அஸ்லன் ஷா ஹாக்கி இறுதிப் போட்டியில் இந்தியா

ஈப்போ (மலேசியா), மே 15: மலேசியாவில் நடைபெற்றுவரும் அஸ்லன் ஷா ஹாக்கிப் போட்டியின் இறுதி ஆட்டத்துக்கு இந்தியா தகுதிபெற்றது.

சனிக்கிழமை நடந்த போட்டியில் இந்தியா, 7-1 என்ற கோல் கணக்கில் எகிப்தை வென்றது. இந்திய வீரர் மஹாதிக் மூன்று கோல்கள் அடித்தார். கேப்டன் ராஜ்பால் சிங், ரூபிந்தர் பால் சிங், துஷார் கண்டேகர், சர்வன்ஜித் சிங் ஆகியோர் தலா ஒரு கோல் அடித்தனர். எகிப்து அணியில் அப்த் எல் ஹகீம் அகமது ஒரு கோல் அடித்தார்.

முதல் பாதியில் இந்திய வீரர்கள் கோல் போடத் திணறினர். ஆனால் இரண்டாவது பாதியில் எகிப்து வீரர்களின் சுணக்கத்தால் இந்திய வீரர்கள் வீறுகொண்டு எழுந்து கோல் மழை பொழிந்தனர்.

ஞாயிற்றுக்கிழமை நடைபெறும் இறுதிப் போட்டியில் இந்தியா, கொரியாவை எதிர்கொள்கிறது.

இந்தியா இதுவரை நான்கு முறை பட்டம் வென்றுள்ளது (1985, 1991, 1995, 2009). 2008-ம் ஆண்டு நடந்த இறுதிப் போட்டியில் ஆர்ஜெண்டீனாவுக்கு எதிராக சடன் டெத்தில் இந்தியா தோல்வியுற்றது.

முன்னதாக இறுதிப் போட்டி தகுதிக்கான ஆட்டத்தில், பாகிஸ்தானை 4-2 என்ற கோல் கணக்கில் வீழ்த்தி கொரியா இறுதிப் போட்டிக்குள் நுழைந்தது.

ஆஸ்திரேலியா - சீனா இடையிலான போட்டியில் 4-0 என்ற கோல் கணக்கில் ஆஸ்திரேலியா வெற்றிபெற்றது. இப்போட்டியில் ஆஸ்திரேலியா வெற்றிபெற்றிருந்தாலும் புள்ளிகள் அடிப்படையில் கொரியா இறுதிப் போட்டிக்குத் தகுதிபெற்றது.

பகிர்வுக்கு நன்றி தல .