இந்திய கிரிக்கெட் வீரர்கள் மதுபான"பாரி'ல் ரசிகர்களுடன் வாக்குவாதம்

by sathyan Fri May 14, 2010 2:15 am

செயின்ட் லூசியா, மே 13: மேற்கிந்தியத் தீவுகளில் உள்ள மதுபான பார் ஒன்றில், ரசிகர்களுடன் வாக்குவாதத்தில் ஈடுபட்டதாக இந்திய கிரிக்கெட் வீரர்கள் மீது புகார் எழுந்துள்ளது.

கிராஸ் ஐலெட் தீவில் உள்ள புகழ்பெற்ற டகீலா ஜோஸ் மதுபான பாருக்கு புதன்கிழமை இரவு இந்திய வீரர்கள் 6 பேர் சென்றுள்ளனர். அப்போது பாரில் இருந்த சிலர், இந்திய அணியின் தோல்வி குறித்து வீரர்களிடம் கேள்வி எழுப்பினர். இதனால் வீரர்களுக்கும், கிரிக்கெட் ரசிகர்களுக்கும் இடையே வாக்குவாதம் ஏற்பட்டது.

அப்போது ரசிகர்கள் வீரர்களை வசைமாரி பொழிந்தனர். இதனால் ஆத்திரமடைந்த ஜாகீர் கான் மற்றும் ஆஷிஸ் நெஹ்ரா ஆகிய இருவரும் ரசிகர்களுடன் தீவிர வாக்குவாதத்தில் ஈடுபட்டனர். உடனடியாக அங்கு ஓடிவந்த யுவராஜ் சிங் வீரர்களை சமாதானப்படுத்தி அழைத்துச் சென்றார். அப்போது ஹர்பஜன் சிங், ரோஹித் சர்மா மற்றும் சுரேஷ் ரெய்னா ஆகியோரும் அங்கிருந்ததாகக் கூறப்படுகிறது.

இதுதொடர்பாக வெளியான தகவலை யுவராஜ் சிங் மறுத்துள்ளார். இந்த விஷயத்தை பத்திரிகைகளும், மின் ஊடகங்களுக்கும் பெரிதுபடுத்த வேண்டாம் என்றும் இணையதளம் ஒன்றில் யுவராஜ் சிங் தெரிவித்துள்ளார்.