வன்முறையில் 25 பேர் பலி: தாய்லாந்தில் கலவரம் நீடிப்பு

by ரபீக் Tue May 18, 2010 12:43 pm

தாய்லாந்தில் பிரதமர் அபிஜித் வெஜாஜிவா தலைமையிலான அரசு பதவி விலக கோரியும், பாராளுமன்றத்துக்கு தேர்தல் நடத்த கோரியும் தலைநகர் பாங்காக்கில் எதிர்க்கட்சிகள் போராட்டம் நடத்தி வருகின்றன. இந்த போராட்டம் கடந்த 2 மாதமாக நடந்து வருகிறது.

தற்போது இந்த போராட்டம் கலவரமாக மாறியுள்ளது. போராட்டக்காரர்களுக்கும், ராணுவத்துக்கும் இடையே மோதல் ஏற்பட்டுள்ளது.

ராணுவம் நடத்திய துப்பாக்கி சூட்டில் இதுவரை 25 பேர் பலியாகி உள்ளனர். தொடர்ந்து வன்முறை சம்பவங்கள் அதிகரித்து வருவதால் கலவரம் நீடிக்கிறது. பாங்காக்கில் இருந்து மற்ற நகரங்களுக்கும் பரவுகிறது.

எனவே ராணுவம் தொடர்ந்து நடவடிக்கை மேற்கொண்டு வருகிறது. போராட்டக்காரர்கள் சுமார் ஒரு சதுர மைல் பரப்பளவிற்கு முகாம்கள் அமைத்து இருந்தனர். அவைகள் ராணுவத்தால் ஆக்கிரமிக்கப்பட்டுள்ளன.

தொடர்ந்து வன்முறை அதிகரித்து வருவதால் தாய்லாந்தில் நாளை (திங்கட்கிழமை, முதல் பள்ளிகளை மூட உத்தரவிடப்பட்டுள்ளது. இதற்கிடையே, பிரதமர் அபிஜித் வெஜாஜிவா டெலிவிஷனில் தோன்றி பேசினார்.

அப்போது அவர் கூறியதாவது:-

கடந்த 2 மாதமாக தொடர்ந்து கலவரம் நடப்பதால் அதை அடக்க ராணுவ நடவடிக்கை எடுக்கப்பட்டது. போராட்டக்காரர்களால்தான் வன்முறை சம்பவங்கள் நிகழ்கிறது. அதை ராணுவம் தடுத்து வருகிறது.

தொடர்ந்து வன்முறை சம்பவங்கள் நடைபெற்று வருவதால் ஊரடங்கு உத்தரவு பிறப்பிக்க முடிவு செய்யப்பட்டுள்ளது.

இவ்வாறு அவர் தெரிவித்தார்.