பெட்ரோல் டீசல் விலைகளை மத்திய அரசு

பெட்ரோல் டீசல் விலைகளை மத்திய அரசு நிர்ணயிக்கும் நிலைக்கு முற்றுப்புள்ளி வைத்துவிட்டு, விலை நிர்ணயத்தை பெட்ரோலிய நிறுவனங்களிடம் விட்டுவிடும் முடிவு எடுப்பது குறித்து ஆலோசிக்க மத்திய அரசின் அதிகாரமிக்க அமைச்சரவைக் கூட்டம் ஜூன் 7ஆம் தேதி கூடுகிறது.

கச்சா எண்ணெய் விலையேற்றத்திற்குத் தக்கவாறு பெட்ரோல் டீசல் விலைகளை நிர்ணயிக்க வேண்டும் என்றும், தற்போது நடைமுறையில் உள்ள விலைக் கட்டுப்பாட்டை நீக்க வேண்டும் என்றும் மத்திய அரசின் பொதுத் துறை நிறுவனங்கள் கோரி வருகின்றன.

கச்சா எண்ணெய் விலையேற்றத்தால் எண்ணெய் நிறுவனங்களுக்கு ஏற்படும் இழப்பை சரிகட்ட பெட்ரோல் டீசல் விலை நிர்ணயத்தை அரசுக் கட்டுப்பாட்டிலிருந்து விடுவிப்பதே ஒரே வழி என்றும் பொதுத் துறை நிறுவனங்கள் சொல்லி வருகின்றன.

கச்சா விலையேற்றத்திற்கு தக்க அளவிற்கு பெட்ரோல் டீசல் விலைகள் ஏற்றப்பட்டாததால் இந்திய அரசின் பொதுத் துறை நிறுவனங்களான இந்தியன் ஆயில், ஹிந்துஸ்தான் பெட்ரோலியம், பாரத் பெட்ரோலியம் ஆகியவற்றிற்கு நாள் ஒன்றிற்கு ரூ.2,555 கோடி இழப்பு ஏற்படுவதாக அவைகள் சுட்டிக் காட்டுகின்றன. விலைக் கட்டுப்பாட்டை நீக்க விட்டால் இந்த நிதியாண்டில் ஒட்டு மொத்தமாக ரூ.90,000 கோடி இழப்பு ஏற்படும் என்றும் அவைகள் கூறுகின்றன.

இந்த நிலையில், இயற்கை எரிவாயு விலையை ஒரு சதுர மீட்டருக்கு ரூ.3.20தில் இருந்து ரூ.7.50க்கு உயர்த்தியுள்ள மத்திய அரசு, பெட்ரோல் டீசல் விலைகளின் மீதான விலை நிர்ணய அதிகாரத்தை விட்டுவிட முடிவு செய்துள்ளது.

மத்திய அரசின் அதிகாரமிக்க அமைச்சரவைக் குழு (Empowered Group of Ministers - EGoM) அடுத்த மாதம் 7ஆம் தேதி கூடும் என்று பெட்ரோலிய அமைச்சரவை வட்டாரங்கள் தெரிவித்துள்ளதாக பிடிஐ செய்தி கூறுகிறது.

இக்குழுவின் தலைவராக நிதியமைச்சர் பிரணாப் முகர்ஜி உள்ளார். பெட்ரோலியத் துறை அமைச்சர் முரளி தியோரா, வேளாண் அமைச்சர் சரத் பவார், இரசாயணம், உரத் துறைகள் அமைச்சர் அழகிரி, இரயில்வே அமைச்சர் மம்தா பானர்ஜி, சாலை போக்குவரத்துத் துறை அமைச்சர் கமல் நாத், திட்ட ஆணையத்தின் துணைத் தலைவர் மாண்டெக் சிங் அலுவாலியா ஆகியோர் உறுப்பினர்களாவர்.

பெட்ரோல் டீசல் மீதான விலை நிர்ணய கட்டுப்பாட்டை நீக்கிவிட்டால், தற்போதுள்ள கச்சா விலைக்கு ஏற்ப விலைகள் உயர்த்தப்பட்டால், பெட்ரோல் விலை லிட்டருக்கு ரூ.6.07 ஆகவும், டீசல் விலை லிட்டருக்கு ரூ.6.38ம் உயர்த்த வேண்டும்.

அதேபோல் மண்ணெண்ணை விலை லிட்டருக்கு ரூ.19.73 உயர்த்த வேண்டு்ம, சமையல் எரிவாயு உருளை விலையை (14.2 கி.கி.) ரூ.254.37 உயர்த்த வேண்டும்.

ஒரே நேரத்தில் இப்படி எல்லா எண்ணெய் பொருட்களின் விலைகளையும் உயர்த்தாமல் முதலில் பெட்ரோல் விலை நிர்ணயத்தின் மீதான கட்டுப்பாட்டை கைவிட முடிவெடுக்கப்படும் என்று கூறப்படுகிறது. பிறகு டீசல், சமையல் எரிவாயு ஆகியவற்றின் விலை மீதான கட்டுப்பாடுகளும் நீக்கப்படும் என்று கூறப்படுகிறது.