பல்லின் பாகங்களும்-பயன்களும்

வழக்கமாக பற்களில் வரும் நோய்களைப் பற்றித்தான் படித்திருப்பீர்கள். இப்போது பற்களின் பாகங்களையும் அவற்றின் பயன்களையும் பற்றி தெரிந்துகொள்ளுங்கள்.
சாதாரணமாக ஒரு பல்லை எடுத்துக்கொண்டால் அதில் எனாமல், டென்டின், பற்கூழ், நரம்பு, சிமெண்டம், வேர்கள், ஈறுகள், பல் இணைப்பு நாண்கள் ஆகியவை இருக்கும்.


எனாமல்

பல்லின் வெளிப்புற பூச்சு அல்லது வெளிப்புற படலத்திற்கு எனாமல் என்று பெயர். பல் சிகரத்தை இது முழுவதுமாக மூடியிருக்கும். பற்களின் மிக வலுவான பகுதி இது.

மனிதனின் இறப்புக்குப் பின்னர், உடலை எரித்தாலும்கூட இந்த எனாமல் மட்டும் எரியாமல் இருக்கும். இதுதான் நமது பற்களுக்கு வெள்ளை நிறத்தை கொடுக்கிறது. இது கடினமாக இருப்பதால் சூடான உணவை உட்கொண்டாலும், குளிர்ச்சியான பொருட்களை சாப்பிட்டாலும் அதனால் பற்கூழ் பாதிக்கப்படாமல் இருக்கிறது.

டென்டின்

பற்களின்மேல் எனாமல் படலத்திற்கு அடுத்தபடியாக அமைந்திருப்பது டென்டின். ஒரு பல்லின் முக்கால் பகுதியை டென்டின் ஆக்கிரமித்திருக்கும். பல்லின் நுனியில் இருந்து வேர் வரை இது அமைந்திருக்கும். மஞ்சள் நிறத்திலிருக்கும் டென்டின் வெப்பம், வலி, அழுத்தம் போன்ற உணர்ச்சிகளை அறியும். ஆனால் அவற்றை வேறுபடுத்திப் பார்க்க முடியாது. இதனால்தான் எல்லா உணர்வும் பல் கூச்சம் அல்லது வலியாக வெளிப்படுகிறது.

சூடாக சாப்பிட்டாலும், குளிர்ச்சியாக சாப்பிட்டாலும் அதை வலியாகவே டென்டின் உணர்ந்து கொள்ளும்.

பல்லின் நடுப்பகுதி என இதை அழைக்கலாம். இது பல்லின் உயிரோட்டமான பகுதி. வேர் நுனிகள் வழியாக வரும் நரம்பு மற்றும் ரத்தக்குழாய்கள் எல்லாம் இந்தப் பகுதியில் தான் உள்ளன. பற்கூழ் கெட நேர்ந்தால் பல பாதிப்புகள் உண்டாகும். ஏதாவது பாதிப்பினால் பற்கூழ் வெளியே தெரிந்தால் பல்வலி அதிகமாகும். இதை எளிதில் கிருமிகள் தாக்கி அழித்துவிடும்.

நரம்பு

பற்களில் இருந்து செய்திகளை மூளைக்குத் தெரிவிக்கும் பகுதி இது. பல் கூச்சம், வலி ஆகிய உணர்வுகள் நரம்பின் மூலமாக மூளைக்கு கடத்தப் படுகின்றன.

சிமெண்டம்

பல்லின் எனாமல் ஒரு தொப்பியை போல இருக்கும். வேர்ப்பகுதியை எலும்பு போன்ற ஒரு பொருளால் மூடப்பட்டிருக்கும். பல் இணைப்பு நாண் தசைகளை பற்களோடு பிணைக்கும் சாந்து போல இது பயன்படுவதால் இதை சிமெண்டம் என்கிறார்கள். பற்களின் வேரை இது காப்பாற்றுகிறது.

பல் இணைப்பு நாண்

இதை பெரியோடாண்டல் லிகமண்ட் என்பார்கள். இது பற்களை எலும்போடு இணைப்பதற்கும், அதிர்வு தாங்கியைப் போலவும் பயன்படுகிறது. நாம் கடின மான பொருட்களை கடிக்கும் போது அதன் அழுத்தம் பற்களை சேதப்படுத் தாமல் இருக்கக் காரணமே இந்த இணைப்பு நாண்தான். எலும்பினுள் புதைந்துள்ள பல் வேரை எலும்போடு இது இணைக்கிறது.


ஈறுகள்

உணவுப் பொருட்களை மெல்லும் போது ஏற்படும் உராய்வுகளை, அழுத்தங்களை தாங்கிக் கொள்ளும் நார்த்திசுக்கள்தான் ஈறுகள் ஆகும்.

ஆரோக்கியமான ஈறுகள் பற்களை சிமெண்டம் மற்றும் எனாமல் இணையும் இடத்தில் பற்களோடு இணைக்கின்றன. அவ்வாறு இணையும் இடத்தில் பற்களுக்கும் ஈறுகளுக்கும் இடையே 0.5 மி.மீட்டர் இடைவெளி இருக்கும்.

பற்களை சுத்தமாக வைக்காவிட்டால் இந்த இடைவெளியில் உணவுத் துகள்கள் மற்றும் பாக்டீரியாக்கள் தங்கி ஈறு மற்றும் பற்களின் இணைப்பை சேதப்படுத்தி ஈறு நோய்களை உண்டாக்குகின்றன. நோய்த் தொற்று இணைப்பு நாணைத் தாண்டினால் பற்கள் பிடிமானத்தை இழந்து விழுந்துவிடும்.

தாடை எலும்பு

பற்களின் எல்லா பாகத்தையும் தாங்கிப் பிடிக்கும் முக்கிய பாகம் இது. பற்கள் தாடையிலிருந்து விழுந்து விட்டால் தாடையின் உயரம் குறைந்துவிடும். ஈறுகளைத் தாக்கும் நோய் தாடை எலும்பையும் தாக்கும். இதனால் பற்கள் தானாக விழத்தொடங்கும்.