பெண் எம்.எல்.ஏ.,வுக்கு அவமதிப்பு: ம.பி., சபாநாயகர் ரோகாணி அழுதார்

பெண் எம்.எல்.ஏ.,வுக்கு அவமதிப்பு: ம.பி., சபாநாயகர் ரோகாணி அழுதார்
மே 14,2010,00:00 IST







போபால்: காங்கிரஸ் எம்.எல்.ஏ.,க்கள் தன்னை தரக்குறைவாக பேசியதாக பா.ஜ., பெண் எம்.எல்.ஏ., கூறிய குற்றச்சாட்டைக் கேட்டு சபாநாயகர் கண்கலங்கி அழுதார். நேற்று முன்தினம் நடந்த இச்சம்பவம் பெரும் பரபரப்பை ஏற்படுத்தியது.

சத்ரபூர் தொகுதியைச் சேர்ந்த பா.ஜ., பெண் எம்.எல்.ஏ., லலிதா யாதவ். இவர், சபாநாயகரிடம் நேற்று புகார் தெரிவித்தார். அதில், நேற்று முன்தினம் சபையில் தான் நுழையும் போது, காங்கிரஸ் எம்.எல்.ஏ.,க்கள் கிண்டலடித்ததாக கூறினார். அதில் ஒன்று, 'பியூட்டி பார்லரில்' இருந்து வருகிறீர்களா என்று கேட்டதாக வாசகத்தைக் கூறினார். கடந்த நான்கு நாட்களாக ம.பி.,யை 'தங்க மாநிலமாக' மாற்றுவதற்கான சிறப்புக் கூட்டம் நடந்தது . இதை காங்கிரஸ் எம்.எல்.ஏ.,க்கள் புறக்கணித்து வருகின்றனர். ஒவ்வொருவராக மாநிலம் குறித்து பேசும் போது லலிதா யாதவ் இந்தப்புகாரைத் தெரிவித்தார்.

ஆனால் சபாநாயகர் ஈஸ்வர் தாஸ் ரோகாணி, தன் அறையில் அமர்ந்து இருந்த போது கண்கலங்கி அழுது விட்டார். முதல்வர் சவுகான் உட்பட பலர் வந்து அவரை தேற்றியதாக கூறப்பட்டது. இச்சம்பவம் ஒரு டிராமா என்று காங்கிரஸ் எம்.எல்.ஏ.,க்கள் கூறினர். இதற்கு முன் சபையில் காங்கிரஸ் பெண் எம்.எல்.ஏ.,க்களை இரட்டை அர்த்தம் கொண்ட வார்த்தைகளால் பா.ஜ.,வினர் பேசவில்லையா என்று கேட்டனர். இனிமேலாவது முதலைக் கண்ணீர் விடாமல் சபாநாயகர் இருக்க வேண்டும் என்றனர்.