தனி நபர் அடையாள எண் மையம் உருவாக்கும் புதிய பணிகள்

இந்தியாவில் வசிக்கும் ஒவ்வொரு தனிநபருக்கும் ஒரு அடையாள எண்ணை வழங்கும் நோக்கத்தில் யு.ஐ.டி.ஏ.ஐ., என்ற யுனிக் ஐடென்டிபிகேஷன் அதாரிட்டி ஆப் இந்தியா நிறுவனம் இயங்கி வருகிறது. இந்த நிறுவனத்தின் மூலம் ஒரு கோடிக்கும் அதிகமான இந்தியர்களுக்கு தனி அடையாள எண் வழங்கும் முயற்சிகள் மேற்கொள்ளப்பட்டு வருகின்றன. முதல் 5 ஆண்டுகளில் இந்த முயற்சிக்காக 1000 கோடி ரூபாய்களும்,
அதன் பின் ஒவ்வொரு ஆண்டும் 500 கோடி ரூபாய்களும் செலவிடப்படும் என்ற கணிப்பு நிலவுகிறது. திட்ட அளவிலும், பணஅளவிலும் மிகவும் முக்கியத்துவம் வாய்ந்த ஒரு திட்டமாக இது கருதப்படுகிறது.
கார்ப்பரேட் துறையின் ஈடுபாட்டுடன் செய்யப்படவுள்ள இந்தத் திட்டத்தின் மூலம் இந்தியாவின் எதிர்காலமே வளமானதாக மாறிவிடும் என்ற நம்பிக்கையும் நிலவுகிறது. தனி நபர் அடையாள எண் முறை இந்திய சமூக உள் கட்டமைப்பிலுள்ள பல்வேறு ஏற்றத்தாழ்வுகளைக் களையும் தன்மை கொண்டது என்று அறிஞர்கள் கருதுகிறார்கள்.
இந்தத் திட்டத்திற்கான நிதி ஒதுக்கீடு பல்வேறு நிலைகளாக பங்கிடப்படும். முதல் நிலையில் கன்சல்டிங், ஐ.டி., சர்வீசஸ், பிசினஸ் பிராசஸ் ரீ-என்ஜினியரிங், ஹார்டுவேர், டிரெய்னிங் அண்டு மெயின்டனன்ஸ் என்ற துறைகளின் மூலமாக இந்த செலவினங்கள் மேற்கொள்ளப்படும். 2வது நிலையில் ஹேண்ட் செட் தயாரிப்பாளர்கள், மொபைல் பணம் செலுத்தும் சேவைகள், மார்க்கெட் அனலிட்டிக்ஸ், பிசினஸ் இன்டலிஜென்ஸ் சர்வீசஸ், ஹார்டுவேர் துறைகளும், 3வது நிலையில் இலக்கில் நிர்ணயிக்கப்பட்ட குழுக்களுக்கும் ஆண்டுக்கு 600 கோடியளவுப் பணம் செலவிடப்படும் என்று தெரிகிறது.
இந்தத் திட்டத்தால் சாப்ட்வேர்,ஹார்டுவேர் துறைகளுடன் தொலைபேசி நிறுவனங்கள், வங்கிகள் போன்றவையும் பெரும் பயனடையும் என்று கணிக்கப்படுகிறது. இந்தத் திட்ட அமலாக்கத்தின் மூலம் தொலைபேசி நிறுவனங்கள் 6 கோடி புதிய வாடிக்கையாளர்களைப் பெற வாய்ப்புள்ளதாக வர்த்தக உலகம் நம்புகிறது. வங்கிகளில் 12.5 கோடி புதிய கணக்குகள் உருவாகும் வாய்ப்புகள் உள்ளதாகவும் தகவல்கள் தெரிவிக்கின்றன.
அடிப்படையில் இந்த முன்னேற்றங்கள் அனைத்துமே சிஸ்டம் இன்டக்ரேஷன், டிரெய்னிங் அண்டு அனலிடிக்ஸ், சிஸ்டம்ஸ் ஸ்பெஷலிஸ்ட், புரொகிராமர், பிசினஸ் பிராசஸ் ரீ-இன்ஜினியரிங் ஆகிய துறைகளுக்கு அமோக வளர்ச்சி இருக்கும் என்றும் இதன் மூலம் இந்தியா முழுமையும் 3.5 லட்சம் புதிய வேலை வாய்ப்புகள் உருவாகும் என்றும் கணிக்கப்பட்டுள்ளது.