மொபைல் தயாரிப்பில் சென்னை முதலிடம்

by **சிவா** Mon Jun 29, 2009 2:55 am

நோக்கியாவின் மொபைல் போன் தொழிற்சாலைகளில் அதிகமான எண்ணிக்கையில் தயாரிப்பினை மேற்கொள்ளும் தொழிற்சாலையாக சென்னை நோக்கியா உலகில் முதல் இடத்தைப் பெற்றுள்ளது. சீனாவில் நோக்கியா இரண்டு தொழிற்சாலைகளை இயக்கி வந்த போதிலும் சென்னையில் தயாராகும் நோக்கியா மொபைல் போன்களின் எண்ணிக்கை சீனாவில் தயாரிக்கப்படும் நோக்கியா போன்களின் எண்ணிக்கையைக் காட்டிலும் அதிகமாக உள்ளது. சரியான எண்ணிக்கை குறித்து நோக்கியா எதுவும் கூறவில்லை என்றாலும் ஓராண்டில் சென்னை நோக்கியாவில் தயாராகும் போன்களின் எண்ணிக்கை 10 கோடியைத் தாண்டும் என்று கூறப்படுகிறது.

ஏறத்தாழ 8,000 ஊழியர்களைக் கொண்டுள்ள நோக்கியாவின் சென்னை தொழிற்சாலையில் 70 சதவிகிதம் பேர் பெண்கள் என்பது குறிப்பிடத்தக்கது. நோக்கியாவிற்கு ஒன்பது தொழிற்சாலைகள் உலகெங்கும் இயங்கி வருகின்றன. இந்தியா, பின்லாந்து, சீனா, கொரியா, மெக்ஸிகோ, பிரேசில், ரொமானியா மற்றும் ஹங்கேரியில் இவை உள்ளன. சென்னையில் தயாரிக்கப்படும் நோக்கியாவின் ஜி.எஸ்.எம். மொபைல் போன்கள் 50 நாடுகளுக்கு மேல் ஏற்றுமதி செய்யப்படுகின்றன.