தலைவர்கள் கைது எதிரொலி: தாய்லாந்து முழுவதும் கலவரம் பரவியது; கோவிலுக்குள் 9 பேர் சுட்டுக் கொலை

by **சிவா** Fri May 21, 2010 1:31 am

தாய்லாந்து நாட்டில், பிரதமர் பதவி விலகி பாராளுமன்ற தேர்தலை நடத்த வேண்டும் என்று வற்புறுத்தி முன்னாள் பிரதமர் தக்ஷின் ஆதரவாளர்கள் கடந்த மார்ச் மாதம் 14-ந் தேதியில் இருந்து தொடர் போராட்டம் நடத்தி வருகிறார்கள்.

2 மாதமாக நடந்து வரும் இந்த போராட்டத்தை ஒடுக்க தாய்லாந்து அரசு எடுத்த முயற்சிகள் அனைத்தும் தோல்வி அடைந்து விட்டன. தலைநகரம் பாங்காங்கில் புகுந்துள்ள போராட்டக் காரர்கள் அங்குள்ள வணிக வளாகம், கோவில்கள் ஆகியவற்றை கைப்பற்றி அங்கிருந்தபடி போராட்டத்தை தொடர்ந்து வருகின்றனர்.

அவர்களை ஒடுக்க ராணுவத்தை ஈடுபடுத்தி உள்ளனர். முதலில் சாதாரண நடவடிக்கைகளை எடுத்த ராணுவம் இப்போது துப்பாக்கி சூடு உள்ளிட்ட பயங்கர நடவடிக்கைகளில் இறங்கி உள்ளது.

இதனால் போராட்டகாரர்களுக்கும், ராணுவத்துக்கும் இடையே பல இடங்களில் நேற்று மோதல் நடந்தது. ராணுவம் நடத்திய துப்பாக்கி சூட்டில் 30-க்கும் மேற்பட்டோர் கொல்லப்பட்டனர்.

பொதுமக்கள் உயிரிழைப்பை தடுக்க போராட்டக்குழு தலைவர்கள் பலர் ராணுவத்திடம் சரண் அடைந்தனர். அவர்கள் அனைவரும் கைது செய்யப்பட்டனர்.

இதனால் போராட்டக்காரர்கள் மேலும் ஆத்திரம் அடைந்து வன்முறையில் இறங்கினார்கள். தலைநகரம் பாங்காக்கில் நடந்த கலவரம் இப்போது நாடு முழுவதும் பரவி உள்ளது.

பாங்காக் முழுவதும் நேற்று இரவு பல கட்டிடங்களுக்கு தீ வைத்தனர். தென்கிழக்கு ஆசியாவிலேயே பெரிய வணிக வளாகமான “சென்ட்ரல் வேர்ல்டு” கட்டிடம் உள்பட 27 புகழ் பெற்ற கட்டிடங்களுக்கு தீ வைத்தனர்.

கடந்த 1 வாரத்தில் மட்டும் கலவரத்தில் 40 பேர் கொல்லப்பட்டு உள்ளனர். நேற்றைய கலவரத்தில் மட்டும் 14 பேர் கொல்லப்பட்டனர்.

இந்த நிலையில் இன்று அதிகாலை கோவில் உள்ளே புகுந்து இருந்த போராட்டக்காரர்கள் மீது ராணுவ வீரர்கள் துப்பாக்கி சூடு நடத்தினார்கள். இதில் 9 பேர் கொல்லப்பட்டனர்.

கலவரம் நாடு முழுவதும் பரவி இருப்பதால் 21 பிராந்தியங்களில் ஊரடங்கு உத்தரவு பிறப்பிக்கப்பட்டு உள்ளது.

பிரதமர் அபிசித் வெஜே ஜிவா போராட்டக்காரர்கள் உடனே வன்முறையை கைவிட்டு அமைதி திரும்ப உதவ வேண்டும் என்று வேண்டுகோள் விடுத்துள்ளார்.