11 பெண்களை கற்பழித்த ஆஸ்கர் விருது பிரபலம்

by **சிவா** Sun Jun 28, 2009 11:54 pm

நியூயார்க் : ஆஸ்கர் விருது பெற்ற பிரபல ஹாலிவுட் பாடலாசிரியர் ஒருவர், 11 பெண் களை ஆசை வார்த்தை காட்டி, ஏமாற்றி கற்பழித்ததாக அமெரிக்க போலீசாரால் குற்றம் சாட்டப்பட்டுள்ளார்.

ஹாலிவுட் திரைப்படங்களுக்கு பாடல் எழுதுவதில் புகழ் பெற்றவர் ஜான் புரூக்ஸ். கடந்த 1977ல், இவர் எழுதிய பாடலுக்காக இவருக்கு ஆஸ்கர் விருது கிடைத்தது. இதன் மூலம் ஹாலிவுட்டில் இவர் மிகவும் பிரபலமானார். இந்த புகழை அவர், தனக்கு சாதகமாகப் பயன்படுத்தி, அப்பாவி பெண்களை ஏமாற்றத் துவங்கினார். திரைப்படங்களில் நடிக்க வாய்ப்பு ஏற்படுத்தித் தருவதாகக் கூறி, தனது வீட்டுக்கு பெண்களை வரவழைத்து, அவர்களைக் கற்பழித்துள்ளார்.

கடந்த 2005ல் இருந்து 2008 வரை இவரிடம் சிக்கி, 11 பெண்கள் தங்கள் வாழ்க்கையைத் தொலைத்துள்ளதாக, அமெரிக்க போலீசார் குற்றம் சாட்டியுள்ளனர். ஜான் புரூக்சுக்கு உதவியதாக அவரது பெண் உதவியாளர் மீதும் குற்றம் சாட்டப்பட்டுள்ளது.

இதுகுறித்து ஜான் புரூக்ஸ் தரப்பில் கூறுகையில், "அவருக்கும், இந்த குற்றச்சாட்டுகளுக்கும் எந்த தொடர்பும் இல்லை; அவர் நிரபராதி' என்றனர்.