இந்தோனிசியத் தடை தொடருமானால் மலேசியா வேறு இடங்களைத் தேடும்

**சிவா** · **சிவா** Mon Jun 29, 2009 2:14 am

மலேசியாவில் வீட்டுப் பணிப் பெண்களாக தனது குடிமக்கள் வேலை செய்யச் செல்வதற்கு இந்தோனிசியா விதித்த தடை நீடிக்குமானால் மலேசியா வீட்டுப் பணிப் பெண்களை வேலைக்கு சேர்ப்பதற்கு மற்ற அண்டை நாடுகளை நாடும்.

புதிய குடிநுழைவுத் தொழிலாளர் ஒப்பந்தம் மீதான விவாதம் கோலாலம்பூரில் ஜுலை மாத மத்தியில் நடைபெறும் வரையிலாவது மலேசியாவுக்கு வீட்டுப்பணிப் பெண்களை அனுப்புவதை இந்தோனிசியா நிறுத்தி வைக்கும் என்று அதன் தொழிலாளர் அமைச்சர் எர்மான் சுப்பார்னோ வியாழக்கிழமை கூறியிருந்தார்.

43 வயதான மலேசிய மாது ஒருவர் மீது தாம் வீட்டுப் பணிப் பெண்ணாக வேலைக்கு அமர்த்தியிருந்த இந்தோனிசியா மாதுவுக்கு உடல் ரீதியாக காயங்களை விளைவித்ததாகக் குற்றம் சாட்டப்பட்ட பின்னர் இந்தோனிசிய அரசாங்கம் அந்தத் தடையை அறிவித்தது.

அந்த வீட்டுப் பணிப்பெண்ணை பிரம்பால் அடித்ததாகவும் கொதிக்கும் நீரை ஊற்றியதாகவும் அவர் மீது குற்றம் சாட்டப்பட்டுள்ளது.

இந்தோனிசியா தடையை அறிவிப்பதற்கு முன்னர் விவாதிப்பதற்கு பல்வேறு வழிகளை ஆராய்ந்திருக்க வேண்டும் என்று மனித வள அமைச்சர் டாக்டர் எஸ் சுப்ரமணியம் கூறியதாக பெர்னாமா தகவல் வெளியிட்டுள்ளது.

” அந்த முடிவு (வீட்டுப்பணிப் பெண்களைத் தற்காலிகமாகத் தடை செய்வது) இறுதியானது என்றால் நாங்கள் மற்ற ஆசியான் நாடுகளிலிருந்து வீட்டுப் பணிபெண்களை வேலைக்கு எடுப்பது போன்ற, கிடைக்கக் கூடிய மற்ற வாய்ப்புக்களை முடிவு செய்வோம்” என்றார் அவர்.

ஆண்டுக்கு வீட்டுப் பணிப் பெண்கள் துன்புறுத்தப்பட்ட 50 சம்பவங்கள் அறிவிக்கப்படுகின்றன.

இந்தோனிசிய வீட்டுப் பணிப்பெண்களை துன்புறுத்தியதாக கண்டுபிடிக்கப்படும் எவர் மீதும் கடும் நடவடிக்கை எடுக்கப்படும் என்று ஏற்கனவே பிரதமர் நஜிப் அப்துல் ரசாக் வாக்குறுதி அளித்துள்ளார்.

வீட்டுப்பணிப் பெண்களின் நலன்களில் கூடுதல் அக்கறை காட்டுமாறும் அவர் முதலாளிகளைக் கேட்டுக் கொண்டார்.

இந்த நாட்டில் வேலை செய்யும் 300,000 இந்தோனிசிய வீட்டுப் பணிப் பெண்களில் ஆண்டுக்கு சராசரி 50 பணிப்பெண்கள் துன்புறுத்தப்பட்ட சம்பவங்கள் அறிவிக்கப்படுவதாக சுப்ரமணியம் கூறினார்.

வீட்டு பணிப் பெண்களுக்கான வேலை நிபந்தனைகள் தொடர்பில் எந்த சட்டமும் மலேசியாவில் கிடையாது. என்றாலும் பாலியல் துன்புறுத்தல், சம்பளம் கொடுக்காமல் இருப்பது, மோசமான வேலைச் சூழ்நிலைகள் ஆகியவற்றுக்கு எதிராக அவர்களைப் பாதுகாப்பதற்கு சட்டம் இயற்றப் போவதாக அரசாங்கம் வாக்குறுதி அளித்துள்ளது.

மலேசியாவில் 1.2 மில்லியன் இந்தோனிசியர்கள் சட்டப்பூர்வமாக வேலை செய்து வருகின்றனர். 800,000 பேர் சட்டவிரோதமாக வேலை செய்வதாக மதிப்பிடப்பட்டுள்ளது.

இந்தோனிசியத் தடை தொடருமானால் மலேசியா வேறு இடங்களைத் தேடும்

இந்தோனிசியத் தடை தொடருமானால் மலேசியா வேறு இடங்களைத் தேடும்

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக