லஞ்சுக்கு முன் ஒரு கிளிக் !!!!!!!!!!

சாப்பிடுவது என்பது பசியாறுவதற்கான செயலாக இருந்தாலும் சாப்பிட செல்வது என்பது ஒரு சமூக நிகழ்வுதான். உறவினர்கள் புடைசூழ விருந்து சாப்பிடுவது ஒருவகை மகிழ்ச்சி என்றால் நண்பர்கள் குழõமோடு சென்று மதிய உணவு சாப்பிடுவது மற்றொரு வகையான மகிழ்ச்சி. அதிலும் நகரத்து மாந்தர்களுக்கு வாரந்தோறும் அல்லது மாதத்தில் ஒருமுறையேனும் நண்பர்களோடு சென்று மதிய உணவு சாப்பிடுவது என்பது மட்டற்ற மகிழ்ச்சி தரக்கூடியதாகவே இருக்கிறது. இப்படி லஞ்சுக்கு செல்வதை ஒரு இனிமையான சமூக நிகழ்வு என்றும் சொல்லலாம்.
.
நட்பை பரிமாறிக் கொண்டு பசியாறுவதில் உள்ள சுகமே தனிதான். ஆனால் இப்படி லஞ்சுக்கு ஏற்பாடு செய்து நண்பர்களை திரட்டிச் செல்வதில் நடைமுறை சிக்கல் இல்லாமல் இல்லை. நண்பர்களை தொலைபேசியில் தேடிப்பிடிக்க வேண்டும். சிக்காதவர்களுக்கு இமெயில் அல்லது எஸ்எம்எஸ்சில் தகவல் சொல்ல வேண்டும். அதன் பிறகு எல்லோருக்கும் பிடித்தமான ஓட்டலை தேர்வு செய்ய வேண்டும். அதன் பிறகுதான் லஞ்சுக்கு செல்ல முடியும்.
சரியாக திட்டமிடாவிட்டால் எல்லாமே பாழாகி விடும். குறித்த நேரத்துக்குள் எல்லோருக்கும் தகவல் சொல்லி அனைவரது ஒப்புதலையும் பெற்று சாப்பாட்டு படையெடுப்பை ஆரம்பிப்பதற்குள் சில நேரங்களில் போதும் போதும் என்றாகிவிடும்.
இதற்கு மாறாக உட்கார்ந்த இடத்தில் இருந்தே ஒருசில கிளிக்குகளில் எல்லாவற்றையும் ஏற்பாடு செய்ய முடிந்தால் எப்படி இருக்கும். லஞ்ச் வாலா டாட்காம் இணையதளம் இதைத்தான் செய்கிறது.
லஞ்சுக்கு என்ன என்னும் கேள்விக்கு விடையளிப்பதற்காக துவக்கப்பட்டுள்ள இந்த இணைய தளம் நண்பர்களோடு சாப்பிட செல்லும் நிகழ்வை சுலபமாக்கி இனிமையாகவும் மாற்றி தருகிறது. ஒன்றாக சாப்பிட செல்லும் முன் ஏற்படக்கூடிய கேள்விகளுக்கும், குழப்பங்களுக்கும் இந்த தளத்தின் மூலமே எளிதாக விடை கண்டுவிடலாம்.
சாப்பிடச் செல்லும் முன் எழக்கூடிய முதல் கேள்வி எந்த ஓட்டலுக்கு செல்வது? இந்த தளத்தில் ஒவ்வொரு நகரிலும் உள்ள ஓட்டல்கள், அவற்றின் முகவரியோடு பட்டியலிடப்பட்டது. அந்த பட்டியலை பார்த்து விரும்பிய ஓட்டலை தேர்வு செய்யலாம்.
