கழிப்பறை வருமானம் பாதிப்பு : கேன்டீன் அருகே ஒதுங்கியவருக்கு அடி, உதை

by sathyan Wed 12 May 2010 - 23:54

கழிப்பறை வருமானம் பாதிப்பு : கேன்டீன் அருகே ஒதுங்கியவருக்கு அடி, உதை

திருநெல்வேலி : சாத்தூர் அருகே கேன்டீனில் வனத்துறை அதிகாரி ஒருவருக்கு அடி உதை விழுந்ததில், ரத்தம் சொட்ட சொட்ட அவர் பயணத்தை தொடர்ந்துள்ளார். கன்னியாகுமரியில் இருந்து பெங்களூரு செல்லும் அரசு விரைவு போக்குவரத்து பஸ் ஒன்று நேற்று முன்தினம் இரவு 10.30 மணியளவில் சாத்தூர் அருகே ஒரு கேண்டீனில் நின்றது. அதிக பஸ்கள் அங்கு நிறுத்தப்பட்டிருந்ததால் கூட்டம் இருந்தது. ஆண் பயணிகள் சிலர் கேண்டீனில் உள்ள கழிவறையை பயன்படுத்தாமல் ரோட்டோரமாக சிறுநீர் கழித்துள்ளனர். ரோட்டோரமாக சிறுநீர் கழிப்பதால் வருமானம் பாதிக்கப்படுவதால் அதற்காக கையில் கம்போடு நிற்கும் அடியாள் நேற்று பயணி ஒருவரை தாக்கியுள்ளார். தலையில் பயணிக்கு காயம்பட்டதால் சக பயணிகள் பரபரப்படைந்தனர். காயம்பட்ட நபர் சேலம் மாவட்டம் ஆத்தூரை சேர்ந்த எஸ். கருணாநிதி(44). கன்னியாகுமரி மாவட்ட வனத்துறையில் கம்ப்யூட்டர் பிரிவில் பணியாற்றுகிறார்.

சொந்த ஊருக்கு செல்லும் போது இச்சம்பவம் நடந்தது. இருப்பினும் சிகிச்சையளிக்க வாய்ப்பில்லாமல் பஸ் கிளம்பியது. அந்த பஸ்சிலும் முதலுதவி உபகரணங்கள் எதுவும் இல்லாததால் அவர் ரத்தம் சொட்ட சொட்ட பஸ்சில் பயணித்தார். பஸ்சில் சென்ற சக பயணி ஒருவர், இதுகுறித்து நமக்கு தகவல் தெரிவித்தார். நாமும் சென்னையில் உள்ள அரசு விரைவு பஸ் கட்டுப்பாட்டுஅறை, அரசு விரைவு பஸ் 24 மணிநேர குறைதீர்க்கும் பிரிவு ஆகியவற்றிற்கு தகவல் தெரிவித்தோம். சென்னை அதிகாரிகள் உடனடியாக அந்த பஸ் டிரைவர், கண்டக்டரை தொடர்புகொண்டனர். இரவில் 12மணியளவில் மதுரையில் அந்த பயணிக்கு சிகிச்சைஅளிக்க ஆலோசனை கூறியதாகவும், சம்பந்தப்பட்டபயணி குடிபோதையில் இருப்பதாகவும் கூடுதல் தகவல் தெரிவித்தனர். தனியார் மோட்டல்கள் குறித்து அண்மையில் சட்டசபையிலும் விவாதம் நடந்தது. கழிப்பறைகள் மூலம் கிடைக்கும் வருமானம் பாதிக்கப்படுகிறதே என்பதற்காக பயணிகளை ஆயுதங்களால் தாக்கும் விபரீதத்தை எப்படி பொறுத்துக் கொள்வது