அன்று மருந்துகள்; இன்று உணவுகள்: காலாவதியை கண்டுகொள்ளாத அதிகாரிகள்

சாந்தன் · சாந்தன் Sun May 09, 2010 8:39 am

விலை மதிக்க முடியாத மனித உயிர்களை பாதிப்பிற்குள்ளாக்கும் காலாவதி உணவு மற்றும் மருந்துகள் விற்பனை செய்பவர்கள் மீது என்ன நடவடிக்கை எடுக்கப்படும் என்ற கேள்விக்குறி எழுந்துள்ளது.

சமீபத்தில், மருந்துகளின் காலாவதி விவரங்களை மாற்றி மீண்டும் விற்பனைக்கு விட்டதாக பலர் கைது செய்யப்பட்டு, மருந்து கடைகள் மற்றும் குடோன்களில் பல கோடி ரூபாய் மதிப்புள்ள மருந்துகள் கண்டுபிடிக்கப்பட்டன. இது தொடர்பாக மருந்து கட்டுப்பாட்டு அதிகாரிகளையும் சி.பி.சி.ஐ.டி., போலீசார் விசாரித்து வருகின்றனர். இந்நிலையில் தான் அடுத்த காலாவதி விவகாரம் பூதாகரமாக வெடித்துள்ளது. கடந்த வாரத்தில் சென்னை வண்ணாரப்பேட்டையில் உள்ள ஒரு கிடங்கில் இருந்து பல லட்சம் ரூபாய் மதிப்புள்ள காலாவதி உணவுப் பொருட்கள் கைப்பற்றப்பட்டு, விற்பனை செய்தவர்கள் கைது செய்யப்பட்டனர். மிகப் பெரிய டிபார்ட்மென்டல் ஸ்டோர்களில் தேங்கிய உணவுப் பொருட்களை மொத்தமாக வாங்கிவரும் இவர்கள், அவற்றை பாதி விலையில் விற்பனை செய்து வந்துள்ளனர். தாமதமாக விழித்துக்கொண்ட தமிழக அரசு, மாநிலம் முழுவதும் அதிரடி சோதனையை முடுக்கிவிட்டுள்ளது.

சென்னையில் இரண்டு நாட்கள் நடத்தப்பட்ட சோதனையில் 2,800 கிலோ மதிப்புள்ள காலாவதி உணவுப் பொருட்கள் கைப்பற்றப்பட்டன. மயிலாப்பூர், நுங்கம்பாக்கம், வண்ணாரப்பேட்டை, தண்டையார் பேட்டை உள்ளிட்ட பகுதிகளில் உள்ள மிகப் பெரிய டிபார்ட்மென்டல் கடைகளில்நடத்தப்பட்ட சோதனையில், குவியல் குவியலாக காலாவதி உணவுப் பொருட்கள் கைப்பற்றப் பட் டுள்ளன. 'இன்ஸ் டன்ட்' இட்லி, நூடுல்ஸ், இடியாப்பம் உள்ளிட்டவை, குளிர்பானங்கள், மசாலா வகைகள், பிஸ்கட் வகைகள் போன்றவை காலாவதியான நிலையிலும் விற்பனைக்கு வைக்கப்பட்டிருந்தது, சூப்பர் மார்க்கெட்களில் பொருட்கள் வாங்குவோரை அதிர்ச்சியில் ஆழ்த்தியுள்ளது. சில சூப்பர் மார்க்கெட்களில் அசைவ உணவு பொருட்கள், ஓராண்டுக்கும் மேலாக,'பிரிட்ஜில்' வைக்கப்பட்டு விற்பனை செய்யப்பட்டதும் கண்டுபிடிக்கப்பட்டுள்ளது.

இதற்கிடையில், மதுரை ஓட்டல் ஒன்றில், காலாவதியான உணவை சாப்பிட்ட ஒருவர் உயிரிழக்க, ஓட்டல்களும் தற்போது சுகாதாரத் துறை அதிகாரிகளின் சோதனை வலையில் சிக்கியுள்ளன. எந்த

அனுமதியுமின்றி குடிசைத் தொழில் போல் முறுக்கு, அதிரசம், கேக் வகைகள் தயாரிக்கப்பட்டு விற்கப்படுகின்றன. அவற்றில் தயாரித்த தேதி, காலாவதியாகும் தேதி போன்ற விவரங்கள் இருப்பதில்லை. மலிவான விலை, லாபம் அதிகம் என்பதால்,வியாபாரிகள் அவற்றைத்தான் விற்கின்றனர். இது தவிர, காலாவதியான டீ, காபிதூள்களும், 'ரீ பேக்கிங்' செய்யப்பட்டு, குறைந்த விலையில்விற்கப்படுகின்றன.

சாலையோர கடைகளில் ரோஸ்மில்க், பாதாம் பால், பழ ரசங்கள் இஷ்டம்போல் தயாரித்து விற்கப்படுகின்றன. இவற்றில் பெரும்பாலானவை சுகாதாரமான முறையில் தயாரிக்கப்படுவது இல்லை. சில நிறுவனங்கள், பொருட்களைதிரும்பப் பெறுவதில்லை என்பதால், அவற்றை எப்படியாவது, 'தள்ளிவிட' வேண்டிய நிலைக்கு வியாபாரிகள் தள்ளப் படுகின்றனர். கண்காணித்து நடவடிக்கை எடுக்கவேண்டிய சுகாதாரத் துறை அதிகாரிகள், கண்மூடி தூங்குகின்றனர். மாதம் தோறும் இவ்வளவு மாமூல் என நிர்ணயம் செய்து வசூலிப்பதில் தான் அக்கறை காட்டிவருகின்றனர். காலாவதியான, தரமற்ற மருந்து மற்றும் உணவுப் பொருட்களைவிற்பவர்கள் மட்டுமின்றி, அவற்றைக் கண்கானித்து, தடுக்காத அதிகாரிகள் மீது கடும் நடவடிக்கை எடுத்தால் மட்டுமே போலிகள் ஒழியும்.

நன்றி : தினமலர்

**சிவா** · **சிவா** Sun May 09, 2010 8:46 am

எங்கு சென்றாலும் லஞ்சத்தின் கோரப்பிடியில் அனைவரும் சீக்கிவிடுவதால், அனைத்து நடவடிக்கைகளும் உடனடியாக முடக்கப்பட்டு, கொள்ளையர்களின் ஆதிக்கமே மேலோங்கி வருகிறது!

அன்று மருந்துகள்; இன்று உணவுகள்: காலாவதியை கண்டுகொள்ளாத அதிகாரிகள்

அன்று மருந்துகள்; இன்று உணவுகள்: காலாவதியை கண்டுகொள்ளாத அதிகாரிகள்

Re: அன்று மருந்துகள்; இன்று உணவுகள்: காலாவதியை கண்டுகொள்ளாத அதிகாரிகள்

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக