செ‌ன்னை‌யி‌ல் 4 மத்திய அரசு மருத்துவமனைகளில் சி.பி.ஐ சோதனை

சென்னையில் செயல்படும் 4 மத்திய அரசு மரு‌த்துவமனைகளில் நடத்திய சோதனையில், நோயாளிகளுக்கு காலாவதியான மருந்து சப்ளை செய்யப்பட்டுள்ளதாகவும், இதில் தொடர்புள்ள மரு‌த்துவர்கள் மீதும், இதர அதிகாரிகள் மீதும் கடும் நடவடிக்கை எடுக்கப்படும் என்றும் சி.பி.ஐ. தென்மண்டல இணை இயக்குனர் அசோக்குமார் தெரிவித்தார்.

செ‌ன்னை‌யி‌ல் செ‌ய்‌தியாள‌ர்க‌ளிட‌‌ம் பே‌சிய அவ‌ர், பல்வேறு தரப்பில் இருந்து வந்த புகார்களை அடுத்து,​​ சென்னை,​​ கொச்சின்,​​ திருவனந்தபுரம் ஆகிய நகரங்களில் உள்ள 7 மத்திய அரசு மருத்துவமனைகளில் கடந்த 15ஆம் தேதி முதல் 18ஆம் தேதி வரை அதிரடி சோதனை நடத்தப்பட்டது. இதில் 4 மருத்துவமனைகள் சென்னையில் உள்ளன.

மருந்து ஆய்வாளர்கள் உதவியுடன் நடைபெற்ற இந்த சோதனையின்போது கைப்பற்றப்பட்ட மருந்துகள் மத்திய மருந்துகள் ஆய்வகத்துக்கு அனுப்பப்பட்டுள்ளன.​ இந்த ஆய்வகத்தின் முடிவுகள் வந்த பிறகு சம்பந்தப்பட்ட மருத்துவமனை அதிகாரிகள் மீது நடவடிக்கை எடுக்கப்படும். காலாவதி ஆவதற்கான கால அவகாசம் குறைவாக உள்ள மருந்துகளை வாங்கியது,​​ காலாவதியான பிறகும் மருந்துகளை வைத்திருந்தது உள்ளிட்ட முறைகேடுகள் இந்த சோதனையின் போது கண்டுபிடிக்கப்பட்டன.

மேலும்,​​ தரம் குறைந்த மருந்துகளை தயாரித்து விற்பனை செய்தது தொடர்பாக சென்னை,​​ புதுச்சேரியில் உள்ள 5 மருந்து விநியோக நிறுவனங்களில் சில நாள்களுக்கு முன்னர் சோதனை நடத்தப்பட்டது.​ இந்திய மருந்து கட்டுப்பாட்டுத் தலைவர் அனுமதித்த விதிகளை மீறி தரம் குறைந்த,​​ சுகாதாரத்துக்கு கேடான வகையில் தயாரிக்கப்பட்ட மருந்துகள் இந்த நிறுவனங்களின் மூலம் விற்பனைக்கு அனுப்பப்பட்டது தெரியவந்தது.​

இந்த சோதனையின் போது,​​ நிராகரிக்கப்பட்ட 16 வகையான மருந்துகளும்,​​ பவுடர்கள் அடங்கிய 8 பீப்பாய்களும் கண்டுபிடிக்கப்பட்டது.​ இவை அனைத்தும் மருந்து கட்டுபாட்டு ஆய்வாளர்கள் மூலம் பறிமுதல் செய்யப்பட்டு அவற்றின் மாதிரிகள் ஆய்வகங்களுக்கு அனுப்பப்பட்டுள்ளன.​ ஆய்வு முடிவுகள் வந்த பின்னர் இந்த நிறுவனங்கள் மீது உரிய சட்ட நடவடிக்கை எடுக்கப்படும்.

மேலும் காலாவதியான சில வகை மருந்துகள் அவற்றின் உற்பத்தி நிறுவனங்களுக்கு அனுப்பப்படாமல் விநியோக நிறுவனங்களிலேயே இருப்பு வைக்கப்பட்டிருந்தது,​​ மருந்து கட்டுப்பாட்டுத் துறையால் கட்டாயமாக்கப்பட்ட சான்றுகள் மற்றும் ஆவணங்கள் இல்லாமல் இங்கு மருந்துகள் வைக்கப்பட்டிருந்ததும் சோதனையின்போது தெரியவந்தது.

இந்த வழக்குகளில் புலன் விசாரணை ஆரம்ப நிலையில் இருப்பதால்,​​ சம்பந்தப்பட்ட மருத்துவமனைகள்,​​ மருந்து விநியோக நிறுவனங்களின் பெயர்களை வெளியிடுவது நிறுத்தி வைக்கப்பட்டுள்ளது.​ ஆய்வு முடிவுகள் வந்த பிறகு சம்பந்தப்பட்டவர்கள் மீது சட்டப்படியான நடவடிக்கை எடுக்கப்படும் எ‌ன்று அசோ‌க்குமா‌ர் கூ‌றினா‌ர்.

மத்திய அரசு மருத்துவமனைகளைத் தொடர்ந்து தமிழகத்திலுள்ள தனியார் மருத்துவமனைகளிலும் காலாவதி மருந்துகள் விநியோகிக்கப்படுவது தொடர்பாக சோதனையிட தமிழக அரசு கேட்டுக் கொண்டால் அங்கும் சோதனை நடத்த சி.பி.ஐ தயார் நிலையில் இருப்பதாக சென்னை மண்டல டி.ஐ.ஜி அருணாச்சலம் தெரிவித்தார்.