராஜகோபுரம் இரண்டாக பிளந்தது. அது எந்த நேரமும் இடிந்து விழும் ஆபத்து உள்ளது. கோபுரத்தை சென்னை வல்லுனர் குழு நேரில் பார்வையிட்டு ஆய்வு செய்தது.

கோவில் கோபுரம் பிளந்தது

ஸ்ரீகாளஹஸ்தி நகரில் பிரசித்தி பெற்ற ஞானபிரசுனாம்பிகை உடனுறை காளஹஸ்தீஸ்வரர் சிவன் கோவில் உள்ளது. இந்த கோவிலின் ராஜகோபுரம் 122 அடி உயரமாகும். இந்த கோவில் 1516-ம் ஆண்டு கிருஷ்ணதேவராய மன்னரால் கட்டப்பட்டது. பஞ்சபூத தலங்களில் இக்கோவில் வாயு தலமாக விளங்குகிறது. இந்த கோவிலில் நடைபெறும் ராகு-கேது பூஜை சிறப்பு வாய்ந்ததாகும்.

ராஜகோபுரத்தில் கடந்த 1988-ம் ஆண்டு விரிசல் ஏற்பட்டது. இதனால் கோபுர சிற்பங்கள் உடைந்து விழுந்தன. சேதமடைந்த ராஜகோபுரம் ரூ.15 லட்சம் செலவில் சீரமைக்கப்பட்டது. அதன்பிறகு ராஜகோபுரம் எந்த வித சேதமும் இல்லாமல் இருந்தது. அண்மையில் மீண்டும் ராஜகோபுரத்தில் விரிசல் ஏற்பட்டது. இந்த விரிசல் விரிவடைந்து கொண்டே போய் கடந்த சில நாட்களில் இரண்டாக பிளந்து விட்டது.

சென்னை குழு ஆய்வு

இதைப்பார்த்து வேதனையடைந்த பக்தர்களும், பொதுமக்களும் ராஜகோபுரத்தை சீரமைக்கும்படி கோவில் நிர்வாகத்துக்கு கோரிக்கை விடுத்துள்ளனர். இதுபற்றிய தகவல் அறிந்ததும் சித்தூர் மாவட்ட கலெக்டர், அறநிலையத்துறை ஆணையாளர் பிரசாத் மற்றும் தேவஸ்தான என்ஜினீயர்கள் வந்து ராஜகோபுரத்தை பார்வையிட்டனர். சென்னையில் இருந்து தொல்பொருள் ஆய்வாளர்களும் வந்து ராஜகோபுரத்தை பார்வையிட்டனர். உடனடியாக கோபுரத்தை சுற்றி 500 அடி தூரத்துக்கு ஆபத்து பகுதியாக (ரெட் ஜோன்) அறிவித்து, கடைகளை காலி செய்ய உத்தரவிட்டனர். அந்த பகுதிக்கு பொது மக்கள், பக்தர்கள் யாரும் செல்ல வேண்டாம் என்று எச்சரிக்கையும் விடுத்து உள்ளனர். பொதுமக்கள் மற்றும் பக்தர்கள் கோபுரத்தின் அருகில் செல்லாத வகையில், கோபுரத்தை சுற்றிலும் இரும்பு கம்பி வேலியும் அமைக்கப்பட்டு உள்ளது.

இந்த நிலையில் சென்னையை சேர்ந்த பேராசிரியர் நரசிம்மராவ் தலைமையில் 6 பேர் கொண்ட குழுவினர் நேற்று ஸ்ரீகாளஹஸ்திக்கு வந்தனர். இரண்டாக பிளந்த ராஜகோபுரத்தை நேற்று அவர்கள் பார்வையிட்டு ஆய்வு செய்தனர். ராஜகோபுரத்தில் இருந்து விழுந்த கல்சிற்பங்களின் ஒரு சில பகுதிகளை பரிசோதனைக்காக சேகரித்தனர்.

எந்த நேரமும் இடிந்து விழும்

இதுகுறித்து நிபுணர் குழுவை சேர்ந்த பேராசிரியர் நரசிம்மராவ் நிருபர்களிடம் கூறியதாவது:-

ஸ்ரீகாளஹஸ்தீஸ்வரர் கோவில் ராஜகோபுரத்தின் அடித்தளம் பலமாக உள்ளது. ஆனால், கோபுர கற்கள் பலவீனமாக உள்ளன. காற்று, மழை போன்ற பருவநிலை காரணமாக ராஜகோபுரம் எந்த நேரத்திலும் இடிந்து விழும் அபாயகரமான நிலை உள்ளது.

ராஜகோபுரத்தை சுற்றிலும் 150 அடி வரை அபாயகரமான பகுதியாகும். எனவே, அதன் அருகில் யாரும் சென்று விடாமல் தவிர்க்க கோபுரத்தை சுற்றிலும் கம்பி வேலி அமைக்கப்பட்டு உள்ளது. அதன் அருகிலும் அல்லது உள்பகுதியிலும் பொதுமக்கள் மற்றும் பக்தர்கள் யாரும் செல்ல வேண்டாம் என்று கேட்டுக்கொள்ளப்பட்டு உள்ளது. ராஜகோபுரத்தின் கட்டுமான கற்களின் ஒரு சிறிய பகுதியை எடுத்துச்செல்கிறோம். அந்த கற்களை சோதனை செய்தபிறகு இன்னும் ஒரு வாரத்தில் அடுத்தகட்ட நடவடிக்கை எடுக்கப்படும்.

மேற்கண்டவாறு அவர் கூறினார்.

அப்போது தேவஸ்தான முதன்மை பொறியாளர் வாசுதேவன், தேவஸ்தான அறங்காவல் குழு உறுப்பினர் சங்கரம்மா ஆகியோர் உடன் இருந்தனர்.

இதை இவ்வளவு நாலுமா செய்யாமல் இருக்கிறார்கள்

15 லட்சத்தில் சொற்ப வேலைகளை செய்து இருப்பார்கள் பாவம் சுவாமி , அவரிடம் தான் மறுபடியும் வேண்டணும், அவர் கோபுரத்தையும் அவரே பார்துகசொல்லி.