அந்த ஓட்டல் தொடர்பாக சக சாப்பாட்டு பிரியர்களின் விமர்சன குறிப்புகளும் இதற்கு கை கொடுக்கலாம். புதிய ஓட்டல் என்றால் அங்கு செல்வதற்கான வழியும் வரைபடம் போட்டு காட்டப்பட்டு விடுகிறது. அடுத்த பிரச்சனை நண்பர்களை அழைப்பது தானே? இதற்காக போனுக்கு மேல் போன் செய்து விட்டு, அடுத்தடுத்து இமெயில் அனுப்ப வேண்டிய அவசியம் எல்லாம் இல்லை. யாரையெல்லாம் அழைக்க வேண்டுமோ அவர்களுக்கெல்லாம் ஒரே கிளிக்கில் அழைப்பை அனுப்பி வைக்கலாம்.
இந்த தளத்தில் உறுப்பினராக சேரும் போது, வலைப்பின்னல் சேவையான பேஸ் புக் கணக்கை கொண்டு உள்ளே நுழைவதால் நம்முடைய நண்பர்கள் பட்டியலில் இருப்பவர்களுக்கெல்லாம் அழைப்பு அனுப்புவது மிகவும் சுலபம்.
அழைப்பை பெற்றவர்கள் அதனை ஏற்பதும், மறுப்பதும் இன்னும் சுலபமானது. சம்மதம் என்று கிளிக் செய்தால் அவர்கள் வருவதாக பொருள். இல்லை வர முடியாது என்றோ, வேறு ஓட்டலுக்கு செல்லலாம் என்றோ அவர்கள் பரிந்துரைக்கலாம். இதனை வாக்களிக்கும் வசதி என்று லஞ்ச்வாலா குறிப்பிடுகிறது. இந்த வசதியின் மூலம் எல்லோருக்கும் ஏற்புடைய ஓட்டலை தேர்வு செய்து விருந்துண்ண செல்லலாம். ஆக ஒரு சில கிளிக்கிலேயே இன்று எந்த ஓட்டலுக்கு செல்லலாம் என்பதை நண்பர்கள் அழகாக திட்டமிடும் வசதியை இந்த தளம் வழங்குகிறது.
இணைய ரிசர்வேஷனை வழங்கும் ஓபன் டேபிள் தளத்தோடு ஒப்பந்தம் இருப்பதால் இந்த தளத்தின் மூலமே கூடசாப்பிட செல்லும் ஓட்டலில் நமக்கான இடத்தைமுன்பதிவு செய்துகொள்ளலாம். அதோடு ஓட்டல்களில் வழங்கப்படும் சலுகை கூப்பன்களையும் இந்த தளத்தின் மூலம் பயன்படுத்தி கொள்ளலாம். இந்த தளத்தை உருவாக்கிய அமெரிக்க நண்பர்கள் மதிய உணவுக்கு சரியாக திட்டமிட தடுமாறிக் கொண்டிருந்த போது இந்தியாவின் மும்பையில் மதிய உணவு சேவையை மிக அழகாக வழங்கி கொண்டிருக்கும் டப்பா வாலாக்கள் பற்றி யோசித்து அதே போல ஒரு சேவையை இன்டர்நெட் மூலம் வழங்க முடியாதா என்று யோசித்து அதன் பயனாக, லஞ்சுவாலாவை உருவாக்கியுள்ளனராம்.
இந்த தளத்தில் உறுப்பினராக சேர்ந்து நண்பர்களையும் உறுப்பினராக்கி கொண்டால் மதிய உணவுக்கான திட்டமிடலை சுலபமாகமேற்கொள்ளலாம். மதிய உணவு என்றில்லை. இந்த வசதியை வேறு எந்த சமூக நிகழ்வுகளை திட்டமிடவும் தாராளமாக பயன்படுத்தி கொள்ளலாம்.

LUNCHWALA

ஹூம்... இதுவரை லஞ்ச்சுக்கு யாருமே தயாராகலையா பாலா..?

மெனு கொஞ்சம் பெருசா இருப்பதால் இந்த பிரச்சினை...!

பாராட்டுக்குரிய தளம் தான்..!

பாலா அண்ணா அப்படியே இலவசமா பில் கட்டவும் இணையத்தளம் இருந்தா சொல்லுங்கண்ணே